ຂປລ. ກອງປະຊຸມລັດຖະບານສະໄໝສາມັນ ປະຈຳເດືອນ ທັນວາ 2015 ໄດ້ໄຂຂຶ້ນ ແຕ່ວັນທີ 21 ທັນວາ ໂດຍການເປັນປະທານຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານເຂົ້າຮ່ວມ.
ກອງປະຊຸມ ໄດ້ປຶກສາຫາລື, ປະກອບຄຳຄິດຄໍາເຫັນ ແລະ ຮັບຮອງເອົາທາງດ້ານຫລັກການ ຕໍ່ບັນຫາສໍາຄັນຕ່າງໆ ດັ່ງນີ້:
ກອງປະຊຸມໄດ້ຮັບຟັງ ແລະ ພິຈາລະນາຮັບຮອງ ບົດລາຍງານຜົນການຈັດຕັ້ງປະຕິບັດຄໍາສັ່ງເລກທີ 31/ນຍ ວ່າດ້ວຍຢຸດຕິຊົ່ວຄາວ ການຄຸດຄົ້ນໄມ້ໃນເຂດປ່າຜະລິດ; ການຂຸດຄົ້ນໄມ້ ແລະ ເຄື່ອງປ່າຂອງດົງ ສົກປີ 2014-2015 ແລະ ສະເໜີຂໍອະນຸມັດແຜນການ ສົກປີ2015-2016. ປັດຈຸບັນປ່າຜະລິດ ໃນຂອບເຂດທົ່ວປະເທດ ມີຈໍານວນທັງໝົດ 51 ເຂດ, ມີເນື້ອທີ່ທັງໝົດ 3,1 ລ້ານເຮັກຕາ, ປະກອບມີ 112 ເຂດຄຸ້ມຄອງ ແລະ 330 ເຂດຄຸ້ມຄອງຍ່ອຍ. ຄຽງຄູ່ກັບການ ຈັດຕັ້ງປະຕິບັດ ເນື້ອໃນຈິດໃຈຂອງຄໍາສັ່ງ ສະບັບເລກທີ 31/ນຍ ໃນສົກປີ 2014-2015 ຢູ່ແຕ່ລະແຂວງ ໄດ້ສືບຕໍ່ຈັດຕັ້ງປະຕິບັດ ການຂຸດຄົ້ນໄມ້ ແລະ ເກັບກູ້ ເຄື່ອງປ່າຂອງດົງ ຕາມທີ່ລັດຖະບານ ກໍຄື ບັນດາແຂວງຕ່າງໆ ໄດ້ອານຸມັດ. ສໍາລັບ ໄມ້ທີ່ລັດຖະບານໄດ້ອະນຸມັດໃຫ້ຂຸດຄົ້ນນັ້ນ ປະກອບມີ: ໄມ້ໃນເຂດກໍ່ສ້າງພື້ນຖານ ໂຄງລ່າງຕ່າງໆ; ໄມ້ປຸກສ້າງ ແລະ ໄມ້ເພື່ອເປັນທຶນຊໍາລະໂຄງການ ກໍ່ສ້າງພື້ນຖານໂຄງລ່າງ.
ກອງປະຊຸມໄດ້ຮັບຟັງ ແລະ ພິຈາລະນາຮັບຮອງ ບົດລາຍງານຜົນການຈັດຕັ້ງປະຕິບັດ ຄໍາສັ່ງເລກທີ 13/ນຍ ກ່ຽວກັບການໂຈະການພິຈາລະນາ ແລະ ອານຸມັດ ໂຄງການລົງທຶນໃໝ່ ສຳລັບການຊອກຄົ້ນ ແລະ ສໍາຫລວດແຮ່ທາດ, ການປູກຢາງ ພາລາ ແລະ ໄມ້ວິກ ໃນຂອບເຂດທົ່ວປະເທດ. ຕໍ່ບັນຫາດັ່ງກ່າວ, ກອງປະຊຸມໄດ້ຊີ້ນໍາ ໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕາມການປະກອບຄໍາເຫັນ ຂອງສະມາຊິກລັດຖະບານເປັນຕົ້ນ ໂຄງການລົງທຶນໃດ ທີ່ເຫັນວ່າບໍ່ມີຄວາມສາມາດທາງ ດ້ານເສດຖະກິດສູງ, ບໍ່ໄປບໍ່ມາ ແລະ ບໍ່ປະຕິບັດພັນທະຕໍ່ລັດຖະບານ ແມ່ນໃຫ້ໂຈະໂຄງການດັ່ງກ່າວ. ຖ້າຫາກໂຄງການໃດ ມີບົດວິພາກທາງດ້ານເສດຖະກິດ ທີ່ມີປະສິດທິຜົນທາງດ້ານເສດຖະກິດສູງ, ມີແຫລ່ງທຶນທີ່ຊັດເຈນຈະແຈ້ງ ໂດຍມີການຢັ້ງຢືນຈາກທະນາຄານ ຫລືອົງການໃດໜຶ່ງທີ່ໜ້າເຊື່ອຖື ແລະ ເປັນໂຄງການທີ່ມີຄວາມຈໍາເປັນ, ມີຄວາມຕ້ອງການໃນການຊົມໃຊ້ສູງ ແມ່ນໃຫ້ອະນຸມັດ. ສໍາຄັນແມ່ນຕ້ອງດໍາເນີນຕາມ ກົນໄກຜ່ານປະຕູດຽວ ແລະ ມີການປະຕິບັດ ຕາມລະບຽບກົດໝາຍຢ່າງເຄັ່ງຄັດ. ສໍາລັບໂຄງການປູກໄມ້ວິກ-ຢາງພາລາ ໃຫ້ສືບຕໍ່ໂຈະໄວ້ກ່ອນ.
ກອງປະຊຸມໄດ້ພິຈາລະນາຮັບຮອງ ຮ່າງແຜນຍຸດທະສາດການພັດທະນາ ລະບົບສະຖາບັນ ການເງິນ-ເງິນຕາ ໄລຍະ 10 ປີ (2016-2025) ແລະ ວິໄສທັດຮອດປີ 2030 ຕໍ່ບັນຫາດັ່ງກ່າວ ກອງປະຊຸມ ໄດ້ມີທິດຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕື່ມ ຕາມການປະກອບຄໍາເຫັນຂອງ ສະມາຊິກ ລັດຖະບານ ເປັນຕົ້ນ ຕ້ອງໄດ້ປັບປຸງ ແລະ ຄົ້ນຄວ້າຕື່ມ ກ່ຽວກັບໂຄງປະກອບຂອງຍຸດທະສາດດັ່ງກ່າວ, ກໍານົດນະໂຍບາຍສິນເຊື່ອ. ໃນນັ້ນຕ້ອງກໍານົດອັດຕາດອກເບ້ຍ ເງິນກູ້-ເງິນຝາກ ຢ່າງຈະແຈ້ງ ໃນເງື່ອນໄຂເສດຖະກິດຕະຫລາດ ແລະ ການເຊື່ອມໂຍງກັບພາກພື້ນ ແລະ ສາກົນ. ອັນສໍາຄັນ ຕ້ອງຮັກສາໄດ້ສະຖຽນລະພາບທາງດ້ານເງິນຕາ ໄປຄຽງຄູ່ກັບການຊຸກຍູ້ ສົ່ງເສີມການຜະລິດຢ່າງຕັ້ງໜ້າ.ນອກນັ້ນ, ຕ້ອງສືບຕໍ່ລະດົມ ທຶນຈາກຕ່າງປະເທດໃຫ້ຫລາຍຂຶ້ນ.
ສໍາລັບບົດລາຍງານກ່ຽວກັບການສະເໜີເອົາວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນວາລະແຫ່ງຊາດ. ຈຸດປະສົງເພື່ອເຮັດໃຫ້ ສປປ ລາວ ມີຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ປະຊາຊົນລາວໄດ້ດໍາລົງຊີວິດຢູ່ ໃນສະພາບແວດລ້ອມ ທີ່ສະຫງົບ ປອດໄພ; ຖືເອົາການສະກັດກັ້ນ ແລະ ຕ້ານຢາເສບຕິດ ເປັນພັນທະ ແລະ ໜ້າທີ່ຄວາມຮັບຜິດຊອບຂອງໝົດທຸກຄົນໃນສັງຄົມ. ພ້ອມທັງເປັນການຈໍາກັດ ແລະ ສະກັດກັ້ນ ບໍ່ໃຫ້ເກີດມີປະກົດການຫຍໍ້ທໍ້ຕ່າງໆ ທີ່ຈະເປັນໄພອັນຕະລາຍ ແລະ ກົດໜ່ວງທ່ວງດຶງການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີX ຂອງພັກ ແລະ ບັນດາຄາດໝາຍສູ້ຊົນຕ່າງໆ ຂອງແຜນພັດທະນາເສດຖະກິດສັງຄົມ 5 ປີ ຄັ້ງທີ VIII ໃຫ້ບັນລຸຜົນເປັນຈິງ; ເຮັດໃຫ້ບັນດາເປົ້າໝາຍຜູ້ຜະລິດ, ປຸງແຕ່ງ, ຄ້າຂາຍ ແລະ ເສບຢາເສບຕິດ ທີ່ເປັນອັນຕະລາຍ ແລະ ສ້າງຜົນກະທົບກະເທືອນໂດຍກົງຕໍ່ຄວາມສະຫງົບ ແລະ ຄວາມເປັນລະບຽບ ຮຽບຮ້ອຍຂອງສັງຄົມ ແລະ ຄວາມໝັ້ນ ຄົງຂອງຊາດ ໄດ້ຖືກແກ້ໄຂຢ່າງເດັດຂາດ ແລະ ໂດຍໄວທັງຮັບປະກັນໃຫ້ແກ່ຄວາມປອດໄພ ໃຫ້ແກ່ການດໍາເນີນກອງປະຊຸມສາກົນຕ່າງໆທີ່ ສປປ ລາວ ຈະເປັນເຈົ້າພາບໃນປີ 2016 ທັງເປັນການຮັກສາຄໍາໝັ້ນສັນຍາທີ່ ສປປ ລາວໄດ້ປະ ກາດລົບລ້າງການປູກຝິ່ນ ໃນຂອບເຂດທົ່ວປະເທດໃນປີ 2006 ຕໍ່ອົງສະຫະປະຊາຊາດນັ້ນ ໃຫ້ມີຄວາມຍືນຍົງຢ່າງແທ້ຈິງ.
ກອງປະຊຸມໄດ້ປະກອບຄໍາຄິດຄໍາເຫັນ ແລະ ພິຈາລະນາຮັບຮອງ ຮ່າງແຜນດໍາເນີນງານແຫ່ງຊາດ ເພື່ອຄວາມສະເໝີພາບຍິງ-ຊາຍ ໄລຍະ 5 ປີ ຄັ້ງທີIII (2016-2020);ຮ່າງວິໄສທັດຮອດປີ 2030 ແລະ ຍຸດທະສາດແຫ່ງຊາດ ເພື່ອຄວາມ ສະເໝີພາບຍິງ-ຊາຍ. ຕໍ່ບັນຫາດັ່ງກ່າວ ກອງປະຊຸມ ມີທິດຊີ້ນໍາໃຫ້ພາກ ສ່ວນກ່ຽວຂ້ອງນໍາໄປປັບປຸງຕື່ມ ຕາມການປະກອບຄໍາເຫັນຂອງສະມາຊິກລັດຖະບານ ເປັນຕົ້ນ.
ບັນຫາສຸດທ້າຍ ກອງປະຊຸມ ໄດ້ພິຈາລະນາຮັບຮອງ ດໍາລັດວ່າດ້ວຍກອງທຶນທາງສະບັບປັບປຸງຈຸດປະສົງເພື່ອກຳນົດຫລັກ, ລະບຽບການກ່ຽວກັບການຄຸ້ມຄອງ, ຕິດຕາມກວດກາກອງທຶນທາງເພື່ອລະດົມ, ຂົນຂວາຍ ແລະ ສະສົມທຶນແນໃສ່ ເຮັດໃຫ້ມີທຶນພຽງພໍ ແລະ ຍືນຍົງ ນໍາໃຊ້ເຂົ້າໃນວຽກງານ ບູລະນະຮັກສາ, ສ້ອມແປງທາງຫລວງ ແລະ ຄວາມປອດໄພທາງທະໜົນ ໃຫ້ມີປະສິດທິຜົນ.
ໃນຕອນທ້າຍກອງປະຊຸມ ທ່ານ ນາຍົກລັດຖະມົນຕີ ໄດ້ຊີ້ນໍາໃຫ້ສະມາຊິກລັດຖະບານ ນໍາເອົາເນື້ອໃນຈິດໃຈທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້ ລວມທັງບັນດາວຽກງານທີ່ເປັນຈຸດສຸມໃນເດືອນມັງກອນ 2016 ໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດດ້ວຍຄວາມຮັບຜິດຊອບສູງ ດັ່ງນີ້:
1). ເດືອນມັງກອນ ປີ 2016 ຈະມີຫລາຍວຽກທີ່ສຳຄັນຂອງພັກເຮົາ ເປັນຕົ້ນ ແມ່ນການດຳເນີນກອງປະຊຸມໃຫຍ່ຄັ້ງທີ X ຂອງພັກ ແລະ ກອງປະຊຸມຄົບຄະນະບໍລິຫານງານສູນກາງພັກເທື່ອສຸດທ້າຍ ຂອງສະໄໝທີ IX ຂອງພັກ ຈຶ່ງສະເໜີໃຫ້ບັນດາສະຫາຍ ເອົາໃຈໃສ່ກະກຽມດ້ານຕ່າງໆ ໂດຍສະເພາະແມ່ນດ້ານ ເນື້ອໃນທີ່ຈະລາຍງານຕໍ່ກອງປະຊຸມດັ່ງກ່າວໃຫ້ຮັດກຸມ, ຄົບຖ້ວນ ແລະ ສອດຄ່ອງກັບສະພາບຄວາມເປັນຈີງ ຂອງແຕ່ລະພາກສ່ວນ. ນອກຈາກນັ້ນ ກໍໃຫ້ເອົາໃຈໃສ່ຕື່ມ ກ່ຽວກັບບັນຫາຄວາມເປັນລະບຽບຮຽບຮ້ອຍໃນສັງຄົມ, ຄວາມສະຫງົບປອດໄພຮອບດ້ານ ແລະ ການປະດັບປະດາຕົບແຕ່ງສຳນັກງານ, ອົງການ ກໍຄືຕົວເມືອງ ໃຫ້ມີຄວາມສະອາດຈົບງາມ, ພ້ອມທັງສ້າງຂະບວນການ ແຂ່ງຂັນຮັກຊາດ ແລະ ພັດທະນາ ເຮັດໃຫ້ກອງປະຊຸມໃຫຍ່ຄັ້ງທີ X ຂອງພັກ ມີບັນຍາ ກາດທີ່ດີ ແລະ ມີຜົນສຳເລັດຢ່າງຈົບງາມ.
2). ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມ ສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VII ໃຫ້ມີໝາກມີຜົນຕົວຈິງ ພ້ອມກັນນັ້ນ ກໍໃຫ້ຄົ້ນຄ້ວາກະກຽມບຸກຄະລາກອນໃນຂະແໜງການຕົນເອງ ທີ່ຈະສະໝັກເຂົ້າເປັນສະມາຊິກສະພາແຫ່ງຊາດຊຸດທີ VIII ໃຫ້ຮັບປະກັນໄດ້ ຜູ້ທີ່ມີເງື່ອນໄຂ ແລະ ມີມາດຖານຄົບຖ້ວນ.
