ໃນກອງປະຊຸມຖະແຫລງຂ່າວ ທີ່ໄດ້ຈັດຂຶ້ນໃນເຊົ້າວັນທີ 10 ມີນານີ້ ຢູ່ນະຄອນຫລວງວຽງຈັນ, ຜູ້ຕາງໜ້າກະຊວງສາທາລະນະສຸກ ໄດ້ອອກມາຢືນຢັນວ່າ: ໃນຜ່ານມາ ລາວຍັງບໍ່ມີຜູ້ຕິດເຊື້ອພະຍາດ ZIKA ໃນກໍລະນີໃດໆ. ເຖິງວ່າເປັນພະຍາດທີ່ຮ້າຍແຮງ ພວມແຜ່ລະຫຍາຍເປັນວົງກວ້າງໃນຂອບເຂດທົ່ວໂລກ ຈົນເຮັດໃຫ້ອົງການສາທາລະນະສຸກໂລກ (WHO) ອອກມາເຕືອນໄພອັນຕະລາຍຕໍ່ພະຍາດດັ່ງກ່າວ.
ທ່ານ ບຸນຫລາຍ ພົມມະສັກ ຫົວໜ້າກົມພະຍາດຕິດແປດ ກະຊວງສາທາລະນະສຸກ ຖະແຫລງໃນກອງປະຊຸມຂ່າວດັ່ງກ່າວວ່າ: ລາວປະຕິເສດໃນການກ່າວຫາວ່າ ລາວມີກໍລະນີຜູ້ຕິດເຊື້ອພະຍາດ ZIKA ແລະ ຂໍ
ຢືນຢັນວ່າ ນັບແຕ່ຕົ້ນປີ 2016 ມານີ້ ຢູ່ລາວຍັງບໍ່ກວດພົບເຫັນ ຜູ້ຕິດເຊື້ອພະຍາດດັ່ງກ່າວແຕ່ຢ່າງໃດ, ສ່ວນການຢືນຢັນຂອງອົງການ WHO ວ່າລາວມີກໍລະນີຜູ້ຕິດເຊື້ອ ZIKA ນັ້ນແມ່ນຂໍ້ມູນເກົ່າ. ຕາມການເປີດເຜີຍຂອງກະຊວງສາທາລະນະສຸກ ແລະ ສະຖາບັນ Pasteur ລາວ ເມື່ອຜ່ານມາ ຕາມກໍລະນີກວດເລືອດຂອງຜູ້ຕິດເຊື້ອພະຍາດໄຂ້ເລືອດອອກ ທີ່ມາຈາກຍຸງລາຍໃນລະຫວ່າງປີ 2012-2015 ພົບວ່າຢູ່ນະຄອນຫລວງວຽງຈັນ ມີຜູ້ຕິດເຊື້ອໄວຣັສ ZIKA ຈຳນວນ 19 ຄົນ, ໃນນັ້ນເປັນຊາຍ 13 ຄົນ ແລະ ເປັນຍິງ 6 ຄົນ, ແຕ່ສະເພາະຜູ້ຕິດເຊື້ອທີ່ເປັນເພດຍິງໃນເວລານັ້ນ ແມ່ນບໍ່ມີໃຜຖືພາ ແລະ ຈຳນວນຜູ້ຕິດເຊື້ອທັງໝົດ ລ້ວນແຕ່ມີສຸກຂະພາບແຂງແຮງດີ ແລະ ກໍບໍ່ມີໃຜໄດ້ໄປບັນດາປະເທດ ທີ່ມີການລະບາດຂອງພະຍາດດັ່ງກ່າວ.
ທ່ານ ບຸນຫລາຍ ກ່າວວ່າ: ແຕ່ເຖິງຢ່າງໃດ, ລັດຖະບານລາວກໍໄດ້ເອົາໃຈໃສ່ເປັນພິເສດ ຕໍ່ການຕ້ານ ແລະ ສະກັດກັ້ນການລະບາດຂອງພະຍາດຕິດແປດຮ້າຍແຮງດັ່ງກ່າວ ໂດຍໄດ້ຈັດຕັ້ງໜ່ວຍງານຮັບຜິດຊອບສະເພາະ, ໃນນັ້ນກໍມີໜ່ວຍງານສະກັດກັ້ນໄວຣັສ ZIKA ນຳດ້ວຍ ແລະ ໃນໄລຍະນີ້ ກະຊວງສາທາລະນະສຸກລາວ ກໍໄດ້ເອົາໃຈໃສ່ເຮັດວຽກງານໂຄສະນາເຕືອນສະຕິຂອງປະຊາຊົນ ໃນການສະກັດກັ້ນ ແລະ ທຳລາຍແຫລ່ງເພາະພັນຂອງຍຸງລາຍ ເຊິ່ງເປັນຕົວນຳເຊື້ອຂອງພະຍາດດັ່ງກ່າວ. ພ້ອມນັ້ນກໍໄດ້ປະສານສົມທົບກັບ ຂະແໜງຄົມມະນາຄົມ ແລະ ພະນັກງານຜູ້ເຮັດວຽກຢູ່ດ່ານຊາຍແດນ ໃຫ້ໄດ້ຮັບຂໍ້ມູນຂ່າວສານ ແລະ ວິທີການຕ່າງໆ ໃນການສະກັດກັ້ນພະຍາດຕິດແປດດັ່ງກ່າວໃຫ້ມີປະສິດທິຜົນ.
ແຫລ່ງຂ່າວ:
