ສູນການຄ້າເຟຣັນຊີບມໍ ຫຼື ຕະຫຼາດສະບາຍດີຈະໄດ້ມີການເປີດບໍລິການໃນມໍ່ໆນີ້ ພາຍຫຼັງທີ່ກຸ່ມບໍລິສັດຕັງຈະເລີນໄດ້ທຸ່ມເງິນເຖິງ 176 ຕື້ກີບ ຫຼື ປະມານ 22 ລ້ານໂດລາ ເຂົ້າໃນການກໍ່ສ້າງຫວັງພັດທະນາການຄ້າການບໍລິການໃຫ້ມີຄວາມຫຼາກຫຼາຍ; ໃນຂະນະທີ່ ທ່ານຮອງຜູ້ອຳນວຍການໝັ້ນໃຈພາຍຫຼັງທີ່ເປີດໃຫ້ບໍລິການແລ້ວ ຈະສາມາດດຶງດູດສ້າງຄວາມສົນໃຈຕໍ່ສັງຄົມ ແລະຈະສາມາດຜັກດັນຂະບວນການຄ້າຂາຍສິນຄ້າພາຍໃນເມືອງກໍ່ຄືແຂວງໃຫ້ມີບັນຍາກາດຄຶກຄື້ນຂຶ້ນ.
ທ່ານ ຄຳໄຕ ແກ້ວດວງດີ ຮອງຜູ້ອຳນວຍການກຸ່ມບໍລິສັດຕັງຈະເລີນໃຫ້ສຳພາດວ່າ: ໂຄງການກໍ່ສ້າງສູນການຄ້າເຟຣັນຊີບມໍ ຫຼື ຕະຫຼາດສະບາຍດີທີ່ຫຼັກ 2 ເມືອງປາກເຊ ແຂວງ ຈຳປາສັກ, ໄດ້ເລີ່ມລົງມືກໍ່ສ້າງມາແຕ່ ຕົ້ນປີ 2014 ໃນເນື້ອທີ່ເກືອບ 2 ເຮັກຕາ, ມາຮອດປະຈຸບັນແມ່ນໄດ້ສຳເລັດ ແລ້ວ 100%, ໃນມູນຄ່າການກໍ່ສ້າງທັງໝົດ 22 ລ້ານກວ່າໂດລາສະຫະລັດ, ຊຶ່ງໃນນັ້ນປະກອບມີຕຶກອາຄານ 3 ຊັ້ນທີ່ສ້າງເປັນສູນການຄ້າສະບາຍດີ ປະກອບມີໂຮງໜັງ 4 ໂຮງ, ສູນການຄ້າຄົບວົງຈອນ, ຮ້ານອາຫານ ແລະ ອື່ນໆທີ່ມີຄວາມຫຼາກຫຼາຍໃນການບໍລິການແຕກຕ່າງຈາກບ່ອນອື່ນ, ນອກຈາກນີ້ຍັງໄດ້ມີການກໍ່ສ້າງເປັນຫ້ອງແຖວ ຫຼາຍຫ້ອງທັງໃຫ້ເຊົ່າ ແລະຂາຍຂາດຕົວ ເພື່ອສ້າງທາງເລືອກໃຫ້ກັບລູກຄ້າທີ່ສົນໃຈເຂົ້າມາຈັບຈອງເພື່ອມາຈຳໜ່າຍສິນຄ້າຂອງຕົນ ແລະຍັງໄດ້ມີການກໍ່ສ້າງຕະຫຼາດສົດທີ່ມີການນຳໃຊ້ ແລະ ມີການຄ້າຂາຍຢ່າງມີບັນຍາກາດແລ້ວເວລານີ້.
ທ່ານຮອງຜູ້ອຳນວຍການໃຫ້ຮູ້ຕື່ມວ່າ: ເຖິງວ່າບໍ່ໄດ້ມີການເປີດນຳໃຊ້ຢ່າງເປັນທາງການແຕ່ກໍ່ມີແມ່ຄ້າຊາວຂາຍ, ນັກທຸລະກິດທັງພາຍໃນ ແລະຕ່າງປະເທດເຂົ້າມາຈັບຈອງແລ້ວເກືອບ 80-90%, ຊຶ່ງນັ້ນໄດ້ສະແດງໃຫ້ເຫັນວ່າ ສູນການຄ້າແຫ່ງນີ້ໄດ້ສ້າງຄວາມສົນໃຈຕໍ່ສັງຄົມເປັນໄປຕາມເປົ້າໝາຍຂອງບໍລິສັດທີ່ມີຄວາມຕັ້ງໃຈຈະສ້າງເປັນສູນການຄ້າທີ່ມີຄວາມທັນສະໄໝ ແລະ ມີຄວາມແຕກຕ່າງຈາກບ່ອນອື່ນໆເພື່ອຍົກລະດັບການບໍລິການໃນເມືອງກໍຄືແຂວງໃຫ້ມີບັນຍາກາດໃໝ່, ຊຶ່ງສູນການຄ້າແຫ່ງນີ້ແມ່ນຈະໄດ້ມີການເປີດການນຳໃຊ້ຢ່າງເປັນທາງໃນມໍ່ໆນີ້.
ທ່ານ ຄຳໄຕ ແກ້ວດວງດີ ໃຫ້ຮູ້ຕື່ມວ່າ: ນອກຈາກບໍລິສັດຈະໄດ້ມີການລົງທຶນກໍ່ສ້າງສູນການຄ້າສະບາຍດີທີ່ເມືອງປາກເຊ, ປະຈຸບັນບໍລິສັດຍັງໄດ້ລົງທຶນກໍ່ສ້າງສູນການຄ້າທີ່ດອນໜູນນະຄອນຫຼວງວຽງຈັນໃກ້ຈະສຳເລັດ, ຊຶ່ງເປັນສູນການຄ້າທີ່ມີຄວາມທັນສະໄໝ ແລະມີຄວາມເໝາະສົມທີ່ສຸດ, ນອກຈາກນີ້ ບໍລິສັດຍັງໄດ້ລົງທຶນກໍ່ສ້າງໂຮງແຮມລະດັບ 5 ດາວທີ່ວັງວຽງນຳອີກ.
ທີ່ມາ: