ວົງ ຢູ່ນາ ນຳໂດຍ ເທິ ຢູ່ນາ ພ້ອມກັບເພື່ອນຝຸງ ໄດ້ສະຫຼະຊັບສ່ວນຕົວຊື້ ໂຕະ-ຕັ່ງ ສຳນັກນັ່ງຮຽນ ຈຳນວນ 15 ຊຸດ, ໄມ້ວົງກົບ 12 ວົງ ແລະດິນບັອກອີກຈຳນວນໜຶ່ງ ໃຫ້ແກ່ໂຮງຮຽນບ້ານຫ້ວຍແຈງ ເມືອງເຊໂປນ ແຂວງສະຫວັນນະເຂດ ເຊິ່ງຮັບໂດຍທ່ານ ຄຳຫລ້າ ພົມມີໄຊ ຮອງເຈົ້າເມືອງໆ ເຊໂປນ.

ຢູ່ນາ ເປັນວົງດົນຕີ-ນັກຮ້ອງ ທີ່ມີຊື່ສຽງໂດ່ງດັງຈາກຄລິບຂ່າວ ພູໄທນິວ ແລະການຮ້ອງເພງ-ຫຼິ້ນດົນຕີທີ່ເປັນເອກະລັກສະເພາະ ຕິດພັນກັບທ້ອງທົ່ງນາ ສົມກັບຊື່ ຢູ່ນາ ແທ້ໆ ແຕ່ສິ່ງທີ່ພິເສດໄປກວ່ານັ້ນຄື ສະມາຊິກວົງ ຢູ່ນາ ລ້ວນແຕ່ເປັນຜູ້ມີຈິດໃຈດີ ມັກຊ່ວຍເຫຼືອສັງຄົມ ອັນນີ້ກໍສົມຄວນໄດ້ຮັບການຍ້ອງຍໍຊົມເຊີຍ ພ້ອມທັງສາມາດເປັນແບບຢ່າງທີ່ດີໃຫ້ແກ່ສັງຄົມດ້ວຍ.

ໃນໂອກາດມອບໂຕະນັກຮຽນດັ່ງກ່າວນັ້ນ ເທິ ຢູ່ນາ (ຫົວໜ້າວົງ) ໄດ້ເວົ້າກັບພວກນ້ອງໆນັກຮຽນວ່າ “ອ້າຍມີໃຫ້ພວກເຈົ້າສ່ຳນີ້ລະ ຕັ້ງໃຈຮຽນເດີສູ!”

ໃນຂະນະທີ່ນ້ອງໆນັກຮຽນກໍພາກັນຍິ້ມແຍ້ມດ້ວຍຄວາມດີໃຈ ແລະພ້ອມກັນຂົນໂຕະຂົນຕັ່ງຢ່າງຫ້າວຫັນ.