ຂປລ. ​​ເມື່ອ​ໃກ້​ຈະຮອດ ​ເປີດ​ສົກຮຽນ​ໃໝ່​ ຫລາຍ​ໆໂຮງຮຽນໃນ​ທົ່ວ​ປະ​ເທດ ກໍ​ໄດ້​ມີ​ການກຽມຄວາມ​ພ້ອມ, ​ເຊັ່ນ​ດຽວກັນ​ກັບ​ນ້ອງ​ນັກຮຽນ ກໍ​ມີ​ຄວາມ​ຕື່ນ​ເຕັ້ນ ​ທີ່​ຈະ​ໄດ້​ຮຽນ​ໃນ​ຊັ້ນ​ຮຽນໃໝ່ ​ແຕ່ອີກ​ສິ່ງໜຶ່ງທີ່​ຟົດ​ຟື້ນ​ເຊັ່ນ​ດຽວ ກັນ​ກໍ​ຄື ການ​​​ໃຊ້​ຈ່າຍ ຊື້-ຂາຍ​ ອຸປະກອນ​ການ​ຮຽນ, ​​ເຄື່ອງຊຸດ​ນັກຮຽນ, ​ເກີບ, ກະ​ເປົາ, ບິ​ກສໍ ກໍ​ໄດ້​ຮັບ​ຄວາມ​ສົນ​ໃຈ​​ໃນ​​ໄລຍະ​ນີ້​ ເຊັ່ນ​ດຽວກັນ

ທີ​ມງານ​ນັກ​ຂ່າວ​ ສຳນັກ​ຂ່າວສານ​ປະ​ເທດລາວ​ ໄດ້​​ມີ​ໂອກາດ​ໄດ້​ໄປ​​ສຳພາດ​ຕົວ​ຈິງ ທີ່​ຕະຫລາດ​ຂົວ​ດິນ​ເຫັນ​ໄດ້​ວ່າ ​ບັນຍາກາດ​ໃນ​ການ​ໃຊ້​ຈ່າຍ ຊື້-ຂາຍ ມີ​ຄວາມ​ຄຶກຄັກພໍ​ສົມຄວນ ​ມີ​ພໍ່-​ແມ່ ຜູ້​ປົກຄອງ​ໄດ້​ພາ​ລູກ, ຫລານ ມາ​ຊື້​ເຄື່ອງ​ໃຊ້ ​ແລະ ອຸປະກອນ​ການ​ຮຽນ ຢ່າງ​ຫລວງຫລາຍ. ​ ​ແມ່​ຄ້າ​ຮ້ານ​ຂາຍ​ເສື້ອ​ຜ້າ​​ເວົ້າ​ວ່າ: ຜູ້​ປົກຄອງ​ໄດ້​ເລີ່​ມທະ​ຍ່ອຍ​ມາ​ໃຊ້ຈ່າຍ ຊື້​ອຸປະກອນ​ການ​ຮຽນ​ ຕັ້ງ​ແຕ່ຕົ້ນ​ເດືອນສິງຫາ​ ສ່ວນ​ລາຄາ​ກໍ​ເປັນ​ປົກ​ກະຕິ​ ເມື່ອ​ທຽບ​ໃສ່​ປີ​ກາຍນີ້ ​ກໍ​ບໍ່​ໄດ້​ແຕກ​ຕ່າງກັນ​ຫລາຍ ​ເຊັ່ນ: ​ເສື້ອ​ຂາວ​ແຂນ​ສັ້ນ ລາຄາ​ຕົກ​ຢູ່​ປະ​ມານ 25.000- 40.000 ກີບ, ​ເສື້ອ​ຂາວ​ແຂນ​ຍາວ 35.000- 70.000 ກີບ, ສົ້ງ 25.0000-45.000 ກີບ, ​ແຜ່​ສິ້ນ 25.000-30.000 ກີບ/1 ​ແມັດ, ກະ​ໂປງ 22.000- 27.000 ກີບ, ຕີນ​ສິ້ນ 12.000-15.000 ກີບ ລາຄາສິນຄ້າ​ແຕ່ລະ​ຢ່າງ​ ແມ່ນ​​ຂຶ້ນກັບ​ເນື້ອ​ຜ້າ, ນອກຈາກ​ນັ້ນ ​ຍັງ​ມີ​ຮ້ານ​ເກີບ ​ເຊິ່ງມີ​ຫລາຍ​ລາຄາ​ໃຫ້​ເລືອກ ​ເຊິ່ງ​ເລີ່​ມ​ແຕ່ 45.000-300.000 ກີບ, ຮ້ານ​ທີ່​ໄດ້​ຮັບ​ຄວາມ​ສົນ​ໃຈ​ ອີກ​ຮ້ານໜຶ່ງກໍ​ແມ່ນ​ກະ​ເປົາ​ ເຊິ່ງມີ​ຫລາຍ​ສີສັນ ຫລາຍ​ຂະໜາດ​ໃຫ້​ນ້ອງ​ນັກຮຽນ​ ເລືອກລາຄາ​ເລີ່​ມຕົ້ນ​ແມ່ນ 35.000 ຂຶ້ນ​ໄປ ​ແລະ ລາຄາປື້​ມຂຽນ 15.000-50.000 ກີບຕໍ່​ຫໍ່

​ ​ແມ່​ຄ້າ​ຫລາຍໆຮ້ານ​ຕ່າງ​ ກໍເວົ້າ​​ເປັນສຽງດຽວກັນວ່າ: ​ໃນ​​ໄລຍະ​ນີ້ສິນຄ້າ​ທີ່​ຂາຍ​ດີ​ທີ່​ສຸດ ​ກໍ​ຄືເຄື່ອງ​ນຸ່ງ ຊຸດ​ນັກຮຽນ ​ແລະ ອຸປະກອນການ​ຮຽນ​ຕ່າງໆ ​ເຊິ່ງປີ​ນີ້​​ໄດ້​ຂາຍ​ດີ​ພໍ​ສົມຄວນ ​ໂດຍມີ​ລູກ​ຄ້າ​ ຊາວ​ນະຄອນຫລວງວຽງ​ຈັນ ​ແລະ ​ເຂດ​ຊານ​ເມືອງ ​ເຂົ້າ​ມາ​ຊື້​​ເປັນ​ຈຳນວນ​ຫລວງຫລາຍ .

ຂອບໃຈຂ່າວຈາກ: