ຂປລ, ໃນວັນທີ 24 ມິຖຸນາ 2015 ນີ້ ທີ່ນະຄອນຫລວງວຽງຈັນ, ກອງປະຊຸມໃຫຍ່ຄັ້ງທີ IV ອົງຄະນະພັກກະຊວງປ້ອງກັນປະເທດ ໄດ້ປິດລົງດ້ວຍຜົນສຳເລັດສະຫງ່າງາມ ພາຍຫລັງທີ່ໄດ້ດຳເນີນມາເປັນເວລາ 2 ວັນ ໃຫ້ກຽດເຂົ້າຮ່ວມໂດຍ ສະຫາຍ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນປະທິວັດລາວ ປະທານປະເທດແຫ່ງ ສປປ ລາວ .
ກອງປະຊຸມໄດ້ຜ່ານບົດສະຫລຸບ ແລະ ແຜນການໃນຕໍ່ໜ້າ. ກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດ ເລືອກເອົາຄະນະບໍລິຫານງານພັກຊຸດໃໝ່ ຈຳນວນ 27 ສະຫາຍ ຈາກຜູ້ຮັບສະໝັກເລືອກຕັ້ງ 31 ສະຫາຍບົນພື້ນຖານຖືກຕ້ອງສອດຄ່ອງກັບມາດຖານເງື່ອນໄຂທີ່ກຳນົດໄວ້, ໂດຍໄດ້ເປັນເອກະສັນ ເລືອກເອົາ ສະຫາຍພົນໂທ ແສງນວນ ໄຊຍະລາດ ເປັນເລຂາຄະນະພັກ, ສະຫາຍ ພົນໂທ ຈັນສະໝອນ ຈັນຍາລາດ ເປັນຮອງເລຂາ, ສະຫາຍ ພົນຕີ ວິໄລ ຫລ້າຄໍາຟອງ ເປັນຮອງເລຂາ, ແລະ ເລືອກຕັ້ງເອົາ ສະຫາຍ ພົນຕີ ສຸບັນ ຫຸນນະຈໍາປາ ເປັນປະທານກວດກາ ສະຫາຍ ພົ/ວ ວຽງແກ້ວ ແພງສົມບັດ ເປັນຮອງ, ສະຫາຍ ພົ/ວ ບຸນລ້ຽງ ແສງພະຈັນ ເປັນຮອງປະທານແລະ ສະຫາຍ ພັ/ອ ວັນທອງ ກອງມະນີ ເປັນຮອງປະທານກວດກາ.
ໃນໂອກາດນີ້ ສະຫາຍ ຈູມມາລີ ໄຊຍະສອນ ເລຂາທິການໃຫຍ່, ປະທານປະເທດ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ຄະນະພັກຊຸດໃໝ່ ກໍຄື ຜູ້ແທນສົມບູນໃນກອງປະຊຸມ ໂດຍສະຫາຍ ໄດ້ເນັ້ນໃຫ້ຄະນະພັກ, ຄະນະບັນຊາແຕ່ລະສະຫາຍ ເພີ່ມທະວີການສຶກສາອົບຮົມການເມືອງ-ແນວຄິດໃຫ້ສະ ມາຊິກ ພັກ, ນາຍ ແລະ ພົນທະຫານ ເພື່ອເຮັດໃຫ້ເຂົາເຈົ້າກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ມີສະຕິລະວັງຕົວກຽມພ້ອມສູ້ຮົບ ມີຄວາມອົດທົນເດັດດ່ຽວ ສ້າງກຳລັງໃຫ້ມີຄວາມຮູ້ ມີຄວາມຊຳນານທາງດ້ານວິຊາສະເພາະ, ສືບຕໍ່ເຮັດໃຫ້ປະເທດຊາດ ມີສະຖຽນລະພາບມີຄວາມສະຫງົບປອດໄພ ແລະ ມີການພັດທະນາ ພ້ອມທັງປັບປຸງກໍ່ສ້າງພັກ ໃຫ້ມີຄວາມປອດໃສ ໜັກແໜ້ນ, ເຂັ້ມແຂງ, ມີແບບແຜນວິທີນຳພາວິທະຍາສາດ, ປະດິດສ້າງ ແລະ ແທດເໝາະກັບຕົວຈິງ. ນອກນີ້ ສືບຕໍ່ປັບປຸງກໍ່ສ້າງກໍາລັງທະຫານຊາຍແດນ, ການລັກລອບເຂົ້າອອກຂອງກຸ່ມຄົນບໍ່ດີ, ລັກລອບຂຸດຄົ້ນຊັບ ພະຍາກອນທໍາມະຊາດ, ຄ້າຂາຍສິ່ງທີ່ຜິດກົດໝາຍ, ເຄື່ອນຍ້າຍພູມລໍາເນົາ, ການປັກຫລັກໝາຍຮັບປະກັນໃຫ້ບໍລິເວນຊາຍແດນມີຄວາມສະຫງົບ. ປັບປຸງ ພື້ນຖານການເມືອງ, ສ້າງທ່າສະໜາມສົງ ຄາມປະຊາຊົນ ເປັນຕົ້ນ ແມ່ນໃນບັນດາບໍລິເວນທີ່ສໍາຄັນ, ເຂດຊົນນະບົດຫ່າງໄກສອກຫລີກ, ເຂດພູ ດອຍຊົນເຜົ່າ ແລະ ເຂດຊາຍແດນຂອງປະເທດ, ຊ່ວຍປະຊາຊົນຂະຫຍາຍເສດຖະກິດ-ສັງຄົມ, ວັດທະນະທໍາ, ດໍາເນີນການຜະລິດເປັນສິນຄ້າ, ອະນາໄມກັນພະຍາດ, ລືບລ້າງການເຊື່ອຖືແບບງົມ ງວາຍ ເພື່ອເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ວັດທະນະ ທໍາຂອງປະຊາຊົນບັນດາເຜົ່າ ດີຂຶ້ນເປັນກ້າວໆ. ປະກອບສ່ວນປຸກລະດົມປະຊາຊົນຍົກສູງນ້ຳໃຈເພິງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເປັນເຈົ້າການແກ້ໄຂຂໍ້ຫຍຸ້ງຍາກລວມຂອງປະເທດຊາດ ແລະ ຂອງແຕ່ລະທ້ອງຖິ່ນ, ສຶກສາ ແລະ ນໍາພາປະຊາຊົນຍົກສູງສະຕິເປັນເຈົ້າ ປະຕິບັດລະບຽບກົດໝາຍ, ຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ ໄປຄຽງຄູ່ກັນນີ້ ພ້ອມທັງເພີ່ມທະວີການຮ່ວມມືໂດຍກົງຮອບດ້ານ ກັບກຳລັງປ້ອງຊາດກັບບັນດາເພື່ອນມິດຍຸດທະສາດ ໃຫ້ເຂົ້າສູ່ລວງເລິກຢ່າງມີໝາກຜົນຫລາຍຂຶ້ນ.
ແຫລ່ງຂ່າວ: ສຳນັກຂ່າວສານປະເທດລາວ