ມື້ວານນີ້ ວັນທີ 22 ມັງກອນ 2016 ກົມອຸຕຸນິຍົມແລະອຸທົກກະສາດ ກະຊວງຊັບພະຍາກອນທຳມະຊາດ ແລະສິ່ງແວດລ້ອມ ໄດ້ອອກແຈ້ງການສະບັບເລກທີ 0071 ເລື່ອງ ແຈ້ງເຕືອນໄພອາກາດໜາວ.
ເນື້ອໃນແຈ້ງເຕືອນລະບຸວ່າ ມວນອາກາດທີ່ໜາວເຢັນຈາກປະເທດຈີນ ຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວເຮົາ ດ້ວຍກຳລັງແຮງໃນໄລຍະ ວັນທີ 23-27 ມັງກອນ 2016, ເຊິ່ງຈະເຮັດໃຫ້ອຸນຫະພູມອາກາດຈະໜາວເຢັນລົງຕື່ມອີກ 5-7 ອົງສາ ໃນແຕ່ລະພາກ ພ້ອມກັບຈະມີຝົນຕົກ ແລະລົມພັດແຮງຢູ່ຕາມບາງທ້ອງຖິ່ນ, ໂດຍສະເພາະໃນເຂດພູສູງ, ພູດອຍ, ບັນດາແຂວງພາກເໜືອ, ໄຊສົມບູນ, ເມືອງດາກຈຶງ ແລະເຂດພູພຽງບໍລະເວນ ເມືອງປາກຊ່ອງ ອາກາດຈະໜາວເຢັນຫຼາຍ.
ດັ່ງນັ້ນ, ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນ, ອຳນາດການປົກຄອງ ແລະອົງການຈັດຕັ້ງທຸກພາກສ່ວນ ຈົ່ງມີສະຕິກຽມພ້ອມຮັບມືສະພາບອາກາດປ່ຽນແປງດັ່ງກ່າວ, ເຊິ່ງອາດຈະເປັນຜົນກະທົບຕໍ່ສຸຂະພາບ ຂອງເດັກນ້ອຍແລະຜູ້ເຖົ້າ ເຮັດໃຫ້ເຈັບປ່ວຍໄດ້ງ່າຍ. ພ້ອມທັງຂໍໃຫ້ລະມັດລະວັງຕໍ່ສະພາບລົມພັດແຮງໃນບາງທ້ອງຖິ່ນ ເຊິ່ງອາດຈະເຮັດໃຫ້ຕົ້ນໄມ້ ແລະສິ່ງປຸກສ້າງທີ່ບໍ່ແໜ້ນໜາເພພັງ ສ້າງຄວາມເສຍຫາຍແລະບາດເຈັບໄດ້.