3). ເດືອນມັງກອນນີ້ ກໍຈະແມ່ນວັນຄົບຮອບ 67 ປີ ຂອງການສ້າງຕັ້ງ ກອງທັບປະຊາຊົນລາວ ແລະ ປີໃໝ່ສາກົນ 2016 ຈຶ່ງສະເໜີໃຫ້ບັນດາສະຫາຍເອົາໃຈໃສ່ສະເຫລີມສະຫລອງວັນດັ່ງກ່າວ ໃຫ້ມີບັນຍາກາດທີ່ດີ, ມີຄວາມເປັນລະ ບຽບຮຽບຮ້ອຍ ແລະ ມີຄວາມສະຫງົບປອດໄພ ຮັບປະກັນໄດ້ດ້ານເນື້ອໃນ ແລະ ບົນຈິດໃຈປະຢັດ.
4). ໃຫ້ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳສົກປີ 2015-2016 ກໍຄືແຜນງົບປະມານແຫ່ງລັດ ແລະ ແຜນລາຍຮັບ-ລາຍຈ່າຍ ໃຫ້ບັນລຸຕາມຄາດໝາຍ.
5). ໃຫ້ເອົາໃຈໃສ່ເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມໜັກແໜ້ນ ແລະ ເຂັ້ມແຂງຕື່ມ ພ້ອມກັນນັ້ນ ກໍໃຫ້ເອົາໃຈໃສ່ແກ້ໄຂປະກົດການຫຍໍ້ທໍ້ຕ່າງໆ ໃນສັງຄົມເປັນຕົ້ນ ແມ່ນບັນຫາຢາເສບຕິດ, ຂີ້ລັກງັດແງະ, ກຸ່ມແກ້ງອັນຕະພານກວນເມືອງ, ບັນຫາອຸບັດຕິເຫດ ແລະ ລົດຕິດຕາມທ້ອງຖະໜົນ ແລະ ອື່ນໆ, ພ້ອມກັນນັ້ນ ໃຫ້ເອົາໃຈໃສ່ມີສະຕິ ແລະ ຕິດຕາມການເຄື່ອນໄຫວຂອງຄົນບໍ່ດີທີ່ຈະເຄື່ອນໄຫວສ້າງຄວາມວຸ້ນວາຍ, ຄວາມບໍ່ສະຫງົບ, ຫາງສຽງສັງຄົມໃນໄລຍະການກະກຽມ ແລະ ດຳເນີນກອງປະຊຸມໃຫຍ່ຄັ້ງທີ X ຂອງພັກ ຕ້ອງມີມາດຕະການແກ້ໄຂຢ່າງເຂັ້ມງວດ, ເດັດຂາດ ແລະ ຕໍ່ເນື່ອງ, ຕ້ອງແກ້ໄຂບັນຫາໄວ ແລະ ມີວິທີປ້ອງກັນແຕ່ຫົວທີ.
6). ໃຫ້ຂະແໜງການກ່ຽວຂ້ອງຊຸກຍູ້ຕື່ມ ກ່ຽວກັບຂະບວນການຜະລິດລະດູແລ້ງໃຫ້ທັນເວລາ ແລະ ມີໝາກມີຜົນຕົວຈິງກວ່າເກົ່າ. ພ້ອມກັນນັ້ນ ກໍໃຫ້ເອົາໃຈໃສ່ປ້ອງກັນພະຍາດລະບາດຕາມລະດູການ, ບັນຫາໜູຂີ, ຕັກແຕນ ແລະ ມີມາດຕະການປ້ອງກັນໄຟໄໝ້ປ່າ ເຊິ່ງອາດຈະເກີດຂຶ້ນໄວ້ແຕ່ຫົວທີ./.
ແຫ່ລງຂ່າວ
