ຄະນະຮັບຜິດຊອບໂຄງການປະກວດນາງສາວລາວ 2015 ໄດ້ໃຫ້ສຳພາດຕໍ່ນັກຂ່າວໜັງສືພິມລາວພັດທະນາ ເມື່ອວັນທີ 20 ຕຸລານີ້, ຕໍ່ກັບກໍລະນີທີ່ມີກະແສວິພາກວິຈານ ຈາກມວນຊົນຢ່າງຫລວງຫລາຍວ່າ : ຕົ້ນອາທິດຜ່ານມານີ້ ກອງປະກວດນາງສາວລາວ 2015, ໄດ້ຈັດການຄັດເລືອກຮອບທີ 2 ຂຶ້ນ, ເຊິ່ງມີສາວງາມຈາກທົ່ວປະເທດເຂົ້າຮ່ວມ 39 ຄົນ, ມີຄະນະກຳມະການ 5 ທ່ານເຂົ້າຮ່ວມຕັດສິນໃນຮອບດັ່ງກ່າວ, ເພື່ອເລືອກເອົາສາວງາມ 20 ຄົນສຸດທ້າຍເຂົ້ານັ້ນ ບໍ່ຍຸຕິທຳ, ບາງຄົນງາມແຕ່ບໍ່ໄດ້ຮັບຮັບການຄັດເລືອກ ແລະ ອື່ນໆ ເຊ່ິງຕໍ່ບັນຫານີ້ຮອບຊີງຊະນະເລີດ ທາງຄະນະກຳມະການໄດ້ຢືນຢັນວ່າ: ໄດ້ມີການຄັດເລືອກ ແລະ ຕັດສິນດ້ວຍຄວາມຍຸຕິທຳ ແລະ ໃຫ້ຄະແນນຕາມເງື່ອນໄຂທຸກຂັ້ນຕອນ, ພ້ອມທັງປະຕິບັດຕາມລະບຽບການທີ່ເຄີຍເຮັດຜ່ານມາໃນທຸກໆປີຕາມມາດຕະຖານ ຄວາມສູງ, ຄວາມງາມ, ບຸກຄະລິກດີ, ຄວາມຮູ້, ຄວາມສາມາດ, ມະນຸດສຳພັນດີ ແລະ ນອກຈາກນີ້ ສາວງາມ ຍັງຕ້ອງມີຄວາມສາມາດຕອບຄຳຖາມທີ່ທາງຄະນະກຳມະການຕັ້ງຂຶ້ນ ເພື່ອຊ່ວຍໃຫ້ການຄັດເລືອກເອົານາງສາວງາມ ທັງ 20 ຄົນໄດ້ດີຂຶ້ນຕື່ມ ແລະ ຄະນະກຳມະການໃຫ້ຮູ້ອີກວ່າ: ສາວງາມທັງ 20 ຄົນທີ່ຜ່ານເຂົ້າຮອບສຸດທ້າຍນີ້ ແມ່ນມີຄວາມສາມາດ ແລະ ເໝາະສົມທີ່ຈະຜ່ານເຂົ້າຮ່ວມສຸດທ້າຍຫລາຍທີ່ສຸດ ແລະ ການຄັດເລືອກຄັ້ງນີ້ ແມ່ນເລືອກດ້ວຍຄວາມເປັນທຳ ແລະ ບໍ່ມີໄດ້ມີການຊື້ຈ້າງໃດໆທັງສິ້ນ.
ໃນໄລຍະນີ້ ສາວງາມຈຳນວນ 20 ຄົນ ແມ່ນໄດ້ເກັບໂຕເຮັດກິດຈະກຳຮ່ວມກັບກອງປະກວດຢ່າງຕໍ່ເນື່ອງເປັນຕົ້ນ ການຖ່າຍຮູບໂພດເຕີ້ ຢູ່ເດີ່ນພະທາດຫລວງ, ຖ່າຍວີທີອາ ແນະນຳຕົນເອງ ຢູ່ສະໜາມກ໋ອບ ແລະ ຈະໄດ້ເດີນທາງໄປຢ້ຽມຢາມສະຖາບັນການສຶກສາ, ສະຖານທີ່ສັກສິດ ແລະ ສຳຄັນຕ່າງໆນະຄອນຫລວງວຽງຈັນ, ພ້ອມໄດ້ນຳພາສາວງາມທັງ 20 ຄົນລົງໄປຢ້ຽມຢາມສວນກາເຟ ທີ່ແຂວງຈຳປາສັກ ແລະ ຈະມີການຝຶກຊ້ອມຍ່າງຢູ່ເທີງເວທີ, ບຸກຄະລິກໃນການວາງໂຕ, ການເວົ້າຈາ, ການແຕ່ງໜ້າດ້ວຍຕົນເອງ ແລະ ໃນອາທິດສຸດທ້າຍຈະມີການເກັບໂຕ ເພື່ອກຽມຄວາມພ້ອມໃຫ້ການປະກວດຮອບສຸດທ້າຍເຊ່ິງຈະຈັດຂຶ້ນໃນທ້າຍເດືອນພະຈິກນີ້.
ສຳລັບການສົ່ງກຳລັງໃຈ ແລະ ໂຫວດໃຫ້ຄະແນນສາວງາມທັງ 20 ຄົນດັ່ງກ່າວໄດ້ໂດຍການ ພິມ M ຕາມດ້ວຍໝາຍເລກຂອງນາງສາວ ແລ້ວສົ່ງໄປເບີ 1481 ຂອງເຄືອຂ່າຍລາວໂທລະຄົມ ແລະ ອີທີເອວໄດ້ທຸກເວລາ ແລະ ຕິດຕາມການເຄື່ອນໄຫວຂອງ ເຂົາເຈົ້າໄດ້ທີ່ເຟສບຸກ ໂດຍການພິມຄຳວ່າ: ນາງສາວລາວ Miss laos 2015.
ແຫລ່ງຂ່າວ:
