ຕະຫຼາດຫຼັກຊັບ ຈີນ ຜັນຜວນໄປມາຢ່າງຄຶກຄັກໃນວັນພະຫັດຜ່ານມານີ້ ແຕ່ວ່າມຸ່ງໜ້າໄປສູ່ທິດທາງບວກ ຫຼັງຈາກປັກກິ່ງໄດ້ປະກາດຫຼາຍມາດຕະການໃໝ່ເພື່ອລະງັບການຫຼຸດຄ່າລົງໃນສາມອາທິດ. ຕະຫຼາດຫຼັກຊັບຊຽງໄຮ ຕົກລົງເກືອບ 3.5 ເປີເຊັນຫຼັງຈາກການຊື້ຂາຍໄດ້ເລີ່ມຂຶ້ນ, ແຕ່ໃນທີ່ສຸດກໍຟື້ນຕົວໃນທາງບວກໃນຕອນບ່າຍຂອງມື້ນີ້.
ຕະຫຼາດຫຼັກຊັບຮົງກົງ ກໍໄດ້ຕົກລົງ ໃນຕອນເລີ່ມຕົ້ນເຊັ່ນ, ກ່ອນຈະເພີ່ມຂຶ້ນເກືອບ 3 ເປີເຊັນ. ບັນດານັກລົງທຶນ ຈີນແຜ່ນດິນໃຫຍ່ ໄດ້ຂາຍຫຸ້ນໃນລະດັບທີ່ວ່ອງໄວໃນບໍ່ເທົ່າໃດມື້ທີ່ຜ່ານມານີ້, ປະກອບສ່ວນເຂົ້າໃນການຕົກລາຄາລົງເຊິ່ງໄດ້ກວາດລ້າງ 30 ເປີເຊັນຂອງມູນຄ່າຕະຫຼາດຫຼັກຊັບຕັ້ງແຕ່ກາງ ເດືອນມິຖຸນາທີ່ຜ່ານມາ.
ຄະນະກຳມະທິການ ຄວບຄຸມຫຼັກຊັບຂອງຈີນ ໃນວັນພະຫັດຜ່ານມານີ້ ໄດ້ເອົາບາດກ້າວທີ່ຈຳເປັນຂັ້ນ ສຸດທ້າຍ ໂດຍຫ້າມບໍ່ໃຫ້ບັນດາຜູ້ຖືຫຸ້ນເປັນຈຳນວນຫຼວງຫຼາຍການຂາຍຫຸ້ນໃນໄລຍະຫົກເດືອນຂ້າງໜ້າ.
ອົງການຂ່າວ Xinhua ກ່າວວ່າ ຕຳຫຼວດຈະເລີ່ມສຳຫຼວດໃນການ “ຂາຍຫຸ້ນໄລຍະສັ້ນທີ່ດຸເດືອດ,” ເຊິ່ງເປັນການກະກຽມທີ່ຊັບຊ້ອນທີ່ອະນຸຍາດໃຫ້ບັນດານັກລົງທຶນໄດ້ຜົນກຳໄລ ຈາກການຫຼຸດລົງໃນມູນຄ່າຂອງຕະຫຼາດຫຸ້ນ. ປະມານ 1400 ບໍລິສັດທີ່ໄດ້ມີລາຍຊື່ໃນ ຈີນແຜ່ນດິນໃຫຍ່ ຫຼືປະມານ 40 ເປີເຊັນຂອງຕະຫຼາດຫຼັກຊັບ, ໄດ້ຢຸດການຊື້ຂາຍ ໃນຄວາມພະຍາຍາມທີ່ຈະປົກປ້ອງພວກເຂົາຈາກການຂາຍຫຸ້ນອອກຢ່າງກວ້າງຂວາງ.
ການຕົກລາຄາຢ່າງໃຫຍ່ຂອງຕະຫຼາດຫຼັກຊັບຈີນ, ປະສົມປະສານກັບວິກິດການດ້ານການເງິນຂອງເກຣັກ, ແມ່ນກຳລັງສັ່ນຄອນບັນດານັກລົງທຶນໃນທົ່ວໂລກ ແລະ ປະມານຕອນທ່ຽງມື້ນີ້ການຊື້ຂາຍຫຸ້ນໄດ້ຕົກລາຄາລົງໃນຕະຫຼາດຫຼັກຊັບ ໂຕກຽວ, ໂຊລ ແລະ ຊິດນີ.
