ໃນວັນທີ 18/09/2025 ມີລາຍງານຈາກສຳນັກຂ່າວປະເທດຈີນ ເກີດອຸບປະຕິເຫດ ລົດບິນຕໍາກັນລະຫວ່າງຊ້ອມການສະແດງ ທີ່ເມືອງສາງຊຸນ ຂອງປະເທດຈີນ ລາຍງານມີຜູ້ບາດເຈັບ 1 ຄົນ.

ອຸບບັດຕິເຫດດັ່ງກ່າວໄດ້ເກີດຂຶ້ນໃນຕອນທີ່ບໍລິສັດ Xpeng ຂອງປະເທດຈີນ ໄດ້ຈັດງານສະແດງເປີດໂຕລົດບິນ. ສະແດງເຖິງເຕັກໂລໂນຊີທີ່ທັນສະໄໝ ແລະ ຄວາມກ້າວໜ້າຂອງອຸສາຫະກຳລົດ, ແຕ່ໃນລະຫວ່າງຊ້ອມການສະແດງ ໄດ້ເກີດອຸບັດຕິເຫດທີ່ບໍ່ຄາດຄິດ ເນື່ອງຈາກລົດບິນ 2 ຄັນ ໄດ້ບິນໃກ້ກັນເກີນໄປຈົນເຮັດໃຫ້ຕຳກັນ ລົດບິນຄັນທຳອິດສາມາດຄວບຄຸມ ລົງຈອດໄດ້ຢ່າງປອດໄພ ສ່ວນຄັນທີ 2ແມ່ນໄດ້ຮັບຄວາມເສຍຫາຍທາງດ້ານໂຄງສ້າງ ເຮັດໃຫ້ເກີດໄຟໄໝ້ໃນຕອນທີ່ຮອດພື້ນດິນ, ໂຊກດີທີ່ທາງເຈົ້າໜ້າທີ່ສາມາດເຂົ້າມາຄວບຄຸມສະຖານະການໄດ້ ແລະ ຄົນຂັບລົດກໍໄດ້ຮັບບາດເຈັບເລັກໜ້ອຍ.

ຢ່າງໃດກໍຕາມ ຖືວ່າເປັນບົດຮຽນລາຄາແພງໃຫ້ແກ່ບໍລິສັດດັ່ງກ່າວ ເຖິງວ່າເຕັກໂນໂລຊີຈະທັນສະໄໝ ແຕ່ກໍຕ້ອງຢູ່ໃນໄລຍະທີ່ຕ້ອງປັບປຸງມາດຕະຖານຄວາມປອດໄພຕະຫຼອດ ບໍ່ວ່າຈະເປັນການຊ້ອມຂຶ້ນບິນ ການຄວບຄຸມການສັນຈອນທາງອາກາດ ທີ່ຕ້ອງເຂັ້ມງວດຫຼາຍຂຶ້ນກ່ຽວກັບຄວາມປອດໄພ ເພາະເມື່ອໃດທີ່ລົດບິນ ໄດ້ອອກສູ່ການໃຊ້ງານ ຄວາມເຊື່ອໝັ້ນຂອງລູກຄ້າຈະຂຶ້ນຢູ່ກັບມາດຕະຖານຄວາມປອດໄພເປັນຫຼັກ.

ແຫຼ່ງຂໍ້ມູນ : BBC