ມື້ນີ້ ວັນທີ 18 ສິງຫາ 2015 ຄະນະເຈົ້າໜ້າທີ່ກູ້ໄພ ອິນໂດເນເຊຍໄດ້ເດິນທາງເຂົ້າເຖິງ ຈຸດທີ່ເຮືອບິນຕົກໃນພື້ນທີ່ ຫ່າງໄກສອກຫຼີກທາງຕາເວັນອອກຂອງປະເທດແລ້ວ ພົບຊາກເຮືອບິນແຕກຊະກະແຈກກະຈາຍ ຂະນະທີ່ມີລາຍງານວ່າເທິງຍົນ ມີເງິນປະມານ 4 ຕື້ກີບ ກຳລັງໄປຊ່ວຍເຫຼືອຄົນທຸກຍາກ

ຫົວໜ້າສຳນັກງານຄົ້ນຫາແລະກູ້ໄພ ອິນໂດເນເຊຍເປີດເຜີຍວ່າ ທີມກູ້ໄພໄດ້ເດິນທາງເຖິງຈຸດເກີດເຫດ ເຊິ່ງເປັນປ່າທຶບດົງໜາເທິງພູ ໃນແຂວງປາປົວເມື່ອເວລາ 9:30 ມື້ນີ້ ຕາມເວລາໃນທ້ອງຖິ່ນ ເຊິ່ງກົງກັບເວລາ 7:30 ຕາມເວລາໃນປະເທດລາວ ແລະໄດ້ພົບຊາກເຮືອບິນໄຟໄໝ້ໃນສະພາບເສຍຫາຍ ຕົກກະແຈກກະຈາຍຢູ່ທົ່ວທີບ. ໃນຂະນະທີ່ເຈົ້າໜ້າທີ່ກໍຍັງຄົງຄົ້ນຫາຜູ້ລອດຊີວິດ ເຖິງແມ່ນວ່າຈະບໍ່ອາດຈະເປັນໄປໄດ້ ແລະກຳລັງຄົ້ນຫາກ່ອງບັທຶກຂໍ້ມູນການບິນ ທີ່ຈະໄຂປິດສະໜາຂອງເຫດເຮືອບິນຕົກ.

ເຮືອບິນສາຍການບິນຕຣີການາແບບ ແບບສອງໃບພັດລຸ້ນ ATR 42-300 ຂາດການຕິດຕໍ່ໄປເມື່ອຕອນບ່າຍວານນີ້ ຫຼັງຈາກບິນຂຶ້ນຈາກເມືອງຈາຍາປຸລະ ເມືອງເອກຂອງແຂວງປາປົວໄດ້ພຽງ 10 ນາທີ  ໂດຍມີຈຸດໝາຍປາຍທາງທີ່ແຂດອ໊ອກຊິບິນ ທີ່ຢູ່ທາງໃຕ້ ເທິງເຮືອບິນມີຜູ້ໂດຍສານແລະຈຸບິນລວມ 49 ຄົນ ແລະເງິນສົດ 6,500 ລ້ານລູເປຍ ຫຼືປະມານ 4,000 ລ້ານກີບ ທີ່ຈະນຳໄປຊ່ວຍເຫຼືອຄົນທຸກຍາກ.