ເຊື່ອວ່າຫລາຍໆ ຄົນຕ່າງກໍເບິ່ງແຍງເອົາໃຈໃສ່ ໃຫ້ຄວາມຮັກ iPhone ຄືລູກຄືຫລານ ແຕ່ກໍບໍ່ແມ່ນທຸກຄົົນທີ່ຈະຮັກ iPhone ຢ່າງຖືກວິທີ ບາງສິ່ງທີ່ເຮົາເຮັດເປັນປົກກະຕິກໍອາດສົ່ງຜົນຮ້າຍຕໍ່ iPhone ໄດ້ຢ່າງຄາດບໍ່ເຖິງ ແລະ ເຄື່ອງ iPhone ຂອງທ່ານອາດຈາກໄປກ່ອນໄວອັນຄວນ
ໃນມື້ນີ້ເຮົາຈຶ່ງຂໍນຳສະເໜີບົດສະຫລຸບ 11 ພຶດຕິກຳທີ່ເປັນການທຳຮ້າຍ iPhone ເພື່ອທີ່ວ່າທຸກທ່ານທີ່ໃຊ້ iPhone ຈະໄດ້ພະຍາຍາມຫລີກລ້ຽງພຶດຕິກຳເຫລົ່ານີ້ ແລະ ຈະຊ່ວຍໃຫ້ iPhone ສຸດຮັກຂອງທ່ານຢູ່ກັບທ່ານໄປໄດ້ດົນໆ
1. ບໍ່ເຄີຍປິດເຄື່ອງໄອໂຟນເລີຍ
ແທ້ໆແລ້ວໃນໜຶ່ງອາທິດເຮົາຄວນປິດເຄື່ອງຢ່າງໜ້ອຍ 1 ເທື່ອ ເພາະການເປີດເຄື່ອງໄອໂຟນຖິ້ມໄວ້ຕະຫລອດເວລາກໍສົ່ງຜົນຕໍ່ອາຍຸການໃຊ້ງານຂອງແບດເຕີຣີ່ ຊຶ່ງມີຜູ້ຊ່ຽວຊານກ່າວວ່າ ຫາກເຈົ້າຊື້ສະມາດໂຟນມາແລ້ວໃຊ້ຄືກັບເປັນໂມງປຸກ ກໍຄວນຢຸດແລ້ວຫາຊື້ໂມງປຸກຖືກໆ ຈັກອັນມາໃຊ້ຈະດີກວ່າ ຫລືເລືອກເວລາໃນການປິດເຄື່ອງເປັນໄລຍະອື່ນຂອງມື້ແທນ
2. ເປີດ Wi-Fi ກັບ Bluetooth ໄວ້ຕະຫລອດເວລາ
ການເປີດ Wi-Fi ກັບ Bluetooth ຢ່າງໃດຢ່າງໜຶ່ງ ຫລືທັງຄູ່ໄວ້ໂດຍທີ່ບໍ່ໄດ້ໃຊ້ຕະຫລອດເວລານັ້ນ ເປັນການໃຊ້ພະລັງງານໄປຢ່າງສິ້ນເປືອງ ບໍ່ຄວນເປີດຖິ້ມໄວ້ເພາະເຜື່ອວ່າຈະຕ້ອງໃຊ້ ຄວນເປີດໃຊ້ເມື່ອມີຄວາມຈຳເປັນແທ້ໆ ຈະດີກວ່າ
3. ໃຊ້ໄອໂຟນໃນສະພາບອາກາດທີ່ບໍ່ພໍເໝາະ
ຕ້ອງຄຳນືງໄວ້ຕະຫລອດວ່າ ໄອໂຟນນັ້ນບໍ່ໄດ້ຖືກອອກແບບມາໃຫ້ທົນຕໍ່ສະພາບອາກາດທີ່ຮ້ອນຫລາຍ ຫລືໜາວຫລາຍ ຈຶ່ງບໍ່ຄວນໃຊ້ໄອໂຟນໃນສະພາບອາກາດທີ່ມີອຸນຫະພູມຕ່ຳກວ່າ 0 ອົງສາ ຫລືອຸນຫະພູມສູງກວ່າ 35 ອົງສາ ເພາະຈະມີຜົນຕໍ່ການເຮັດວຽກງານຂອງແບດເຕີຣີ່ ແລະ ອາດສົ່ງຜົນໃຫ້ເຄື່ອງດັບຊົ່ວຄາວ ເພາະສະນັ້ນຫາກຮູ້ຕົວວ່າຈະຕ້ອງໄປຢູ່ໃນທີ່ໆມີອາກາດແບບນີ້ແລ້ວຄວນປິດ ແລະ ເກັບໄອໂຟນໄວ້ໃນກະເປົາຈະເປັນການດີທີ່ສຸດ
4. ສຽບສາກຈະແບດເຕີຣີ່ຄ້າງໄວ້ທັງຄືນ
ການສຽບໄອໂຟນສາກໄວ້ຕອນເຮົານອນຫລັບ ຟັງເບິ່ງໜ້າຈະເປັນວິທີທີ່ດີ ແຕ່ແທ້ໆແລ້ວການສຽບສາກໄວ້ຫລັງຈາກແບດເຕີຣີ່ເຕັມ 100 ເປີເຊັນ ຖືເປັນການທຳຮ້າຍແບດເຕີຣີ່ທາງອ້ອມ ສົ່ງຜົນໃຫ້ແບດເຕີຣີ່ໝົດໄວຂຶ້ນ ການສາກທີ່ຖືເປັນການຮັກສາແບດເຕີຣີ່ຄືຖອດສາຍສາກອອກກ່ອນທີ່ຈະເຕັມ
5. ສາກແບດເຕີຣີ່ໄວ້ເຕັມ 100% ຕະຫລອດ ຫລືໃຊ້ແບດເຕີຣີ່ຈົນໝົດກ້ຽງ
Shane Broesky ຜູ້ກໍ່ຕັ້ງບໍລິສັດ Farbe Technik ທີ່ຜະລິດອຸປະກອນສາກແບດເຕີຣີ່ ໄດ້ກ່າວໄວ້ວ່າ ແບດເຕີຣີ່ແບບ Lithium (ຊຶ່ງເປັນຊະນິດຂອງແບດເຕີຣີ່ທີ່ຖືກນຳມາໃຊ້ໃນເຄື່ອງໄອໂຟນ) ຈະມີປະສິດທິພາບໃນການເຮັດວຽກທີ່ດີທີ່ສຸດ ຫາກແບດເຕີຣີ່ມີປະລິມານຂອງປະຈຸໄຟຟ້າຢູ່ໃນໄລຍະປະມານ 50-80 ເປີເຊັນ ແລະ ໃນທາງກັບກັນການທີ່ເຮົາໃຊ້ແບດເຕີຣີ່ຈົນໝົດກ້ຽງນັ້ນ ອາດເຮັດໃຫ້ແບດເຕີຣີ່ຕ້ອງຕົກຢູ່ໃນສະຖານະທີ່ເອີ້ນວ່າ Deep Discharge State ຊຶ່ງ ສົ່ງຜົນໃຫ້ຕົວເກັບປະຈຸໄຟຟ້າໃນແບດເຕີຣີ່ບໍ່ສາມາດເຮັດວຽກໄດ້ ດັ່ງນັ້ນທາງທີ່ດີຄືໃຫ້ພະຍາຍາມສາກແບດເຕີຣີ່ພຽງແຕ່ໄລຍະເວລາສັ້ນໆ ຫລືພຽງແຕ່ຊ່ວງໄລຍະເວລາໜຶ່ງ ເພື່ອໃຫ້ປະຈຸໄດ້ຮັບພະລັງງານທີ່ພໍດີສຳລັບການນຳໄປໃຊ້ງານ ແລະ ເພື່ອເປັນການຮັກສາແບດເຕີຣີ່ອີກດ້ວຍ
6. ບໍ່ໃຊ້ແນວສາກແບດເຕີຣີ່ຂອງແທ້ຈາກ Apple
ຫລາຍຄົນອາດຈະເບີ່ງວ່າບ່ອນສາກແບດເຕີຣີ່ຂອງ Apple ມີລາຄາແພງ ຈຶ່ງບໍ່ຊື້ມາໃຊ້ ເລືອກທີ່ຈະຊື້ຂອງປອມມາໃຊ້ແທນ ແທ້ໆແລ້ວຄວນໃຊ້ອຸປະກອນແທ້ ຫາກໃຊ້ຂອງໂນເນມອາດສົ່ງຜົນຮ້າຍຕໍ່ແບດເຕີຣີ່ ແລະ ອາດເຖິງຂັ້ນລະເບີດໄດ້ເລີຍ ຊຶ່ງເຮັດໃຫ້ Apple ໄດ້ຕັ້ງໂຄງການ USB Power Adapter Takeback ຂຶ້ນ ຊຶ່ງເປັນໂຄງການທີ່ໃຫ້ນຳແນວສາກແບດເຕີຣີ່ຂອງປອມມາເປັນສ່ວນຫລຸດໃນການຊື້ແນວສາກແບດເຕີຣີ່ຂອງແທ້ຈາກ Apple
ປຽບທຽບລະຫວ່າງແນວສາກແບດເຕີຣີ່ຂອງແທ້ (ດ້ານຊ້າຍ) ກັບແນວສາກແບດເຕີຣີ່ຂອງປອມ (ດ້ານຂວາ)
7. ບໍ່ເຄີຍເຮັດຄວາມສະອາດຕົວເຄື່ອງເລີຍ
ຮູ້ຫລືບໍ່ວ່າໃນໄອໂຟນຂອງເຮົາມີຝຸ່ນ ແລະ ເຊື້ອພະຍາດຫລາຍກວ່າທີ່ຄິດ ເວົ້າໄດ້ວ່າຝຸ່ນ ເຊື້ອພະຍາດທີ່ຢູ່ໃນຫ້ອງນ້ຳ ຫລືແມ່ນແຕ່ໃນຊາມເຂົ້າສັດລ້ຽງຍັງມີໜ້ອຍກວ່າທີ່ຢູ່ໃນໄອໂຟນຕົວນ້ອຍຂອງເຮົາອີກ ຊຶ່ງທາງ Apple ໄດ້ອອກມາແນະນຳໃຫ້ໃຊ້ Lint-Free Cloth ຫລື ຜ້າໄຮ້ຝຸ່ນໃນການເຮັດຄວາມສະອາດເຄື່ອງ ແລະ ທີ່ສຳຄັນຫ້າມລືມເຮັດຄວາມສະອາດບ່ອນສຽບສາກແບດ ເພາະມັກຈະມີເສດຂີ້ເຫຍື້ອ ຫລືຝຸ່ນຈາກກະເປົາເສື້ອ ກະເປົາໂສ້ງເຂົ້າໄປຕິດຢູ່ເປັນຈຳນວນຫລາຍ ອາດຈະເຮັດໃຫ້ເກີດບັນຫາໃນການເຊື່ອມຕໍ່ຕ່າງໆໄດ້ ຄວນໃຊ້ໄມ້ຈິ້ມແຂ້ວ ເຂັມຫຍິບຜ້າ ຫລືແມ່ນແຕ່ກ້ານຕ່າງຫູໃນການແຄະສິ່ງເປິະເປື້ອນຢູ່ໃນອອກມາ
8. ຍ່າງຖືໄອໂຟນໂດຍບໍ່ລະມັດລະວັງຮອບຂ້າງ
ບໍ່ແປກໃຈຫາກຮູ້ວ່າໄອໂຟນ ຖືເປັນສິນຄ້າຍອດນິຍົມໃນຕະຫລາດມືດທັງຫລາຍ ແລະ ເປັນເປົ້າໝາຍຫລັກຂອງກຸ່ມໂຈນຕ່າງໆ ຊຶ່ງຄະນະກຳມະການກາງກຳກັບເບິ່ງແຍງກິດຈະການສື່ສານຂອງປະເທດສະຫາລັດອະເມຣິກາ (FCC) ລາຍງານວ່າໃນປີ 2013 ຕາມເມືອງໃຫຍ່ຕ່າງໆ ນັ້ນມີຄະດີກ່ຽວກັບການປຸ້ນຊິງສະມາດໂຟນປະມານຮ້ອຍລະ 40 ຊຶ່ງຖືເປັນອັດຕາທີ່ສູງຫລາຍ ຈຶ່ງຄວນລະມັດລະວັງໃນການໃຊ້ສະມາດໂຟນຂະນະຍ່າງໃນທີ່ສາທາລະນະໃຫ້ຫລາຍຂຶ້ນ
9. ບໍ່ຕັ້ງລະຫັດລັອກໜ້າຈໍ
Apple ລາຍງານວ່າເກືອບເຄິ່ງຂອງຈຳນວນຜູ້ໃຊ້ໄອໂຟນບໍ່ໄດ້ຕັ້ງລະຫັດລັອກໜ້າຈໍ (Passcode) ໄວ້ ຫາກເຈົ້າບໍ່ໄດ້ຕັ້ງລະຫັດໄວ້ ແລະ ເມື່ອໄອໂຟນຖືກລັກໄປ ໂຈນຈະສາມາດນຳຂໍ້ມູນສ່ວນຕົວທຸກຢ່າງຂອງເຈົ້າໄປໃຊ້ໃນທາງບໍ່ດີໄດ້ ຊຶ່ງການຕັ້ງລະຫັດລັອກໜ້າຈໍນັ້ນຖືເປັນໜຶ່ງໃນວິທີປ້ອງກັນທີ່ເຮັດໄດ້ງ່າຍທີ່ສຸດ
10. ເປີດ GPS ໃຫ້ຮູ້ຕຳແໜ່ງທີ່ຕັ້ງທຸກແອບພິເຄຊັນຢູ່ຕະຫລອດເວລາ
ແອບພິເຄຊັນຢ່າງ Uber ຫລື Maps ນັ້ນຈຳເປັນຕ້ອງເປີດການໃຊ້ງານ “Location Services” ເພື່ອໃຫ້ບາງຟັງຊັ່ນນັ້ນເຮັດວຽກໄດ້ຢ່າງເຕັມປະສິດທິພາບ ແລະ ຈະມີການແຈ້ງເຕືອນດ້ວຍວ່າຈະຕ້ອງໃຊ້ຕອນໃດ ໃນຂະນະທີ່ເມື່ອໃຊ້ຟັງຊັ່ນອື່ນໆ ບໍລິການນີ້ບໍ່ຈຳເປັນຕ້ອງໃຊ້ກໍໄດ້ ຈຶ່ງຄວນຕັ້ງຄ່າປິດ “Location Services” ໄວ້ຕະຫລອດເວລາ ເພື່ອເປັນການຮັກສາແບດເຕີຣີ່ໄປໃນຕົວອີກດ້ວຍ
11. ຕັ້ງຄ່າໃຫ້ທຸກແອບພິເຄຊັ່ນແຈ້ງເຕືອນຢູ່ຕະຫລອດເວລາ
ການຕັ້ງຄ່າໃຫ້ທຸກແອບພິເຄຊັນມີການແຈ້ງເຕືອນຢູ່ຕະຫລອດເວລາ ເປັນການເຮັດໃຫ້ໄອໂຟນເຮັດວຽກໜັກຕະຫລອດເວລາ ເພາະຕ້ອງຄອຍຖ້າອັບເດດໃຫ້ຂໍ້ມູນເປັນປະຈຸບັນສະເໝີ ຊຶ່ງເຮັດໃຫ້ແບດເຕີຣີ່ໝົດໄວ ເນື່ອງຈາກໜ້າຈໍຈະຕິດທຸກເທື່ອທີ່ມີການແຈ້ງເຕືອນຕ່າງໆເຂົ້າມາ ແລະ ຈຶ່ງຄວນເລືອກໃຫ້ມີການແຈ້ງເຕືອນສະເພາະແອບພິເຄຊັນທີ່ສຳຄັນໆເທົ່ານັ້ນ
ຈາກ 11 ພຶດຕິກຳທຳຮ້າຍໄອໂຟນຂ້າງຕົ້ນ ຫາກເຮົາໃສ່ໃຈ ກໍຄືຊິບໍ່ຍາກເກີນໄປທີ່ຈະຫລີກລ້ຽງພຶດຕິກຳເຫລົ່ານີ້ ຊຶ່ງຫາກຫລີກລ້ຽງໄດ້ ກໍຈະຊ່ວຍໃຫ້ເຄື່ອງໄອໂຟນສຸດຮັກສຸດຫວງຂອງເຮົາໃຊ້ງານໄດ້ຢ່າງເຕັມປະສິດທິພາບໄປ ໄດ້ດົນແສນດົນ ບໍ່ດ່ວນຈາກໄປກ່ອນໄວອັນຄວນ ແລະ ຖ້າຈະໃຫ້ດີກໍຢ່າລືມແບ່ງປັນ ຫລືບອກຕໍ່ເລື່ອງລາວທີ່ມີປະໂຫຍດເຫລົ່ານີ້ກັບໝູ່ຊາວໄອໂຟນຂອງເຈົ້ານຳ