ເມືອງໂພນທອງແຂວງຈຳປາສັກໃຊ້ງົບເກືອບ 2 ຕື້ກີບສ້າງຫໍຫຼັກເມືອງເພື່ອເປັນສັນຍາລັກແຫ່ງຄວາມສາມັກຄີປອງດອງອັນໜຶ່ງອັນດຽວທັງເປັນການຢັ້ງຢືນຄວາມເຂັ້ມແຂງຄວາມອົງອາດກ້າຫານແລະບ່ອນສັກກາລະບູຊາຂອງຊາວເມືອງ, ໃນຂະນະທີ່ປະຈຸບັນຍັງລໍຖ້າບໍລິສັດຜູ້ຈະມາເປັນຜູ້ຮັບເໝົາກໍ່ສ້າງ.
ພິທີວາງສີລາລືກໂຄງການກໍ່ສ້າງ ດັ່ງກ່າວໄດ້ມີຂຶ້ນໃນວັນທີ 29 ມັງກອນ 2016 ຜ່ານມານີ້, ຢູ່ທີ່ບໍລິເວນຕໍ່ໜ້າ ຫ້ອງການປົກຄອງເມືອງຮ່ວມເປັນປະ ທານຂອງ ທ່ານ ນິພອນ ວຽງປະເສີດ ຫົວໜ້າຄະນະຈັດຕັ້ງແຂວງຈຳປາສັກ, ທ່ານ ຂັນຄຳ ສຸລິວົງ ເຈົ້າເມືອງໂພນ ທອງ, ມີບັນດາທ່ານຈາກແຂວງ, ເມືອງ, ບັນດານັກທຸລະກິດພາຍໃນແຂວງ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.
ຫໍຫຼັກເມືອງໆໂພນທອງມີຄວາມ ກວ້າງ 6 ແມັດກວ່າ, ມີລວງສູງຈາກ ໜ້າດິນ 11 ແມັດ, ປະກອບມີປະຕູ 4 ດ້ານທີ່ຈະໄດ້ແກະສະຫຼັກຮູບພາບປະເພດຕ່າງໆທີ່ບົ່ງບອກເຖີງວິຖີຊີວິດຂອງ ປະຊາຊົນຊາວເມືອງໂພນທອງ, ໃຈກາງ ຂອງຫໍຫຼັກເມືອງແມ່ນສະຖິດດ້ວຍໄມ້ຈັນຫອມ, ໄມ້ຂະຍຸງ ຊຶ່ງເປັນໄມ້ມຸງຄຸນທີ່ຄົນເຄົາລົບນັບຖື, ຢູ່ພື້ນເດີ່ນພະລານອ້ອມຫໍຫຼັກເມືອງແມ່ນຕົບແຕ່ງດ້ວຍ ການປູກຕົ້ນໄມ້ປະດັບອ້ອມສະຖານທີ່, ໃນນັ້ນຍັງປະກອບມີຕິບເຂົ້າໃຫຍ່, ແຄນ ໃຫຍ່ ຊຶ່ງແມ່ນສັນຍາລັກຂອງທ້ອງຖິ່ນ ແລະຂອງຊາດ, ຫໍຫຼັກເມືອງດັ່ງກ່າວມີມູນຄ່າການກໍ່ສ້າງທັງໝົດ 1,8 ຕື້ກີບ, ຊຶ່ງແມ່ນທຶນຈາກຫຼາຍພາກສ່ວນສັງຄົມຕ່າງໆ, ປະຈຸບັນຍັງລໍຖ້າແຕ່ບໍລິສັດຜູ້ທີ່ ຈະມາຮັບເໝົາກໍ່ສ້າງ ແລະຄາດວ່າຈະ ໃຊ້ເວລາ 2 ປີໃຫ້ສຳເລັດ.
ໃນພິທີທ່ານ ຂັນຄຳ ສຸລິວົງ ກ່າວວ່າ: ຈຸດປະສົງໃນການກໍ່ສ້າງຫໍຫຼັກເມືອງ ດັ່ງກ່າວ ແມ່ນເພື່ອຢັ້ງຢືນແນວທາງນະໂຍບາຍອັນຖືກຕ້ອງຂອງພັກ-ລັດ, ໂດຍ ສະເພາະແມ່ນອຳນາດການ ປົກຄອງເມືອງ ໂພນທອງ ໃນການສຶບທອດມູນເຊື້ອອັນດີງາມຂອງຊາດຂອງທ້ອງຖິ່ນ ແລະສົ່ງເສີມສິລະປະວັດທະນະທຳທີ່ມີເອກະລັກຂອງທ້ອງຖິ່ນຕົນ, ທັງເປັນສັນຍາລັກແຫ່ງຄວາມສາມັກຄີປອງດອງເປັນອັນໜຶ່ງອັນດຽວກັນຂອງຊາວເມືອງ ທັງເປັນການຢັ້ງຢືນເຖິງຄວາມເຂັ້ມແຂງ ຄວາມອົງອາດກ້າຫານໃນການຕໍ່ສູ້ ແລະ ການປົກປັກຮັກສາບ້ານເມືອງ, ສ້າງຂຶ້ນ ເພື່ອເປັນບ່ອນວາງສະແດງວັດຖຸບູຮານ ທີ່ເກົ່າແກ່ສັກສິດ, ເປັນບ່ອນສັກກາລະບູຊາ, ເປັນບ່ອນອະນຸລັກຮັກສາ ແລະສົ່ງ ເສີມຄຸນຄ່າສິລະປະວັດທະນະທຳ, ເປັນ ບ່ອນສຶກສາອົບຮົມມູນເຊື້ອອັນດີງາມ ຂອງຊາດຂອງທ້ອງຖິ່ນ ໃຫ້ຄົນຮຸ່ນນີ້ໄປສູ້ຮຸ່ນລູກຫຼານສຶບຕໍ່ໄປ.