ທ່ານ ສາຍທອງ ແກ້ງດວງດີ ຮອງເຈົ້າຄອງນະຄອນຫຼວງວຽງຈັນ ລົງກວດກາຊີ້ນຳ ພ້ອມກັບໃຫ້ກຳລັງໃຈປະຊາຊົນບ້ານໜອງພົງ ເມືອງຫາດຊາຍຟອງ ທີ່ຖືກຜົນກະທົບຈາກພະຍຸລົມແຮງພັດໃສ່ ຈົນໄດ້ຮັບຄວາມເສຍຫາຍ 100 ກວ່າຫຼັງຄາເຮືອນ ແຕ່ໂຊກດີບໍ່ມີໃຜໄດ້ຮັບບາດເຈັບ ຫຼື ເສຍຊີວິດໃນເຫດການຄັ້ງນີ້ ໃນວັນທີ 6 ພຶດສະພາ 2013 ທີ່ວັດບ້ານ ດັ່ງກ່າວ ໂດຍໄດ້ຮັບການຕ້ອນຮັບຈາກທ່ານ ຈັນທະລາ ອິນທະລັງສີ ເຈົ້າເມືອງຫາດຊາຍຟອງ ທ່ານ ແກ່ນ ວໍລະສານ ຮອງເຈົ້າເມືອງຫາດຊາຍຟອງ ພ້ອມດ້ວຍອຳນາດການປົກຄອງບ້ານດັ່ງກ່າວ.
ໂອກາດນີ້ ທ່ານຮອງເຈົ້າຄອງນະຄອນຫຼວງວຽງຈັນ ໄດ້ກ່າວສະແດງຄວາມເສຍໃຈກັບຜູ້ທີ່ໄດ້ຮັບຜົນກະທົບຈາກພະຍຸລົມແຮງໃນຄັ້ງນີ້ ພ້ອມທັງຮຽກຮ້ອງໃຫ້ປະຊາຊົນພາຍໃນບ້ານມີສະຕິລະວັງຕົວ ຕິດຕາມການລາຍງານສະພາບດິນຟ້າອາກາດຕາມວິທະຍຸ ໂທລະພາບຢູ່ຕະຫຼອດເວລາ ໂດຍສະເພາະ ຕ້ອງກະກຽມເຄື່ອງມືເຕືອນໄພສຸກເສີນເຊັ່ນ: ກຽມເຄື່ອງມືໂທລະໂຄ່ງພາຍໃນບ້ານ ປຸກລະດົມປະຊາຊົນພາຍໃນບ້ານໃຫ້ມີສະຕິຕະຫຼອດເວລາ ນອກຈາກນີ້ ກໍຂໍຮຽກຮ້ອງມາຍັງບ້ານ ໃຫ້ພ້ອມກັນປູກຕົ້ນໄມ້ທີ່ສາມາດປ້ອງກັນລົມພະຍຸໄດ້ອ້ອມພາຍໃນບ້ານ ເພື່ອໃຫ້ເປັນກຳແພງປ້ອງກັນລົມ ເນື່ອງຈາກບ້ານດັ່ງກ່າວເປັນບ້ານທີ່ມີທີ່ຕັ້ງຢູ່ກາງທົ່ງນານັ້ນເອງ.
ສຳລັບບ້ານໜອງພົງ ໄດ້ຮັບຜົນກະທົບຈາກພະຍຸລົມແຮງ ເມື່ອວັນທີ 28 ເມສາ 2013 ຜ່ານມາ ຈຳນວນ 119 ຫຼັງຄາເຮືອນ (ຈາກທັງໝົດ 512 ຫຼັງ ມີ 513 ຄອບຄົວ 2.419 ຄົນ) ໃນນັ້ນມີບ້ານເຮືອນປະຊາຊົນ ໂຮງຮຽນ ແລະ ວັດວາອາຮາມໄດ້ຮັບຄວາມເສຍຫາຍ ລວມມູນຄ່າເບື້ອງຕົ້ນປະມານ 172 ລ້ານກ່າວກີບ ແນວໃດກໍຕາມ ທາງອຳນາດການປົກຄອງເມືອງຫາດຊາຍຟອງ ກຳລັງຂຸ້ນຂ້ຽວປຸກລະດົມມວນຊົນພາຍໃນເມືອງ ເພື່ອໃຫ້ການຊ່ວຍເຫຼືອປະຊາຊົນບ້ານດັ່ງກ່າວ.