ໃນບໍ່ຈັກປີທີ່ຜ່ານມາເຮົາໄດ້ເຫັນພັດທະນາການຂອງຫຸ່ນຍົນທີ່ຈະເລີນໄປຫລາຍ ທັງຫຸ່ນຍົນທີ່ຍ່າງໃນທາງລຳບາກໄດ້ຢ່າງດີ ລົດທີ່ບໍ່ມີຄົນຂັບທີ່ໃກ້ຄວາມຈິງຂຶ້ນໄປທຸກມື້ ແລະ ມື້ນີ້ Yahama ໄດ້ເຜີຍວິດີໂອຂອງໂປຣເຈກພັດທະນາຫຸ່ນຍົນທີ່ຂັບຂີ່ລົດຈັກໄດ້ ຊຶ່ງນອກຈາກຄວາມສຸດຍອດຂອງວິດີໂອແລ້ວ ສິ່ງທີ່ໜ້າຕົກໃຈຄືສຽງເວົ້າຂອງຫຸ່ນຍົນໃນຕົວວິດີໂອນີ້ແຫລະ
I was created to surpass you
ຫລາຍຄົນອາດຈະບໍ່ຮູ້ວ່ານອກຈາກລົດຈັກ ແລະ ເຄື່ອງດົນຕີແລ້ວ Yamaha ຍັງພັດທະນາຫຸ່ນຍົນເພື່ອອຸດສາຫະກຳມາດົນກວ່າ 3 ທົດສະວັດແລ້ວ ແຕ່ການສ້າງຫຸ່ນຍົນທີ່ສາມາດຂີ່ລົດຈັກໄດ້ນັ້ນຊັບຊ້ອນກວ່າຫຸ່ນຍົນໃນໂຮງງານຫລາຍ ໂດຍສະເພາະການສ້າງເພື່ອຂັບຂີ່ Yamaha R1M ລົດຈັກທີ່ອອກແບບມາເພື່ອມະນຸດ ບໍ່ແມ່ນຂີ່ລົດຈັກທີ່ສ້າງຂຶ້ນໃໝ່ເພື່ອໃຫ້ຫຸ່ນຍົນຂີ່ໂດຍສະເພາະ
http://youtu.be/4asCK8yamb0
Motobot ຂອງ Yamaha ນັ້ນສາມາດຄວບຄຸມລົດໄດ້ 6 ຢ່າງຄື ລ້ຽວ ເລັ່ງ ເບຣກໜ້າ ເບຣກຫລັງ ບີບຄັດ ປ່ຽນເກຍ ໂດຍຮັບຂໍ້ມູນຈາກເຊນເຊີລ໌ຮອບຄັນລົດ ແລະ ລະບຸຕຳແໜ່ງດ້ວຍ GPS ທີ່ໜ້າສົນໃຈຄື Yamaha ພັດທະນາໃຫ້ Motobot ສາມາດພັດທະນາການຂັບຂີ່ໄດ້ດ້ວຍຕົວເອງ ຊຶ່ງເຮັດໃຫ້ການຂັບຂີ່ດີຂຶ້ນເລື້ອຍໆ ແລະໃຊ້ເວລາຕໍ່ຮອບໜ້ອຍລົງເລື້ອຍໆ
ພາຍໃນປີນີ້ Yamaha ຕັ້ງເປົ້າວ່າ Motobot ຈະສາມາດເຂົ້າໂຄ້ງ ແລ່ນຊິກແຊກໄດ້ ແລະເຮັດຄວາມໄວໃນທາງກົງໄດ້ 100 ກມ./ຊມ. ແລ້ວໃນປີ 2017 ກໍຄາດຫວັງວ່າ Motobot ຈະສາມາດລົງສະໜາມແທ້ ແລະເຮັດຄວາມໄວໄດ້ຫລາຍກວ່າ 200 ກມ./ຊມ. ເພື່ອໃຫ້ມີຄວາມສາມາດຫລາຍກວ່ານັກແຂ່ງມະນຸດ
Yamaha ບອກວ່າເປົ້າໝາຍໃນການສ້າງ Motobot ຄືເພື່ອພັດທະນາລະບົບຄວາມປອດໄພສຳລັບລົດຈັກແລະຍານພາຫະນະຕ່າງໆ ໃນປີ 2020 Yamaha ຫວັງວ່າຈະນຳເທກໂນໂລຍີຈາກ Motobot ມາໃສ່ໃນຜະລິດຕະພັນທີ່ວາງຈຳໜ່າຍ
ບໍ່ແນ່ ໄວໆນີ້ເຮົາອາດຈະໄດ້ເຫັນລົດຈັກທີ່ມີລະບົບຊ່ວຍຜູ້ຂັບຂີ່ຮັກສາສົມດຸນ ເຮັດໃຫ້ລົ້ມຍາກຂຶ້ນກໍເປັນໄດ້