ມະຫາວິທະຍາໄລບຣິຕິດໂຄລຳເບຍ ໄດ້ເຜີຍແຜ່ຜົນສຳຫຼວດທົ່ວໂລກ ເມື່ອວັນຈັນທີ່ຜ່ານມາວ່າ ປະຊາຊົນທົ່ວໄປບໍ່ເຫັນດີກັບການໃຊ້ ອາວຸດທີ່ສາມາດລະບຸຕຳແໜ່ງ ແລະທຳລາຍເປົ້າໝາຍໄດ້ ໂດຍປາສະຈາກການສັ່ງການຂອງມະນຸດ.
ການສຳຫຼວດຈັດຂຶ້ນໂດຍ ກຸ່ມວິໄຈດ້ານຈະລິຍະສາດຫຸ່ນຍົນ (ORi) ເຊິ່ງມີຜູ້ຄົນຫຼາຍກວ່າ 1,000 ຄົນ ຈາກ 54 ປະເທດ ລວມທັງອາເມລິກາ, ການາດາ, ເກົາຫຼີໃຕ້ ແລະແມັກຊິໂກເຂົ້າຮ່ວມໃນການສຳຫຼວດ.
ຕາມຜົນການສຳຫຼວດລະບຸວ່າ ຫຼາຍກວ່າ 80% ຂອງຜູ້ໃຫ້ຂໍ້ມູນກ່າວວ່າ ຫຸ່ນຍົນບໍ່ຄວນຖືກໃຊ້ສຳລັບ ສ້າງເຫດຮຸນແຮງ ສ່ວນອີກ 67% ກ່າວວ່າ ຄວນມີຄຳສັ່ງຫ້າມໃຊ້ງານ ຫຸ່ນຍົນປະເພດນີ້ທົ່ວໂລກ.
ນອກຈາກນີ້ ຍັງມີ 71% ຂອງຜູ້ໃຫ້ຂໍ້ມູນກ່າວວ່າ ພວກເຂົາຕ້ອງການປະເທດຂອງຕົນ ໃຊ້ອາວຸດແບບສັ່ງການໃນໄລຍະໄກ ເຊັ່ນ ໂດຣນຂອງກອງທັບ ຫຼາຍກວ່າອາວຸດທີ່ສັງການໄດ້ເອງ ຢ່າງອິດສະລະ ແລະອີກ 56% ທີ່ກ່າວວ່າ ອາວຸດທີ່ສັງການດ້ວຍຕົນເອງ ບໍ່ຄວນໄດ້ຮັບການພັດທະນາ ຫຼືນຳໄປໃຊ້ປະຕິບັດງານໃດໆ.
“ຜົນສຳຫຼວດສະແດງໃຫ້ເຫັນຢ່າງຊັດເຈນ ວ່າຈຳເປັນຕ້ອງມີການອະພິປາຍຕໍ່ ສາທາລະນະຊົນທີ່ຫຼາຍຂຶ້ນ ເພື່ອໃຫ້ເຮົາສາມາດຕັດສິນໃຈໄດ້ ຢ່າງຊານສະຫຼາດກ່ຽວກັບເທັກໂນໂລຢີ ດ້ານອາວຸດແລະຫຸ່ນຍົນ ” AJung Moon ໂຄສົກຂອງ ORi ກ່າວ.
ຜົນສຳຫຼວດນີ້ຈະຖືກນຳສະເໜີ ໃນການປະຊຸມຂອງສະຫະປະຊາຊາດ ວ່າດ້ວຍອາວຸດຕາມແບບບາງຊະນິດ (CCW) ເຊິ່ງຈະຈັດຂຶ້ນໃນວັນທີ 12-13 ພະຈິກ ນີ້.
ພາບ-ຂ່າວ: ຊິນຫົວ