ສຳນັກຂ່າວຕ່າງປະເທດ ລາຍງານໃນວັນທີ 15 ມັງກອນນີ້ວ່າ ລະບົບນິເວດວິທະຍາທາງທະເລ ຢູ່ປະເທດຊີເລ (Chile) ເກີດວິກິດການໜັກ ສົ່ງຜົນເຮັດໃຫ້ປາໝຶກຂະໜາດໃຫຍ່ ຈຳນວນຫລາຍພັນໂຕ ຕາຍເຕັມທ້ອງທະເລ ແລະ ຖືກຄື້ນນ້ຳຊັດຂຶ້ນມາຄ້າງຕາມຊາຍຫາດ ເທິງເກາະຊານຕາ ມາຣີ ທາງພາກໃຕ້ປະເທດຊີເລ ອັນໄດ້ສ້າງຄວາມແປກປະຫລາດໃຈ ໃຫ້ກັບປະຊາຊົນທີ່ອາໄສຢູ່ເທິງເກາະດັ່ງກ່າວ ໂດຍພວກເຂົາມີຄວາມເປັນຫ່ວງວ່າ ຊາກປາໝຶກຕາຍເຫລົ່ານີ້ ອາດເໜົ່າເໝັນ ແລະ ຈະສົ່ງຜົນກະທົບ ຕໍ່ສຸຂະພາບຊຸມຊົນໄດ້.
ແນວໃດກໍຕາມ, ປັດຈຸບັນທາງການທ້ອງຖິ່ນ ໄດ້ສັ່ງໃຫ້ໜ່ວຍງານຂອງຕົນ ດຳເນີນການເກັບກູ້ຊາກປາໝຶກ ດັ່ງກ່າວນີ້ແລ້ວ ຊຶ່ງສາເຫດຂອງການຕາຍນັ້ນ ແມ່ນສັນນິຖານວ່າ ອາດເກີດຈາກປະລິມານອົກຊີເຢັນ ໃນນ້ຳທະເລຫລຸດລົງຜິດປົກກະຕິ.