ສຳນັກຂ່າວຕ່າງປະເທດ ລາຍງານໃນວັນທີ 17 ກຸມພານີ້ວ່າ ໃນມື້ວານນີ້ (16 ກຸມພາ 2016) ທ່ານ ບາຣັກ ໂອບາມາ ປະທານາທິບໍດີ ແຫ່ງ ສະຫະລັດອາເມຣິກາ ແລະ ຜູ້ນຳບັນດາປະເທດສະມາຊິກ ສະມາຄົມບັນດາປະຊາຊາດ ອາຊີຕາເວັນອອກສຽງໃຕ້ ຫລື ອາຊຽນ ໄດ້ເປີດຖະແຫລງຂ່າວຜົນຂອງກອງປະຊຸມ ສະຫະລັດອາເມຣິກາ-ອາຊຽນ ທີ່ລັດກາລິຟໍເນຍ ໂດຍລະບຸວ່າ ສະຫະລັດອາເມຣິກາ ແລະ ຜູ້ນຳອາຊຽນ ໄດ້ຫາລືເຖິງຄວາມຈຳເປັນ ທີ່ຈະຕ້ອງແກ້ໄຂ ບັນຫາຄວາມຂັດແຍ່ງໃນທະເລຈີນໃຕ້ ແລະ ເຫັນດີເປັນເອກະພາບວ່າ ຄວນແກ້ໄຂຂໍ້ຂັດແຍ່ງດັ່ງກ່າວ ຢ່າງສັນຕິວິທີ.
ກອງປະຊຸມໄດ້ປະກາດວ່າ ຈະຮ່ວມກັນປົກປ້ອງສັນຕິພາບ ຄວາມໝັ້ນຄົງ ແລະ ສະຖຽນລະພາບໃນພາກພື້ນ ຕະຫລອດຮອດຄວາມປອດໄພທາງທະເລ ແລະ ເສລີພາບໃນການເດີນເຮືອ-ການບິນ.
