ນັກວິໄຈອາເມຣິກາພົບວ່າ ການຢຸດຍັ້ງເອນໄຊບາງຢ່າງທີ່ປຸ່ມຮາກຜົມຊ່ວຍຟື້ນຟູການຈະເລີນເຕີບໃຫ່ຍຂອງເສັ້ນຜົມ ໄດ້ ນຳມາຊຶ່ງຄວາມຫວັງໃນການບັນເທົາອາການຜົມລົ່ນ ຫົວລ້ານໄດ້ໃນອະນາຄົດ
ການທົດລອງນີ້ເກີດຂຶ້ນກັບໜູ ໂດຍ ດຣ. ແອງເຈລາ ເອັມ. ຄິສະຕິອາໂນ ແລະທີມງານໄດ້ຄົ້ນພົບວ່າ ຢາທີ່ຊ່ວຍບັນເທົາເອນໄຊຕະກູນ Janus kinase (JAK) ຈະຊ່ວຍເລັ່ງການຈະເລີນເຕີບໃຫ່ຍຂອງເສັ້ນຜົມເມື່ອນຳຜົມໄປປູກກັບຜິວໜັງ
ການສຶກສາເທື່ອນີ້ຊ່ວຍເພີ່ມຄວາມເປັນໄປໄດ້ໃນການນຳຢາບັນເທົາ JAK ໄປຊ່ວຍຟື້ນຟູການຈະເລີນເຕີບໃຫ່ຍຂອງເສັ້ນຜົມໃນກຸ່ມຄົົນທີ່ເສຍເສັ້ນຜົມໄປຫລາຍຈາກພາວະ ຫົວລ້ານ ໂດຍຢາບັນເທົາ JAK ນີ້ມີ 2 ປະເພດໄດ້ຮັບການຮັບຮອງຈາກອົງການອາຫານແລະຢາ ສະຫະລັດອາເມຣິກາແລ້ວ ໂດຍມີປະເພດໜຶ່ງຖືກໃຊ້ໃນການຮັກສາພະຍາດທາງເລືອດ ແລະອີກປະເພດໜຶ່ງຄືໃຊ້ຮັກສາໄຂ້ລູມາຕອຍ ຢາທັງສອງປະເພດກຳລັງຖືກທົດສອບໃນເຊີງຄຣີນິກເພື່ອການຮັກສາພະຍາດສະເກັດເງີນແລະພະຍາດ ຜົມລົ່ນທີ່ເກີດຈາກລະບົບພູມຄຸ້ມກັນ
“ສິ່ງທີ່ເຮົາພົບຖືວ່າມີ ສັກກາຍະພາບຫລາຍ ເຖິງວ່າເຮົາຈະຍັງບໍ່ຮູ້ວ່າມັນມີປະສິດທິພາບສຳລັບການບັນເທົາອາການຫົວລ້ານໄດ້ ຫລືບໍ່ ຍັງມີຫລາຍເລື່ອງທີ່ຈະຕ້ອງເຮັດເພື່ອທົດສອບວ່າຢາບັນເທົາ JAK ນີ້ສາມາດນຳໄປໃຊ້ກັບໜັງຫົວໄດ້ຫລືບໍ່ ເພື່ອການເຮັດໃຫ້ການຈະເລີນເຕີບໃຫ່ຍຂອງເສັ້ນຜົມມະນຸດກັບມາອີກເທື່ອ”
ດຣ. ຄິ ສະຕິອາໂນ ແລະທີມງານ ໄດ້ຄົ້ນພົບຜົນກະທົບຂອງຢາບັນເທົາ JAK ກັບປຸ່ມຮາກຜົມໃນຂະນະທີ່ສຶກສາເລື່ອງພະຍາດຜົມລົ່ນ ຊຶ່ງເກີດຈາກການທີ່ລະບົບພູມຄຸ້ມກັນອັດຕະໂນມັດເຂົ້າໂຈມຕີປຸ່ມຮາກຜົມ ແລະເມື່ອປີທີ່ຜ່ານມາ ດຣ. ຄິສະຕິອາໂນ ແລະທີມງານໄດ້ລາຍງານວ່າ ການຢາບັນເທົາ JAK ຈະໄປປິດສັນຍານທີ່ກໍ່ໃຫ້ເກີດການໂຈມຕີຂອງພູມຄຸ້ມກັນອັດຕະໂນມັດ ແລະຢາບັນເທົາຊະນິດນີ້ປະເພດກິນນັ້ນສາມາດຊ່ວຍຟື້ນຟູການຈະເລີນເຕີບໃຫ່ຍຂອງເສັ້ນຜົມ ໃນຄົົນທີ່ເປັນພະຍາດນີ້ບາງຄົນໄດ້ອີກດ້ວຍ
ໃນການທົດລອງຕໍ່ມາ ດຣ. ຄິສະຕິອາໂນ ໄດ້ສັງເກດວ່າ ໜູຈະມີເສັ້ນຂົນຍາວຫລາຍຂຶ້ນເມື່ອໃຊ້ຢາທາເຂົ້າໄປທີ່ຜິວໜັງເມື່ອທຽບກັບໃຫ້ຢາໂດຍ ວິທີການກິນ ຊຶ່ງເປັນການບອກວ່າ ຢາບັນເທົາ JAK ອາດຈະມີຜົນກະທົບໂດຍກົງຕໍ່ປຸມຮາກຜົມ ໃນການບັນເທົາການໂຈມຕີຂອງພູມຄຸ້ມກັນ
ເມື່ອ ນັກວິໄຈເບີ່ງໄປທີ່ປຸ່ມຮາກຂົນຂອງໜູປົກກະຕິ ຈຶ່ງໄດ້ພົບວ່າ ຢາບັນເທົາ JAK ນັ້ນຄ່ອຍໆປຸກປຸ່ມຮາກຂົນທີ່ເສຍໄປໃຫ້ຕື່ນຂຶ້ນມາ ແຕ່ຢ່າງໃດກໍຕາມ ເສັ້ນຂົນນັ້ນກໍບໍ່ໄດ້ເຕີບໃຫ່ຍຢ່າງຕໍ່ເນື່ອງ ແຕ່ຈະໝຸນວຽນກັນໄປລະຫວ່າງສະຖານະຢຸດພັກກັບສະຖານະຈະເລີນເຕີບໃຫຍ
ນັກວິໄຈ ພົບວ່າ ຢາບັນເທົາ JAK ຊ່ວຍເຮັດໃຫ້ຂະບວນນີ້ກັບມາເປັນປົກກະຕິອີກເທື່ອ ແລະໜູທີ່ໄດ້ຮັບຢາບັນເທົາ JAK ນີ້ສາມາດກັບມາມີເສັ້ນຂົນໃໝ່ໄດ້ພາຍໃນ 10 ມື້ ຊ່ວຍເລັ່ງປຸ່ມຮາກຜົມໃຫ້ກັບມາສູ່ສະຖານະຈະເລີນເຕີບໃຫ່ຍ ແຕ່ໜູກຸ່ມຄວບຄຸມນັ້ນບໍ່ມີເສັ້ນຂົນຍາວອອກມາໃນໄລຍະເວລາທີ່ເທົ່າກັນເລີຍ
“ມີອົງປະກອບຫລາຍຢ່າງທີ່ຊ່ວຍຊຸກຍູ້ປຸ່ມຮາກຜົມໃຫ້ເຂົ້າສູ່ການຈະເລີນເຕີບໃຫ່ຍໄດ້ໄວ” ດຣ. ຄິສະຕິອາໂນ່ ອະທິບາຍ
ເປັນ ໄປໄດ້ວ່າຢາຕົວນີ້ທີ່ມີປະສິດທິພາບຫລາຍໃນການເລັ່ງໃຫ້ຂົນໜູຍາວ ຈະປະສົບຄວາມສຳເລັດແບບດຽວກັນໃນມະນຸດ ຊຶ່ງໜ້າຈະຖືກນຳໄປໃຊ້ເພື່ອເລັ່ງການເຕີບໃຫ່ຍຂອງເສັ້ນຜົມໃໝ່ແລະເສັ້ນຜົມທີ່ມີຢູ່ ໃນອະນາຄົດ