ຂະບວນຄາຣາວານລົດ ຈຳນວນ 50 ກວ່າຄັນ 200 ກວ່າຄົນ ນຳໂດຍທ່ານ ສຈ.ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທີ່ເລີ່ມເຄື່ອນອອກຈາກນະຄອນຫຼວງວຽງຈັນ-ຊຽງຂວາງ-ຫົວພັນ ເມື່ອວັນທີ 8-13 ມັງກອນ 2014 ໄດ້ສຳເລັດຢ່າງຈົບງາມ ທ່າມກາງບັນຍາກາດການຕ້ອນຮັບຢ່າງອົບອຸ່ນ ຂອງມວນຊົນຕະຫຼອດເສັ້ນທາງ.
ການຈັດຕັ້ງຂະບວນດັ່ງກ່າວ ເພື່ອເປັນການສະເຫຼີມສະຫຼອງ ຄົບຮອບ 65 ປີ ຂອງກອງທັບປະຊາຊົນລາວ ທັງເປັນການໂຄສະນາເຜີຍແຜ່ໃຫ້ຮັບຮູ້ວ່າ ສປປ ລາວ ເປັນປະເທດທີ່ໜ້າທ່ຽວຊົມທີ່ສຸດ ໃນໂລກໃນປີ 2013 ພ້ອມກັນນີ້ ກໍ່ຍັງເປັນການເຊີນຊວນ ສົ່ງເສີມໃຫ້ລາວທ່ຽວລາວ ຊົມສະຖານທີ່ບູຮານອັນເກົ່າແກ່ທາງປະຫວັດສາດ ແລະ ທຳມະຊາດ ໂດຍສະເພາະແມ່ນ ທົ່ງໄຫຫີນ 1,2 ແລະ 3 ແລະ ພູເກັງ ບ່ອນຜະລິດໄຫຫີນ ຖ້ຳປີວ ເພຍວັດ ສູນວາງສະແດງສິ່ງເສດເຫຼືອສົງຄາມ ແລະ ຂໍ້ມູນຂ່າວສານການທ່ອງທ່ຽວ ແລະ ອີກຫຼາຍສະຖານທີ່ທີ່ໜ້າສົນໃຈໃນແຂວງຊຽງຂວາງ ຈາກນັ້ນ ຫຍັບຂຶ້ນມາທາງເໜືອເລັກນ້ອຍໃນໄລຍະລະດູນີ້ ຍັງຈະໄດ້ສຳຜັດກັບທະເລໝອກຕາມສັນພູຈາກແຂວງຊຽງຂວາງສູ່ແຂວງຫົວພັນ ທີ່ຫຸ້ມຫໍ່ເອົາໜ່ວຍພູນ້ອຍໃຫຍ່ ຕາມເສັ້ນທາງຍັງຈະໄດ້ເຫັນຊົນເຜົ່າຕ່າງໆ ທີ່ມີເອກະລັກການແຕ່ງໂຕທີ່ຈົບງາມ ຕະຫຼອດຈົນຮອດໜ່ວຍແກ້ວເອກະລັກເມືອງຊຳເໜືອ ແຂວງຫົວພັນ ກ່ອນຈະໄປຊົມອະນຸສອນສະຖານຖ້ຳທ່ານຜູ້ນຳທັງ 7 ທ່ານ ທີ່ເມືອງວຽງໄຊ.
ການເດີນທາງຕະຫຼອດທັງ 6 ວັນ ດ້ວຍໄລຍະທາງລວມປະມານ 1.340 ກິໂລແມັດ ນອກຈາກຈະທ່ຽວຊົມຄວາມສວຍງາມທາງທຳມະຊາດ ແລະ ປະຫວັດສາດແລ້ວ ຂະບວນຍັງໄດ້ເດີນທາງໄປຢ້ຽມຊົມ ພ້ອມທັງມອບວັດຖຸປັດໄຈ ແລະ ເຄື່ອງນຸ່ງໃຫ້ກັບກອງ ກ1 ກອງ ຂ 258 ແລະ ສະຖານທີ່ສຳຄັນອື່ນໆອີກ ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກການນຳຂອງ 2 ແຂວງຄື: ແຂວງຊຽງຂວາງ ແລະ ຫົວພັນ ຈົນເຮັດໃຫ້ການເດີນທາງຄັ້ງນີ້ບັນລຸຕາມເປົ້າໝາຍ.