ເປັນເລື່ອງຈິງທີ່ວ່າ ມີຜູ້ຍິງຈຳນວນຫລວງຫລາຍທີ່ບໍ່ມັກອ່ານສະຫລາກຜະລິດຕະພັນຄວາມງາມ ໂດຍສະເພາະຜະລິດຕະພັນບຳລຸງຜິວທີ່ມີຢູ່ຫລາຍປະເພດ ຊຶ່ງກໍ່ບໍ່ແມ່ນວ່າບໍ່ໃສ່ໃຈເລີຍ ແຕ່ມັກເປັນເລື່ອງຂອງຄວາມເຄີຍຊິນຫລາຍກວ່າ ແຖມຂະໜາດຕົວອັກສອນກໍ່ນ້ອຍຂະໜາດນັ້ນ ໃຜຈະໄປຢາກອ່ານແມ່ນບໍ່ ເຮັດໃຫ້ສາວ ໆຫລາຍຄົນກໍ່ເລືອກອ່ານແຕ່ວ່າ ໃຊ້ເມື່ອໃດ ປະລິມານເທົ່າໃດເທົ່ານັ້ນກໍເປັນອັນຈົບ

ແຕ່ທີ່ຈິງຍັງມີຂໍ້ມູນອີກເລື່ອງທີ່ໜ້າຮູ້ ແລະຍິ່ງຫາກທ່ານ ເຂົ້າໃຈກໍ່ຈະມີປະໂຫຍດຍິ່ງຂຶ້ນດ້ວຍກໍຄືເລື່ອງເປີເຊັນຂອງສ່ວນປະສົມຕ່າງໆນັ້ນເອງ ຢ່າຟ້າວຫັນໜ້າໜີໂດຍຄິດວ່ານີ້ຄືວິຊາການແສນໜ້າເບື່ອ ເພາະມັນບໍ່ໄດ້ຍາກ ຂະໜາດນັ້ນເລີຍ ເມື່ອທ່ານເບິ່ງ ສະຫລາກ ຜະລິດຕະພັນແຕ່ລະແກ້ວ ຫລື ແຕ່ລະກະປຸກ ກໍຈະພົບວ່າມັນລະບຸສ່ວນປະສົມຫລວງຫລາຍເປັນສິບໆຢ່າງ ອາດບໍ່ຈຳເປັນທີ່ຈະຕ້ອງຮູ້ຈັກໝົດທຸກຕົວ ແຕ່ຂໍແນະນຳໃຫ້ເບິ່ງທີ່ເປີເຊັນເປັນຫຼັກ ເພາະນັ້ນຄືສິ່ງທີ່ຈະບອກໃຫ້ຮູ້ເຖິງລະດັບຄວາມເຂັ້ມຂົ້ນຂອງສ່ວນປະສົມນັ້ນໆ ຊຶ່ງຜູ້ຊ່ຽວຊານໃນວົງການຄວາມງາມບອກວ່າ ບໍ່ວ່າຈະເປັນຜະລິດຕະພັນໃດກໍຕາມ ສ່ວນປະສົມຕົວຫລັກທີ່ສຳຄັນທີ່ສຸດ, ມີປະລິມານສູງສຸດ, ມີສັດສ່ວນຄວາມເຂັ້ມຂົ້ນຫລາຍທີ່ສຸດ ແລະ ມີຄວາມແອັກທີຟສຸດໆ ຈະຖືກຈັດລຽງໄວ້ໃນລຳດັບຕົ້ນຂອງ ສະຫລາກ ສະເໝີ ແລ້ວຈຶ່ງຄ່ອຍໆຫຼຸດ ລົງໄປຕາມລຳດັບ

ສະນັ້ນຈຶ່ງຄວນໃຫ້ຄວາມສຳຄັນກັບສ່ວນປະສົມ 2-3 ລຳດັບທຳອິດໃຫ້ຫລາຍເປັນພິເສດ ເພາະມັນຈະມີຄວາມສຳພັນຕໍ່ຜິວໂດຍກົງ ບໍ່ວ່າຈະເປັນປະສິດທິພາບການເຮັດວຽກງານ ຫລືແມ່ນແຕ່ການກໍ່ໃຫ້ເກີດອາການແພ້ ຕໍ່ຜິວ ຊຶ່ງຫາກບໍ່ຮູ້ຈັກຊື່ຂອງສ່ວນປະສົມດີພໍ ກໍ່ສາມາດສອບຖາມຜູ້ຂາຍ ຫລື ຜູ້ຮູ້ໄດ້ຢູ່ແລ້ວ ແລ້ວຢ່າລືມຈົດຈຳດ້ວຍວ່າສ່ວນປະສົມຊະນິດໃດທີ່ ໄດ້ຜົນດີ ຫລື ບໍ່ດີສຳລັບຜິວທ່ານ ເພາະມັນຄືປະໂຫຍດທີ່ຈະໄດ້ຮັບໃນໄລຍະຍາວ