ຂປລ. ການໂຄສະນາຫາສຽງ ຂອງບັນດາຜູ້ສະໝັກຮັບເລືອກຕັ້ງ ສສຊ ແລະ ສສຂ ຢູ່ເຂດເລືອກຕັ້ງຕ່າງໆ ພວມດຳເນີນໄປຢ່າງຂຸ້ນຂ້ຽວ ເພື່ອໃຫ້ສຳເລັດກ່ອນການປ່ອນບັດເລືອກຕັ້ງທີ່ຈະມີຂຶ້ນ ໃນວັນທີ 20 ມີນານີ້, ສະເພາະຜູ້ຮັບສະໝັກເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ເຂດ 2 ແຂວງຜົ້ງສາລີ ໄດ້ສືບຕໍ່ລົງເຄື່ອນໄຫວໂຄສະນາຫາສຽງ ຢູ່ເທສະບານເມືອງສຳພັນ ເຊິ່ງຜູ້ມີສິດເລືອກຕັ້ງ ອາຍຸແຕ່ 18 ປີ ຂຶ້ນໄປ 12.482 ຄົນ, ຍິງ 6.920 ຄົນ. ເພື່ອເຮັດໃຫ້ການລົງຫາສຽງຄັ້ງນີ້ ມີຜົນສຳເລັດຕາມລະດັບຄາດໝາຍ ແລະ ຜູ້ສະໝັກສະມາຊິກສະພາແຫ່ງຊາດແຕ່ລະທ່ານ ໄດ້ພັດປ່ຽນກັນສະເໜີຕົວ ໃຫ້ຜູ້ມີສິດປ່ອນບັດເລືອກຕັ້ງໄດ້ຮັບຊາບ. ການລົງໂຄສະນາຫາສຽງໃນຄັ້ງນີ້ ແມ່ນຈະໄດ້ເຄື່ອນໄຫວ ໃນບັນດາ 7 ເມືອງຂອງແຂວງ ຈົນເຖິງວັນທີ 18 ມີນາຈຶ່ງສຳເລັດ.
ໃນໂອກາດດັ່ງກ່າວ, ຜູ້ສະໝັກເລືອກຕັ້ງ ສສຊ ເຂດ 4 ແຂວງອຸດົມໄຊ ກໍໄດ້ສືບຕໍ່ເຄື່ອນໄຫວຫາສຽງຢູ່ເມືອງງາ, ເຊິ່ງຜູ້ສະໝັກຮັບເລືອກຕັ້ງ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ ຂອງສະມາສະມາຊິກສະພາແຫ່ງຊາດ ໃນການເປັນຕົວແທນ ແຫ່ງສິດຜົນປະໂຫຍດຂອງປະຊາຊົນບັນດາເຜົ່າ ແລະ ໄດ້ເນັ້ນໜັກໃຫ້ ອຳນາດການປົກຄອງຂັ້ນເມືອງ, ບ້ານ ແລະ ປະຊາຊົນ ຈົ່ງພ້ອມກັນເຮັດໜ້າທີ່ ໃນການໃຊ້ສິດຂອງຕົນເຂົ້າ ໃນການປ່ອນບັດໃຫ້ຄົບຕາມຈຳນວນ ຜູ້ມີສິດປ່ອນບັດຕົວຈິງ, ຮັບປະກັນ ໃຫ້ໄດ້ 300%.
ພ້ອມດຽວກັນນີ້, ປະຊາຊົນ ກໍຄືຜູ້ມີສິດປ່ອນບັດເລືອກຕັ້ງ ໄດ້ສະເໜີບັນຫາທີ່ມີຄວາມຫຍຸ້ງຍາກ ໃນການພັດທະນາຊີວິດການເປັນຢູ່ ເປັນຕົ້ນສະເໜີໃຫ້ຂັ້ນເທິງປັບປຸງແກ້ໄຂ ແລະ ຍົກລະດັບ ດ້ານພື້ນຖານໂຄງລ່າງເຊັ່ນ: ຖະໜົນຫົນທາງ, ນ້ຳສະອາດ ແລະ ອື່ນໆ.
ແຫລ່ງຂ່າວ:
