ປະຈຸບັນ ການນຳເມືອງດາກຈຶງ ແຂວງເຊກອງ ໄດ້ສຸມໃສ່ຊຸກຍູ້ສົ່ງເສີມໃຫ້ປະຊາຊົນຜະລິດກະສິກຳເປັນສິນຄ້າຕາມທ່າແຮງຂອງຕົນ, ໂດຍສະເພາະແມ່ນການປູກກາເຟ ແລະພືດເສດຖະກິດອື່ນໆ ທີ່ຕະຫຼາດຕ້ອງການເພື່ອເປັນທ່າແຮງຊ່ວຍຂັບເຄື່ອນການພັດທະນາເສດຖະກິດ-ສັງຄົມ ຂອງເມືອງໃຫ້ນັບມື້ຂະຫຍາຍຕົວເພີ່ມຂຶ້ນ.
ອີງຕາມຂໍ້ມູນລາຍງານຈາກຫ້ອງວ່າການປົກຄອງເມືອງດາກຈຶງໃຫ້ຮູ້ວ່າ: ນັບແຕ່ນີ້ຮອດປີ 2019 ການນຳທຸກຂັ້ນຂອງເມືອງຈະຊຸກຍູ້ສົ່ງເສີມປະຊາຊົນສຸມໃສ່ຜະລິດກະສິກຳເປັນສິນຄ້າ ແລະສະບຽງອາຫານຕາມທ່າແຮງຂອງຕົນ, ໂດຍສະເພາະແມ່ນກາເຟ, ໝາກແໜ່ງ, ໝາກນັດ, ສາລີ, ຖົ່ວດິນ, ຜັກກະລ່ຳປີ ແລະພືດເສດຖະກິດອື່ນໆທີ່ຕະຫຼາດຕ້ອງການ ເພື່ອເປັນທ່າແຮງຊ່ວຍຂັບເຄື່ອນ ການພັດທະນາເສດຖະກິດ-ສັງຄົມຂອງເມືອງໃຫ້ນັບມື້ຂະຫຍາຍຕົວເພີ່ມຂຶ້ນ. ນອກນັ້ນຍັງຈຸດສຸມໃສ່ແກ້ໄຂປາກົດການຫຍໍ້ທໍ້ຂອງ ສັງຄົມໃຫ້ມີການຫັນປ່ຽນຢ່າງຕັ້ງໜ້າ, ຫັນລົງກໍສ້າງຮາກຖານການເມືອງ, ພັດທະນາຊົນນະບົດ ແລະລຶບລ້າງຄວາມທຸກຍາກ ຂອງ ປະຊາຊົນຕາມ 4 ເນື້ອໃນ 4 ຄາດໝາຍ ແລະມະຕິຄຳສັ່ງຕ່າງໆຂອງພັກ-ລັດວາງອອກໃຫ້ເປັນປົກກະຕິຕໍ່ເນື່ອງ ແລະເປັນປະຈຳ.
ຮອດປີ 2019 ລວມຍອດຜະລິດຕະພັນພາຍໃນເມືອງເພີ່ມຂຶ້ນ ໃນລະດັບ 17% ຕໍ່ປີ, ໃນນີ້: ຂະແໜງກະສິກຳເພີ່ມຂຶ້ນ 9-10% ກວມເອົາອັດຕາສ່ວນ 47%; ຂະແໜງອຸດສາຫະກຳ 19-20% ກວມເອົາ 36% ແລະບໍລິການເພີ່ມຂຶ້ນ 17-18% ກວມເອົາ 17% ຂອງຈີດີພີ, ສະເລ່ຍລາຍຮັບຕໍ່ຫົວຄົນໃຫ້ໄດ້ 15,2 ລ້ານກີບຕໍ່ຄົນຕໍ່ປີ.
ຂໍ້ມູນໃຫ້ຕື່ມວ່າ: ເພື່ອບັນລຸໄດ້ຕາມເປົ້າໝາຍການຂະຫຍາຍຕົວຂອງເສດຖະກິດ, ການເມືອງຕ້ອງໄດ້ເພີ່ມທະວີໃນການຈັດຕັ້ງ ປະຕິບັດບັນດາແຜນງານ, ໂຄງການບຸລິມະສິດຂອງຂະແໜງກະສິກຳ ແລະປາໄມ້ທີ່ວາງໄວ້ໃຫ້ບັນລຸຜົນ, ພ້ອມທັງຕັ້ງໜ້າຫັນລົງຊຸກ ຍູ້ສົ່ງເສີມການຜະລິດສະບຽງອາຫານແລະຜະລິດສິນຄ້າໃຫ້ຫຼາຍຂຶ້ນ, ໂດຍມີການປະສານສົມທົບກັບທະນາຄານ ແລະສະຖາບັນການເງິນຕ່າງໆພາຍໃນແຂວງ, ເມືອງເອົາໃຈໃສ່ສະໜອງທຶນ ແລະສ້າງເງື່ອນໄຂອຳນວຍຄວາມສະດວກຕ່າງໆແກ່ການຜະລິດຂອງປະຊາຊົນ.
ທີ່ມາ: