ຂປລ. ກອງ​ປະຊຸມ​ພົບ​ປະ ລະ​ຫວ່າງ ອົງການ​ປົກຄອງ​ນະຄອນຫລວງ ກັບ​ນັກທຸລະກິດ ນະຄອນຫລວງ​ວຽງ​ຈັນ ປະຈຳ​ປີ 2015 ຈະ​ຈັດ​ຂຶ້ນ​ໃນ​ວັນ​ທີ 31 ທັນວາ 2015 ທີ່​ຈະ​ມາ​ເຖິງ ​ເພື່ອ​ໃຫ້​ອົງການ​ປົກຄອງ​ນະຄອນຫລວງວຽງ​ຈັນ, ບັນດາ​ພະ​ແນ​ກການ​ຕ່າງໆ ​ເຊິ່ງ​ເປັນ​ຜູ້​ບໍລິຫານ​ວຽກ​ງານ​ຕົວ​ຈິງ ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ຕໍ່​ຄວາມ​ຮຽກຮ້ອງ​ຕ້ອງການ​ທີ່​ຈຳ​ເປັນ​ຂອງ​ບັນດາ​ຫົວໜ່ວຍ​ທຸລະ​ ກິດ ​ແລະ ຜູ້​ປະກອບ​ການ​ຕ່າງໆ.

ທ່ານ ​ເບີ​ລິນ ​ເພັດ​ຈັນທະ​ຣາດ ຫົວໜ້າ​ພະ​ແນ​ກອຸດສາຫະກຳ ​ແລະ ການ​ຄ້າ ນະຄອນຫລວງ​ວຽງ​ຈັນ ​ແລະ ທ່ານນາງ ສົມ​ຈັນ ສິງ​ທະ​ບຸດ ຄະນະ​ປະຈຳ​ສະພາ​ການ​ຄ້າ ​ແລະ ອຸດສາຫະກຳ ນະຄອນຫລວງ​ວຽງ​ຈັນ ​ໄດ້​ຖະ​ແຫລ​ງ ຂ່າວ​ຕໍ່​ສື່​ມວນ​ຊົນ ​ໃນ​ຕອນ​ບ່າຍ​ວັນ​ທີ 17 ທັນວາ 2015 ນີ້​ວ່າ: ປັດຈຸບັນ ນະຄອນຫລວງ​ວຽງ​ຈັນ ກໍ​ຄື ພະ​ແນ​ກອຸດສາຫະກຳ ​ແລະ ການ​ຄ້າ ​ແມ່ນ​ມີ​ຄວາມ​ພ້ອມ 100% ທີ່​ຈະ​ຈັດ​ກອງ​ປະຊຸມ​ພົບ​ປະ​ດັ່ງກ່າວ ພ້ອມ​ງານ​ວາງສະ​ແດງສິນຄ້າ ​ຂຶ້ນ​ໃນ​ທ້າຍ​ເດືອນ​ນີ້ ​ເຊິ່ງນອກຈາກ​ຈະ​ເຮັດໃຫ້​ ອົງການ​ປົກຄອງ​ນະຄອນຫລວງ, ບັນດາ​ພະ​ແນ​ກການ​ຕ່າງໆ ​ເຊິ່ງ​ເປັນ​ຜູ້​ບໍລິຫານ​ວຽກ​ງານ​ຕົວ​ຈິງ ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ຕໍ່​ຄວາມ​ຮຽກຮ້ອງ​ຕ້ອງການ​ທີ່​ຈຳ​ເປັນ ຂອງ​ບັນດາ​ຫົວໜ່ວຍ​ທຸລະ​ກິດ ​ແລະ ຜູ້​ປະກອບ​ການ​ຕ່າງໆ​ແລ້ວ, ຍັງ​ຈະ​ເຮັດ​ໃຫ້​ພາກ​ທຸລະ​ກິດ​ເຂົ້າ​ໃຈ​ນະ​ໂຍບາຍ, ທິດ​ທາງ​ຂອງ​ລັດຖະບານ ​ແລະ ນະຄອນຫລວງ​ວຽງ​ຈັນ ​ໂດຍ​ສະ​ເພາະ​ຂະ​ແໜງ​ການ​ຕ່າງໆ ​ແລະ ສ້າງ​ບັນຍາກາດ​ໃຫ້​ພາກ​ທຸລະ​ກິດ​ນ້ອຍ ​ແລະ ​ໃຫຍ່ ​ເຄື່ອນ​ໄຫວ​ເຕັມ​ກຳລັງ​ແຮງ ​ແລະ ຄວາມ​ຮັບຜິດຊອບ​ຂອງ​ຕົນ​ເອງ​ຮັບຜິດຊອບ ຢ່າງ​ໜ້ອຍ 3 ອັນ​ຄື: ບໍ່​ໃຫ້​ກິດຈະ ການ​ຂອງ​ຕົນ​ລົ້ມ​ລະລາຍ, ຮັບຜິດຊອບ​ຕໍ່​ແຮງ​ງານ (ກຳມະກອນ) ຂອງ​ຕົນ​ເອງ, ​ເສຍ​ພັນທະ​ພາສີ​ອາກອນ, ​ແຂ່ງຂັນ​ທຸລະ​ກິດ​ກັບ​ຂະ​ແໜງ​ການ​ດຽວ​ກັນ ທັງ​ພາຍ​ໃນ ​ແລະ ຕ່າງປະ​ເທດ, ພ້ອມນີ້, ຍັງ​ເປັນ​ການ​ສະໜັບສະໜູນສະພາ​ການ​ຄ້າ ​ແລະ ອຸດສາຫະກຳ ນະຄອນຫລວງ​ວຽງ​ຈັນ ​ໃຫ້​ເຕີບ​ໃຫຍ່ ​ເປັນ​ໃຈກາງ​ປະສານ​ງານ​ກັບ​ທຸກຂະ​ແໜງ​ການ​ຂອງ​ລັດ ​ແລະ ​ເຕົ້າ​ໂຮມ​ກຳລັງ​ແຮງ​ຂອງ​ພາກ​ທຸລະ​ກິດ ທີ່ຢູ່​ນະຄອນຫລວງ​ວຽງ​ຈັນ.

​ ໃນ​ກອງ​ປະຊຸມ​, ບັນດາ​ຜູ້​ເຂົ້າ​ຮ່ວມ​ ນອກຈາກ​ຈະ​ຮັບ​ຟັງ​ການ​ປະກອບ​ຄຳ​ຄິດ​ຄຳ​ເຫັນ​ ຂອງ​ຫົວໜ້າ​ພະ​ແນ​ກການຕ່າງໆຕໍ່​ການສະ​ເໜີ​ຂອງ​ພາກ​ທຸລະ​ກິດ​ແລ້ວ, ຍັງ​ຈະ​ໄດ້​ຮັບ​ຟັງ​ການ​ເຜີຍ​ແຜ່​ກ່ຽວ​ກັບ​ນະ​ໂຍບາຍ​ການ​ພັດທະນາ​ ນະຄອນຫລວງວຽງ​ຈັນ ​ເປັນ​ຕົ້ນ 6 ວິ​ໄສ​ທັດ​ການ​ພັດທະນາ ​ໄລຍະຮອດ​ປີ 2030, 6 ຍຸດ​ທະ​ສາດ​ການ​ພັດທະນາ​ຮອດ​ປີ 2025, ພ້ອມ​ທັງ 18 ​ຄວາມ​ໝາຍ​ໃຫຍ່​ດ້ານ​ການ​ພັດທະນາ​ເສດຖະກິດ-ສັງຄົມ ​ແຕ່​ປີ 2016-2020 ​ແລະ 6 ​ໂຄງການ​ບຸກທະລຸ ​ແລະ ບັນດາ​ໂຄງການ​ໃຫຍ່​ລະດັບ​ຊາດ ຢູ່ນະຄອນຫລວງ​ວຽງ​ຈັນ; ຮັບ​ຟັງ​ແນວທາງ​ການ​ແກ້​ໄຂ​ບັນຫາ​ທີ່​ສະ​ເໜີ​ຜ່ານ​ມາ​ທີ່​ຍັງ​ແກ້​ໄຂ​ບໍ່​ ໄດ້; ຈັບ​ມື​ແຂ່ງຂັນ​ຂອງ​ບັນດາ​ຫົວໜ່ວຍ​ວິ​ສາ​ຫະກິດ ພາຍ​ໃຕ້​ຄຳ​ຂວັນ ວິ​ສາ​ຫະກິດ 5 ດີ ຂອງ​ນະຄອນຫລວງ ຄື: ພັດທະນາ​ດີ, ນຳ​ໃຊ້​ແຮງ​ງານ​ລາວ-​ເຕັກ​ໂນ​ໂລ​ຊີ​ໃໝ່​ດີ, ຖື​ບັນຊີ​ຕາມ​ກົດໝາຍ​ດີ, ​ເສຍ​ພັນທະ​ດີ, ນຳ​ໃຊ້​ວັຖຸດິບ​ປະຢັດ ​ແລະ ຮັກສາ​ສິ່ງ​ແວດ​ລ້ອມ​ດີ.

ແຫລ່ງຂ່າວ: