ຂປລ. ການຈັດຕັ້ງປະຕິບັດ ໂຄງການປະຕິສັງຂອນ ຫໍພະແກ້ວ ຄັ້ງທີ III ແຕ່ເດືອນ ກຸມພາ-ກັນຍາ 2015 ມີຫລາຍໜ້າວຽກ ທີ່ໄດ້ຮັບການຈັດຕັ້ງ ປະຕິບັດ ແລະ ສຳເລັດໂດຍພື້ນຖານ ເປັນຕົ້ນ: ວຽກຮື້ຖອນ ແລະ ສ້ອມແປງຄືນຫລັງຄາ, ຮື້ຖອນເພດານ ແລະ ສ້ອມແປງຄືນ, ສ້ອມແປງປະຕູ, ວຽກອະນາໄມ, ທາສີຝາ ແລະ ແອວຂັນ. ຄວາມຄືບໜ້າດັ່ງກ່າວ ໄດ້ຮັບການລາຍງານຈາກ ໜ່ວຍງານບໍລິຫານຄຸ້ມຄອງ ແລະ ກອງເລຂາໂຄງການ ໃນກອງປະຊຸມ ທີ່ຈັດຂຶ້ນທ້າຍອາທິດຜ່ານມາ, ໂດຍການເປັນປະທານຂອງ ທ່ານ ສາຍທອງ ແກ້ວດວງດີ ຮອງເຈົ້າຄອງ ນະຄອນຫລວງວຽງຈັນ, ພະອາຈານ ເວດ ມະເສໄນ ຮອງປະທານອົງການ ພຸດທະສາສະໜາສູນກາງ, ທ່ານ ຄຳປະດິດ ເຂັມມານິດ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ.
ສ່ວນໜ້າວຽກ ທີ່ຈະຕ້ອງໄດ້ສືບຕໍ່ປະຕິບັດ ໄລຍະແຕ່ເດືອນ ຕຸລາ-ທັນວາ 2015 ນີ້ ປະກອບມີ: ສືບຕໍ່ມຸງດິນຂໍ, ເຮັດດອກດວງເພດານ ດ້ານໃນ-ດ້ານນອກ, ຮື້ ແລະ ສ້ອມແປງພື້ນຂັ້ນໄດປະຕູ ແລະ ວຽກງານອື່ນໆ ອີກຈຳນວນໜຶ່ງທີ່ຍັງເຫລືອ ເຊິ່ງຄາດວ່າຈະໃຫ້ສຳເລັດ ຕາມແຜນການທີ່ວາງໄວ້./.
ທີ່ມາ ຂ່າວສານປະເທດລາວ https://www.facebook.com/421087478095038/photos/a.421545928049193.1073741829.421087478095038/439578499579269/?type=3&theater
