ວັນທີ 16 ກຸມພາ 2016 ທີ່ເດີ່ນ ຊາວໜຸ່ມແຂວງວຽງຈັນ ໄດ້ຈັດພິທີວາງສີລາລືກໂຄງການກໍ່ສ້າງສູນຝຶກວິຊາ ຊີບ ໂດຍການເຂົ້າຮ່ວມຂອງທ່ານ ດຣ. ຄຳພາ ພີມມະສອນຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ທ່ານສະຫວັນ ວົງສຳພັນ ຄະນະປະຈຳພັກແຂວງປະທານແນວລາວສ້າງຊາດຜູ້ຊີ້ນຳອົງການຈັດຕັ້ງມະຫາຊົນ, ທ່ານ ດາວສະຫວັນ ລາດສະວົງ ຮອງເລຂາຄະນະບໍລິຫານງານຊາວໜຸ່ມແຂວງມີແຂກຖືກເຊີນຈາກພະແນກການອ້ອມຂ້າງເຂົ້າຮ່ວມ.
ໂຄງການກໍ່ສ້າງສູນຝຶກວິຊາຊີບຊາວໜຸ່ມແຂວງວຽງຈັນເປັນໂຄງການໜຶ່ງທີ່ມີຄວາມໜາຍຄວາມສຳຄັນ ແລະ ຈຳເປັນທີ່ສຸດຕໍ່ວຽກງານການພັດທະນາຊາວໜຸ່ມ-ເຍົາວະຊົນ ຈຸດປະສົງການກໍ່ສ້າງ ກໍເພື່ອເປັນບ່ອນສຶກສາອົບຮົມ ແລະ ຝຶກຝົນຫຼໍ່ຫຼອມຊາວໜຸ່ມ-ເຍົາວະຊົນດ້ານວິຊາຊີບ ເປັນຕົ້ນດ້ານຕັດຫຍີບ, ເສີມສວຍ, ຈັກສານ, ພາສາອັງກິດ ແລະ ຄອມພິວເຕີ ນອກນີ້ຍັງໄດ້ສ້າງເປັນສະຖານທີ່ຫຼີ້ນກິລາ, ພັກຜ່ອນ ແລະຮຽນຮູ້ດ້ານຕ່າງໆ ເພື່ອເປັນການປະກອບສ່ວນຊ່ວຍໃນການຕ້ານ ແລະສະກັດກັ້ນບັນຫາປາກົດການຫຍໍ້ທໍ້ໃນສັງຄົມ.
ໂຄງການກໍ່ສ້າງສູນຝຶກວິຊາຊີບຊາວໜຸ່ມແຂວງວຽງຈັນ ເປັນອາຄາານ 4 ຊັ້ນ ຂະໜາດຍາວ 54 ແມັດ ກວ້າງ47 ແມັດ ຊັ້ນທີ 1 ປະກອບມີຫ້ອງສະໜຸດ, ຫ້ອງອາຫານ-ຮ້ານກາເຟ, ບ່ອນລົງທະບຽນ, ຫ້ອງວາງສະແດງ, ຊັ້ນທີ 2 ປະກອບມີຫ້ອງຮຽນລ້ຽງສັດ, ຫ້ອງຮຽນປູກຝັງ, ຫ້ອງທົດລອງ, ຫ້ອງຮຽນໄຟຟ້າ, ຫ້ອງຮຽນສ້ອມແປງ, ຫ້ອງຮຽນເສີມສວຍ, ຫ້ອງຮຽນຫັດຖະກຳ, ຫ້ອງຮຽນຄອມພິວເຕີ ແລະຫ້ອງນ້ຳ, ຊັ້ນທີ 3 ປະກອບມີຫ້ອງຮຽນພາສາຈຳນວນ 5 ຫ້ອງ, ຫ້ອງຮຽນປຸງແຕ່ງ, ຫ້ອງຮຽນຈັກສານ, ຫ້ອງຮຽນເຕັ້ນ, ຊັ້ນທີ 4 ປະກອບມີຫ້ອງອຳນວຍການ, ຫ້ອງການບໍລິຫານ, ແລະຫ້ອງການວິຊາການ.
ສູນຝຶກອົບຮົມດັ່ງກ່າວຕັ້ງຢູ່ບ້ານໂນນສະຫວ່າງ ເມືອງວຽງຄຳ ແຂວງວຽງຈັນ ລວມມູນຄ່າໂຄງການທັງໜົດ 28 ຕື້ກວ່າກີບເປັນແຫຼ່ງທຶນຂອງລັດຖະບານ 100% ເຈົ້າຂອງໂຄງການດັ່ງກ່າວແມ່ນສູນກາງຊາວໜຸ່ມປະຊາຊົນປະຕິວັດລາວ ໂດຍແມ່ນບໍລິສັດແກ້ວທະວິຊັບກໍ່ສ້າງຄົບວົງຈອນຈຳກັດຜູ້ດຽວເປັນຜູ້ຮັບເໜົາກໍ່ສ້າງໄລຍະການກໍ່ສ້າງ 24 ເດືອນ ໂດຍເລີ່ມແຕ່ວັນທີ 16 ກຸມພາ 2016 ຫາວັນທີ 16 ກຸມພາ 2018 ຈິ່ງຈະສຳເລັດ.
ທີ່ມາ: