spot_img
Homeຂ່າວພາຍ​ໃນລັດຖະມົນຕີວ່າການກະຊວງການເງິນເຜີຍ ລັດມີແຜນປັບດັດສະນີເງິນເດືອນ ສົກ 2016-2017 ເປັນຕົ້ນໄປ!

ລັດຖະມົນຕີວ່າການກະຊວງການເງິນເຜີຍ ລັດມີແຜນປັບດັດສະນີເງິນເດືອນ ສົກ 2016-2017 ເປັນຕົ້ນໄປ!

Published on

lian-thikeo

ທ່ານ ດຣ ລຽນທິແກ້ວ ລັດຖະມົນຕີວ່າການກະຊວງການເງິນ ໄດ້ກ່າວຕໍ່ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VII ໃນວັນທີ 22 ທັນ ວາ 2015 ຜ່ານມາວ່າ: ເລີ່ມແຕ່ສົກ 2016-2017 ເປັນຕົ້ນໄປ ຈະເພີ່ມດັດສະນີເງິນເດືອນປີລະບໍ່ຫຼຸດ 500 ກີບຕໍ່ໜຶ່ງດັດສະນີ ກວມເອົາ 40% ຂອງລາຍຮັບພາຍໃນ ເຊິ່ງບັນຫາດັ່ງກ່າວ ແມ່ນເກີດມາຈາກ ຜົນການຈັດຕັ້ງປະຕິບັດນະໂຍບາຍງົບປະມານ, ການເງິນລວມສູນເປັນເອກະພາບ ແຕ່ສູນກາງຮອດທ້ອງຖິ່ນເຂັ້ມແຂງຂຶ້ນ, ການແບ່ງຂັ້ນຄຸ້ມຄອງຂະແໜງການເງິນ ໄດ້ເລີ່ມເຂົ້າສູ່ທິດທາງການຈັດຕັ້ງປະຕິບັດທິດນໍາ 3 ສ້າງ, ພວກເຮົາສູ້ຊົນຈັດເກັບລາຍຮັບ ໄດ້ຕາມແຕ່ລະສົກງົບປະມານ; ສາມາດຄວບຄຸມການຂາດດຸນງົບປະມານ ບໍ່ໃຫ້ເກີນແຜນທີ່ສະພາແຫ່ງຊາດຮັບຮອງເອົາ; ບັນດານິຕິກໍາ ແລະ ກົດໝາຍເພື່ອເປັນເຄື່ອງມື ໃຫ້ແກ່ການຄຸ້ມຄອງມະຫາພາກຂະແໜງການເງິນ ໄດ້ຮັບການພັດທະນາ ດ້ວຍບາດກ້າວທີ່ແຂງແຮງກວ່າເກົ່າ.

ໃນແຜນງົບປະມານແຫ່ງລັດ 5 ປີ ຄັ້ງທີ VIII ມີຫຼາຍບັນຫາທີ່ໄດ້ກໍານົດຄາດໝາຍມະຫາພາກ ຮອດປີ 2020 ໃນດ້ານລາຍຮັບລວມ ຕ້ອງສູ້ຊົນສຸດຂີດ ປະຕິບັດລາຍຮັບງົບປະມານທັງໝົດ ໃຫ້ໄດ້ປະມານ 172 ພັນຕື້ີກີບ, ສະເລ່ຍບໍ່ຫຼຸດ 23% ຂອງ GDP ທຽບໃສ່ປະຕິບັດໃນ 5 ປີ ຜ່ານມາເພີ່ມຂຶ້ນ 73%, ລາຍຮັບພາຍໃນໃຫ້ໄດ້ປະມານ 155 ພັນຕື້ີກີບ, ສະເລ່ຍປະມານ 20% ຂອງ GDP ກວມເອົາປະມານ 90% ຂອງລາຍຮັບທັງໝົດ, ສະເລ່ຍແລ້ວແຕ່ລະປີເພີ່ມຂຶ້ນ 15% ທຽບໃສ່ປະຕິບັດໃນ 5 ປີ ຜ່ານມາ ເພີ່ມຂຶ້ນເທົ່າຕົວ ແລະ ດ້ານລວມຍອດລາຍຈ່າຍ ປະຕິບັດລາຍຈ່າຍບໍ່ໃຫ້ເກີນ 190 ພັນຕື້ີກີບ ທຽບໃສ່ປະຕິບັດໃນ 5 ປີ ຜ່ານມາ ເພີ່ມຂຶ້ນ 71%, ຖ້າທຽບໃສ່ລວມຍອດຜະລິດຕະພັນພາຍ ໃນບໍ່ໃຫ້ເກີນ 26%, ລາຍຈ່າຍເງິນເດືອນຄາດຄະເນປະມານ 61,5 ພັນຕື້ີກີບ ກວມ 8,23% ຂອງ GDP ທຽບໃສ່ປະຕິບັດໃນ 5 ປີ ຜ່ານມາເພີ່ມຂຶ້ນປະມານ 90%.

