spot_img
Homeຂ່າວພາຍ​ໃນການລົງທຶນຂະຫຍາຍຕົວ ແຕ່ຫຼາຍໂຄງການຍັງປະສົບບັນຫາ

ການລົງທຶນຂະຫຍາຍຕົວ ແຕ່ຫຼາຍໂຄງການຍັງປະສົບບັນຫາ

Published on

ການລົງທຶນຂະຫຍາຍຕົວ ແຕ່ຫຼາຍໂຄງການຍັງປະສົບບັນຫາ

ການ​ດຶງ​ດູດ​ການ​ລົງທຶນ​ໃນ​ໄລຍະ 1 ປີ (2012-2013) ສາມາດ​ດຶງ​ດູດ​ນັກ​ລົງທຶນ​ຈາກ​ພາຍ​ໃນ ແລະ ຕ່າງປະເທດ​ໄດ້​ທັງ​ໝົດ 52 ໂຄງການ ໃນ 7 ຂະແໜງການ ມູນ​ຄ່າ​ການ​ລົງທຶນ​ທັງ​ໝົດ 3 ຕື້​ໂດ​ລາ​ສະຫະລັດ ຫຼື ປະມານ 24.000 ຕື້​ກີບ ໃນ​ນັ້ນ ຂະແໜງ​ໄຟຟ້າ​ເປັນ​ອັນ​ດັບ 1 ໃນ​ການ​ລົງທຶນ​ຫຼາຍ​ກວ່າ​ທຸກ​ຂະແໜງການ ຂະນະ​ທີ່​ຫຼາຍ​ໂຄງການ​ຕ້ອງ​ພົບ​ກັບ​ບັນຫາ​ດ້ານ​ທຶນຮອນ.

ອີງ​ຕາມ​ບົດ​ລາຍ​ງານ​ການຈັດຕັ້ງ​ປະຕິບັດ​ວຽກ​ງານ​ສົ່ງເສີມ​ການ​ລົງທຶນ 1 ປີຜ່ານມາ ກໍ​ຄື​ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ຄຳ​ສັ່ງ​ເລກ​ທີ 13/​ນຍ ເຫັນ​ໄດ້​ວ່າ: ການ​ດຶງ​ດູດ​ການ​ລົງທຶນ​ປີ​ນີ້ ມີ​ທ່າ​ອ່ຽງ​ເພີ່ມ​ຂຶ້ນ ຖ້າ​ທຽບໃສ່​ໄລຍະ​ດຽວ​ກັນ​ຂອງ​ສົກ​ປີຜ່ານມາ ມູນ​ຄ່າ​ການ​ລົງທຶນ​ເພີ່ມ​ຂຶ້ນ​ເຖິງ 5,1% ແລະ ຖ້າ​ທຽບໃສ່​ແຜນການ​ປີ​ທີ່​ໄດ້​ຄາດ​ໄວ້ ຈະ​ດຶງ​ດູດ​ການ​ລົງທຶນ​ພາກ​ເອກະ​ຊົນ​ໃຫ້​ໄດ້​ສະເລ່ຍ​ບໍ່​ຫຼຸດ 1,7 ຕື້​ໂດ​ລາ​ສະຫະລັດ ຫຼື ປະມານ 13.600 ຕື້​ກີບ ຈະ​ເຫັນ​ໄດ້​ວ່າ​ໃນ​ສົກ​ປີ 2012-2013 ສາມາດ​ປະຕິບັດ​ໄດ້​ເກີນ​ເທົ່າ​ໂຕ ຄື​ສາມາດ​ປະຕິບັດ​ໄດ້​ລື່ນ​ຄາດໝາຍ​ເຖິງ 79%.

ສຳລັບ​ການ​ລົງທຶນ​ທີ່​ມີ​ມູນ​ຄ່າ​ຫຼາຍ​ທີ່​ສຸດ ແມ່ນ​ຂະແໜງ​ໄຟຟ້າ ມີ​ມູນ​ຄ່າ​ການ​ລົງທຶນ​ເຖິງ 1,65 ຕື້​ໂດ​ລາ​ສະຫະລັດ ຫຼື ປະມານ 13.200 ຕື້​ກີບ ຊຶ່ງ​ໂຄງການ​ທີ່​ພົ້ນ​ເດັ່ນ​ກວ່າ​ໝູ່​ແມ່ນ​ບໍລິສັດ ໄຟຟ້າ​ນ້ຳ​ງຽບ 1 ຈຳກັດ ມູນ​ຄ່າ​ການ​ລົງທຶນ​ເຖິງ 686 ລ້ານ​ໂດ​ລາ​ສະຫະລັດ ຫຼື ປະມານ 5.400 ຕື້​ກີບ ອັນ​ດັບ 2 ແມ່ນ​ຂະແໜງ​ບໍ່​ແຮ່ ມີ 37 ໂຄງການ ມູນ​ຄ່າ​ການ​ລົງທຶນ​ທັງ​ໝົດ 1,09 ຕື້​ໂດ​ລາ​ສະຫະລັດ ຫຼື ປະມານ 8.700 ຕື້​ກີບ ອັນ​ດັບ 3 ຂະແໜງການ​ໂຮງແຮມ ແລະ ຮ້ານ​ອາຫານ ມູນ​ຄ່າ​ການ​ລົງທຶນ​ທັງ​ໝົດ 110 ລ້ານ​ໂດ​ລາ​ສະຫະລັດ ຫຼື ປະມານ 880 ຕື້​ກີບ ແລະ ຂະແໜງການ​ອື່ນໆ ສ່ວນ​ການ​ລົງທຶນ​ແມ່ນ​ມາ​ຈາກ 12 ປະເທດ ເຊັ່ນ: ​ສປ.ຈີນ ເປັນ​ອັນ​ດັບ 1 ທີ່​ມີ​ມູນ​ຄ່າ​ການ​ລົງທຶນ​ເຖິງ 1,33 ຕື້​ໂດ​ລາ​ສະຫະລັດ ຫຼື ປະມານ 10.600 ຕື້​ກີບ ຮອງ​ລົງ​ມາ​ແມ່ນ​ການ​ລົງທຶນ​ພາຍ​ໃນ​ເອງ ມີ​ເຖິງ 530 ລ້ານ​ໂດ​ລາ​ສະຫະລັດ ຫຼື ປະມານ 4.200 ຕື້​ກີບ ແລະ ອັນ​ດັບ 3 ແມ່ນ​ການ​ລົງທຶນ​ຈາກ​ໄທ ມູນ​ຄ່າ​ການ​ລົງທຶນ 416 ລ້ານ​ໂດ​ລາ​ສະຫະລັດ ຫຼື ປະມານ 3.300 ຕື້​ກີບ ແລະ ປະເທດ​ອື່ນໆ​ຕາມ​ລຳດັບ.

ເຖິງ​ແມ່ນ​ວ່າ​ຕົວ​ເລກ​ການ​ລົງທຶນ​ໄດ້​ຮັບ​ການ​ຂະຫຍາຍຕົວ​ເປັນ​ຢ່າງ​ດີ ແຕ່​ຍັງ​ມີ​ບາງ​ໂຄງການ​ທີ່​ໄດ້​ເຊັນ​ສັນຍາ ຫຼື ອະນຸມັດ​ໄປ​ແລ້ວ ບໍ່​ໄດ້​ຈັດ​ຕັ້ງ​ປະຕິບັດ​ຕາມ​ກຳນົດ​ເວລາ ອັນ​ເນື່ອງ​ມາ​ຈາກ​ຜູ້​ລົງທຶນ​ຂາດທຶນ​ຮອນ ແລະ ປະສົບ​ການ​ບາງ​ຈຳນວນ​ກໍ​ບໍ່​ມີ​ລັກສະນະ​ຈັບຈອງ​ໂຄງການ ການ​ຂັດ​ແຍ່ງ​ພາຍ​ໃນ​ດ້ວຍ​ກັນ​ເອງ ສົ່ງ​ຜົນ​ໃຫ້​ໂຄງການ​ແກ່ຍາວ ແລະ ຊັກ​ຊ້າ.

ສ່ວນ​ການ​ນຳ​ເຂົ້າ​ທຶນ​ຕົວ​ຈິງ​ທີ່​ເປັນ​ວັດຖຸ​ອຸປະກອນ​ເຄື່ອງ​ຈັກ ເຄື່ອງມື​ຮັບ​ໃຊ້​ໂຄງການ ພາຫະນະ ແລະ ການ​ນຳ​ເຂົ້າ​ເງິນສົດ ໃນ​ສົກ​ປີ 2012-2013 ມີ​ມູນ​ຄ່າ​ເຖິງ 1,1 ຕື້​ໂດ​ລາ​ສະຫະລັດ ຫຼື ປະມານ 8.800 ຕື້​ກີບ ຖ້າ​ທຽບໃສ່​ມູນ​ຄ່າ​ໂຄງການ​ທີ່​ໄດ້​ຮັບ​ອະນຸມັດ 3 ຕື້​ໂດ​ລາ​ສະຫະລັດ ຈະ​ເຮັດ​ໃຫ້​ທຶນ​ນຳ​ເຂົ້າ​ຕົວ​ຈິງ​ປະຕິບັດ​ໄດ້​ເຖິງ 37%.

ສຳລັບ​ສົກ​ປີ 2013-2014 ຄາດໝາຍ​ສູ້​ຊົນ​ດຶງ​ດູດ​ການ​ລົງທຶນ​ຂອງ​ພາກ​ເອກະ​ຊົນ​ພາຍ​ໃນ ແລະ ຕ່າງປະເທດ ຄາດ​ວ່າ​ຈະ​ສາມາດ​ປະຕິບັດ​ຕາມ​ຄາດໝາຍ 2,1 ຕື້​ໂດ​ລາ​ສະຫະລັດ ຫຼື ປະມານ 16.800 ຕື້​ກີບ.

ທີ່ມາhttp://www.vientianemai.net

ບົດຄວາມຫຼ້າສຸດ

ການຈັດການຂີ້ເຫຍື້ອທີ່ດີ ຄືຄວາມປອດໄພຕໍ່ສະພາບແວດລ້ອມ ແລະ ສັງຄົມ

ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ:...

ຮູ້ຫຼືບໍ່? ທີ່ໄປທີ່ມາຂອງຊື່ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່

ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່ ມາຮູ້ຄຳຕອບມື້ນີ້ ພາຍຸວິພາ, ພາຍຸຄາຈິກິ ໄດ້ມາຈາກໃສ ໃນໄລຍະນີ້ເຫັນວ່າມີພາຍຸກໍ່ໂຕຂຶ້ນມາຕະຫຼອດ ແລະມີຫຼາຍຄົນອາດຈະສົງໃສວ່າ ໃນການຕັ້ງຊື່ພາຍຸແຕ່ລະລູກ ແມ່ນໃຜເປັນຄົນຕັ້ງ ແລະຄໍາຕອບກໍຄື ຊື່ຂອງພາຍຸແມ່ນໄດ້ຖືກຕັ້ງຂຶ້ນຈາກປະເທດຕ່າງໆໃນທົ່ວໂລກ. ສຳລັບພາຍຸທີ່ສາມາດຕັ້ງຊື່ໄດ້ນັ້ນ ຕ້ອງແມ່ນພາຍຸລະດັບໂຊນຮ້ອນຂຶ້ນໄປ...

ແຈ້ງເຕືອນພາຍຸລູກໃໝ່ ທີ່ອາດຈະສົ່ງຜົນກະທົບຕໍ່ປະເທດລາວ ໃນວັນທີ 30/08/2025 – 02/09/2025

ກຽມຮັບມືພາຍຸລູກໃໝ່ ຫວຽດນາມອອກແຈ້ງເຕືອນພາຍຸລູກໃໝ່ ອາດສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ ຫວຽດນາມອອກແຈ້ງເຕືອນພາຍຸລູກໃໝ່ ທີ່ຄາດວ່າຈະໃຊ້ຊື່ວ່າພາຍຸໜອງຟ້າ ຫຼື ຟ້າໃສ ທີ່ຕັ້ງຊື່ໂດຍປະເທດລາວ ຄາດອິດທິພົນຂອງພາຍຸລູກນີ້ຈະສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ...

ຜົນສໍາເລັດ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ

ເອກະສັນຮັບເລືອກ ສະຫາຍ ປອ. ສັນຕິສຸກ ສິມມາລາວົງ ເປັນເລຂາຄະນະພັກ ກະຊວງເຕັກໂນໂລຊີ ແລະ ການສື່ສານ (ຊຸດໃໝ່) ກະຊວງເຕັກໂນໂລຊີ ແລະ ການສື່ສານລາຍງານຜົນ ກອງປະຊຸມໃຫຍ່ ຜູ້ແທນສະມາຊິກພັກ...