ມະຫະກຳບຸນຊ້າງໄຊຍະຈະມີຫຼາກຫຼາຍກິດຈະກຳພ້ອມຊ້າງເກືອບ 70 ເຊືອກຮ່ວມສະແດງສ້າງສີສັນມະຫະກຳບຸນຊ້າງທີ່ ແຂວງໄຊຍະບູລີ ປະຈຳປີ 2016 ຈະຈັດຂຶ້ນໃນລະຫວ່າງກາງເດືອນກຸມພາຕໍ່ໜ້ານີ້ ໂດຍອຳນາດການປົກຄອງແຂວງລະບຸວ່າ ງານຄັ້ງນີ້ຈະຈັດໃຫ້ມີຫຼາກຫຼາຍກິດຈະກຳ ອັນພິເສດແມ່ນຈະມີຊ້າງ 67 ເຊືອກເຂົ້າຮ່ວມສະແດງສ້າງສີສັນເພີ່ມຄວາມມ່ວນຊື່ນແກ່ແຂກກໍຄືບັນດານັກທ່ອງທ່ຽວທີ່ເຂົ້າຮ່ວມຕະຫຼອດງານ.
ວັນທີ 15 ທັນວາ 2015 ທ່ານ ຍັນຍົງສີປະເສີດ ຮອງເຈົ້າແຂວງໆໄຊຍະບູລີໄດ້ຖະແຫຼງຂ່າວຕໍ່ສື່ມວນຊົນໃຫ້ຮູ້ວ່າ: ງານມະຫະກຳບຸນຊ້າງທີ່ແຂວງໄຊຍະບູລີປະຈຳປີ 2016 ຈະໄດ້ຈັດຂຶ້ນຢ່າງເປັນທາງການໃນວັນທີ 19-21 ກຸມພາ 2016 ທີ່ສະໜາມຫຼວງຂອງແຂວງ ໂດຍຈະມີຊ້າງເຂົ້າຮ່ວມທັງໝົດ67 ໂຕ ງານຄັ້ງນີ້ນັບເປັນຄັ້ງທີ 10 ພາຍຫຼັງທີ່ເລີ່ມຈັດແຕ່ປີ 2007 ເປັນຕົ້ນມາ.
ໂດຍໃນງານດັ່ງກ່າວ ທ່ານຮອງເຈົ້າແຂວງເປີດເຜີຍວ່າ ຈະມີກິດຈະກຳຫຼາຍຢ່າງເຊັ່ນ: ຂະບວນແຫ່ຊ້າງປະກວດຊ້າງງາມ,ບາສີສູ່ຂວັນຊ້າງ, ສະແດງຊ້າງອາບນ້ຳ, ສະແດງຊ້າງຄຳຮູ້, ສາທິດໃຊ້ງານຊ້າງ, ບໍລິການຂີ່ຊ້າງ ແລະຂີ່ຊ້າງອ້ອມເມືອງ, ນອກຈາກກິດຈະກຳຂອງຊ້າງແລ້ວ ຍັງມີການສະແດງຂາຍສິນຄ້າຈາກພາກສ່ວນຕ່າງໆທັງພາຍໃນ ແລະ ຕ່າງປະເທດເຊັ່ນ: ຈາກ ສສ ຫວຽດນາມ, ສປ ຈິນ ແລະ ລາຊະອານາຈັກໄທ, ບັນດາເມືອງພາຍໃນແຂວງຕື່ມອີກ.
ແນວໃດກໍດີ ງານມະຫະກຳບຸນຊ້າງແຂວງໄຊຍະບູລີ ນັບເປັນເທສະການບຸນໃຫຍ່ຂອງແຂວງໂດຍສ່ອງແສງເຖິງປະຫວັດສາດຄວາມເປັນມາຂອງ ສປປ ລາວ ໃນອະດີດທີ່ມີປະຊາກອນຊ້າງຈຳນວນຫຼວງຫຼາຍຈົນບໍ່ສາມາດນັບໄດ້ບັນດາປະຊາກອນຊ້າງເຫຼົ່ານີ້ຜັດຕິດພັນກັບການດຳລົງຊີວິດຂອງປະຊາຊົນລາວບັນດາເຜົ່າ ຈົນໄດ້ຂະໜານນາມວ່າປະເທດລ້ານຊ້າງ, ສະເພາະປະຊາກອນຊ້າງໃນແຂວງໄຊຍະບູລີ ໄດ້ກວມເຖິງ 75% ຂອງຈຳນວນຊ້າງທັງໝົດໃນທົ່ວປະເທດ ຊຶ່ງມີຢູ່ຕາມບັນດາເມືອງຕ່າງຂອງແຂວງ.
ການຈັດບຸນຊ້າງ ກໍເພື່ອໃຫ້ປະຊາຊົນພາຍໃນກໍຄືຕ່າງປະເທດ ໄດ້ມີຄວາມຮັບຮູ້ກ່ຽວກັບຊ້າງຫຼາຍຂຶ້ນ ເພາະຊ້າງເປັນສັດໃຫຍ່ເປັນສັດຄຳຮູ້ ແລະເປັນສັດທີ່ໄດ້ສ້າງຄຸນປະໂຫຍດໃຫ້ແກ່ປະເທດຊາດໃນໄລຍະຜ່ານມາ, ຄຽງຄູ່ກັນນີ້, ເພື່ອເຮັດໃຫ້ເຈົ້າຂອງຊ້າງຄວນຊ້າງຫັນເອົາຊ້າງຈາກການໃຊ້ແຮງງານໜັກໜ່ວງມາໃຊ້ແຮງງານເບົາ ແລະມີຜົນປະໂຫຍດທາງດ້ານເສດຖະກິດທີ່ຖືກຕ້ອງຕາມລະບຽບກົດໝາຍ, ທັງສອດຄອງກັບສະພາບຂອງປະເທດເຮົາໃນປະຈຸບັນທັງເປັນການໂຄສະນາໃຫ້ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວລາວ ກໍຄືແຂວງໄຊຍະບູລີ ນັບມື້ນັບຫຼາຍຂຶ້ນ, ທ່ານ ຍັນຍົງ ສີປະເສີດ ກ່າວ.