ທ່ານລັດຖະມົນຕີວ່າການກະຊວງການເງິນ ໄດ້ເນັ້ນວ່າ: ຍ້ອນສືບເນື່ອງຈາກຫຼາຍປັດໃຈ ໃນດ້ານລາຍຮັບ ຄາດວ່າໃນສົກງົບປະມານ 2016-2017 ເປັນຕົ້ນໄປ ຈະໄດ້ມີການປັບປຸງ ດັດສະນີເງິນເດືອນ ບໍ່ໃຫ້ຫຼຸດອັດຕາເງິນເຟີ້ໃນແຕ່ລະປີ ຫຼື ເພີ່ມດັດສະນີເງິນເດືອນ ປີລະບໍ່ຫຼຸດ 500 ກີບຕໍ່ໜຶ່ງດັດສະນີ ກວມເອົາ 40% ຂອງລາຍຮັບພາຍໃນ, ໃນໄລຍະ 5 ປີຈະຄຸ້ມຄອງບໍ່ໃຫ້ເກີນ 45% ຂອງລາຍຮັບພາຍໃນ, ລາຍຈ່າຍລົງທຶນຂອງລັດທັງໝົດ ປະມານ 68 ພັນຕື້ີກີບກວມເອົາ 9% ຂອງ GDP, ໃນນັ້ນລາຍຈ່າຍລົງທຶນພາຍໃນຈໍານວນ 25,4 ພັນຕື້ີກີບ ທຽບໃສ່ປະຕິບັດໃນ 5 ປີ ຜ່ານມາເພີ່ມຂຶ້ນ 89%, ການຄຸ້ມຄອງໜີ້ສິນພາກລັດ ໃນ 5 ປີຕໍ່ໜ້າ ຈະຄຸ້ມຄອງບໍ່ໃຫ້ເກີນ 55% ຂອງ GDP,ລາຍຈ່າຍຄັງສະສົມແຫ່ງລັດ ແລະ ລາຍຈ່າຍເພື່ອເຫດບັງເອີນສຸກເສີນ: ເພີ່ມຄັງສະສົມແຫ່ງລັດໃຫ້ໄດ້ປະມານ 3 ພັນຕື້ີກີບກວມເອົາ 2% ຂອງລາຍຮັບພາຍໃນ ໃນ 5 ປີ.

ສໍາລັບແຫຼ່ງລາຍຮັບງົບປະມານ 5 ປີຂ້າງໜ້ານີ້, ສ່ວນໃຫຍ່ແມ່ນລາຍຮັບທີ່ໄດ້ມາຈາກ ຂະແໜງພາສີ ແລະ ສ່ວຍສາອາກອນກວມ 82% ຂອງລາຍຮັບພາຍໃນທັງໝົດ ຫຼື ປະມານ 126,6 ພັນຕື້ີກີບ, ຂະແໜງພະລັງງານກວມ 7% ຫຼື ປະມານ 10,3 ພັນຕື້ີກີບ ( ປະມານ 1,3 ຕື້ໂດລາສະຫະຣັດ ), ໃນໄລຍະ 5 ປີຕໍ່ໜ້ານີ້ ລາຍຮັບຈາກແຫຼ່ງພະລັງງານ ຈະສາມາດທົດແທນ ລາຍຮັບຈາຂະແໜງບໍ່ແຮ່ໄດ້, ສະ ຫຼຸບລວມແລ້ວ ເຫັນວ່າແຜນງົບປະມານແຫ່ງລັດ 5 ປີ ຄັ້ງທີ VIII ແມ່ນມີລັກສະນະຕັ້ງໜ້າ ຂຶ້ນກ່ວາເກົ່າຫຼາຍ, ລາຍຮັບຈາກແຫຼ່ງງົບປະມານພາຍໃນ ສາມາດຮັບປະກັນລາຍຈ່າຍເງິນເດືອນ, ບໍລິຫານ, ລາຍຈ່າຍລົງທຶນ, ລາຍຈ່າຍຊໍາລະໜີ້ສິນ ແລະ ລາຍຈ່າຍອື່ນໆໄດ້ເຖິງ 88%.

 

ແຫລ່ງຂ່າວ:

ລພນ

ບົດຄວາມຫຼ້າສຸດ

ຄົ້ນຄວ້າ-ປຶກສາຫາລື 8 ບັນດາຫົວຂໍ້ທີ່ສໍາຄັນ ໃນກອງປະຊຸມສະໄໝສາມັນຂອງລັດຖະບານ ປະຈຳເດືອນສິງຫາ 2025

ກອງປະຊຸມສະໄໝສາມັນຂອງລັດຖະບານ ປະຈຳເດືອນສິງຫາ 2025 ກອງປະຊຸມສະໄໝສາມັນຂອງລັດຖະບານ ປະຈຳເດືອນສິງຫາ 2025 ໄດ້ໄຂຂຶ້ນໃນຕອນເຊົ້າ ວັນທີ 25 ສິງຫາ2025 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ ສີພັນດອນ,...

ປັບສູງສຸດ 2,000 ໂດລາ ສິງກະໂປເຂັ້ມງວດ ຈັດຢາສູບໄຟຟ້າ ຢູ່ໃນໝວດຢາເສບຕິດ

ສິງກະໂປເຂັ້ມງວດ ຈັດຢາສູບໄຟຟ້າ ຢູ່ໃນໝວດຢາເສບຕິດ ພ້ອມທັງຕັ້ງຄ່າປັບໄໝສູງສຸດ 2,000 ໂດລາ ຫຼື ປະມານ 45 ລ້ານກີບ ສຳນັກຂ່າວຕ່າງປະເທດລາຍງານໃນວັນທີ 18 ສິງຫາ 2025 ຜ່ານມາ,...

ປະຫວັດ “ບຸນຫໍ່ເຂົ້າປະດັບດິນ” ປະເພນີລາວທີ່ສືບທອດມາແຕ່ບູຮານນະການ

ວັນບຸນຫໍ່ເຂົ້າປະດັບດິນ ບຸນປະເພນີທີ່ບູຮານໄດ້ພາກັນປະຕິບັດກັນມາ ເພື່ອເປັນການອຸທິດບຸນກຸສົນ ໃຫ້ກັບຍາດຕິພີ່ນ້ອງ ຜູ້ທີ່ລ່ວງລັບໄປແລ້ວ ລວມທັງສັມພະເວສີ ຜີທີ່ບໍ່ມີຍາດ. ຄວາມ​ໝາຍ​ຄວາມ​ສໍາຄັນ​ຂອງ​ບຸນ​ຫໍ່​ເຂົ້າປະດັບດິນ: ຫໍ່​ເຂົ້າປະດັບດິນ ໝາຍ​ເຖິງ ການ​ນໍາ​ເອົາ​ອາຫານ​ຫວານ​ຄາວ ຊີ້ນ​ແຫ້ງ​ປາ​ຕາຍ, ເຂົ້າຕົ້ມເຂົ້າໜົມ, ໝາກ​ໄມ້​ນານາ​ຊະນິດ ແລະ...

ເງື່ອນໄຂ-ການປະຕິບັດນະໂຍບາຍ ຕໍ່ຄູອາສາສະໝັກ ທີ່ຈະເຂົ້າເປັນລັດຖະກອນປ້ອງກັນຊາດ

ເປີດເງື່ອນໄຂ-ການປະຕິບັດນະໂຍບາຍ ຕໍ່ຄູອາສາສະໝັກ ທີ່ຈະເຂົ້າເປັນລັດຖະກອນປ້ອງກັນຊາດ ໃນລະຫວ່າງວັນທີ 15-19 ສິງຫາ 2025 ນີ້, ຄະນະຮັບຜິດຊອບການບັນຈຸຄູອາສາສະໝັກເຂົ້າເປັນກຳລັງປ້ອງກັນຊາດ ນຳໂດຍ ທ່ານ ນາງ ຄຳພັດ ໄຊຍະລິນຄຳ ຮອງຫົວໜ້າກົມສ້າງຄູ...