Homeຂ່າວພາຍ​ໃນລັດວິສາຫະກິດນໍ້າປະປາລາວຊີ້ແຈງ ເຫດຜົນນໍ້າປະປາມາບໍ່ສະດວກ 3 ວັນ

ລັດວິສາຫະກິດນໍ້າປະປາລາວຊີ້ແຈງ ເຫດຜົນນໍ້າປະປາມາບໍ່ສະດວກ 3 ວັນ

Published on

11109291_1452409005075849_8255189686530762351_n
ຂປລ. ລັດວິສາຫະກິດນໍ້າປະປາລາວໄດ້ຊີ້ແຈງສາເຫດນໍ້າປະປາມາບໍ່ສະດວກເປັນເວລາ 3 ວັນຜ່ານສໍານັກຂ່າວສານປະເທດລາວໃນວັນທີ 15 ມິຖຸນາ 2015 ນີ້ວ່າ: ໂຮງງານຜະລິດນໍ້າປະປາດົງບັງ ແລະ ໂຮງງານຜະລິດນໍ້າປະປາເກົ້າລ້ຽວບໍ່ສາມາດສະໜອງນໍ້າໃຫ້ຜູ້ບໍລິໂພກໃນບາງຈຸດ ແລະ ບາງບ້ານໃນນະຄອນຫລວງວຽງຈັນໄດ້ຢ່າງເຕັມສ່ວນເປັນເພາະລະບົບໄຟຟ້າຂັດຂ້ອງນັບແຕ່ວັນທີ 12-14 ມິຖຸນາ ເຊິ່ງບັນຫາດັ່ງກ່າວໄດ້ສ້າງຄວາມເດືອດຮ້ອນຕໍ່ປະຊາຊົນ, ພະນັກງານ, ທະຫານ, ຕໍາຫລວດ ແລະ ອື່ນໆຕ້ອງຜະເຊີນໜ້າກັບບັນຫາຂາດເຂີນນໍ້າກິນນໍ້າໃຊ້ພໍສົມຄວນ.
ກ່ຽວກັບບັນຫາທີ່ເກີດຂຶ້ນນັ້ນ, ທ່ານ ຄໍາເຜີຍ ວົງສາຄໍາຜຸຍ ຜູ້ອໍານວຍການລັດວິສາຫະກິດນໍ້າປະປາລາວໄດ້ເປີດເຜີຍຕໍ່ນັກຂ່າວຈາກສໍານັກຂ່າວສານປະເທດລາວໃນມື້ດຽວກັນວ່າ: ໂດຍປົກກະຕິແລ້ວພວກເຮົາມີໂຮງງານຜະລິດນໍ້າປະປາຫລາຍແຫ່ງທົ່ວນະຄອນຫລວງວຽງຈັນ ເຊິ່ງສາມາດສະໜອງນໍ້າປະປາໃຫ້ຜູ້ບໍລິໂພກ-ອຸປະໂພກໄດ້ເກືອບ 2 ແສນແມັດກ້ອນຕໍ່ມື້ ແຕ່ສິ່ງບໍ່ຄາດຄິດໄດ້ເກີດຂຶ້ນນັບແຕ່ວັນທີ 12 ມິຖຸນາເປັນຕົ້ນມາ ເມື່ອໂຮງງານຜະລິດນໍ້າປະປາດົງບັງ ແລະ ໂຮງງານຜະລິດນໍ້າປະປາເກົ້າລ້ຽວໄດ້ຮັບແຈ້ງວ່າບໍ່ສາມາດສະໜອງນໍ້າໄດ້ຢ່າງປົກກະຕິເພາະລະບົບໄຟຟ້າຕິດຂັດ ສົ່ງຜົນເຮັດໃຫ້ໂຮງງານນໍ້າປະປາ 2 ແຫ່ງດັ່ງກ່າວບໍ່ສາມາດດູດນໍ້າຂຶ້ນມາອ່າງເພື່ອຜະລິດນໍ້າປະປາໄດ້ຄືໄລຍະຜ່ານມາ ສະນັ້ນມາຮອດປັດຈຸບັນນີ້ ການສາມາດສະໜອງນໍ້າປະປາຈາກ 2 ແສນແມັດກ້ອນຕໍ່ມື້ມາເປັນ 1 ແສນ 70 ພັນແມັດກ້ອນຕໍ່ມື້.
ດ້ວຍເຫດດັ່ງກ່າວ ທາງລັດວິສາຫະກິດນໍ້າປະປາຂໍອະໄພໃນຄວາມບໍ່ສະດວກຕໍ່ພໍ່ແມ່ປະຊາຊົນ, ພະນັກງານ, ທະຫານ, ຕໍາຫລວດ ແລະ ອົງການຈັດຕັ້ງກ່ຽວຂ້ອງ ແລະ ຄາດວ່າພາຍໃນຕອນແລງຂອງວັນທີ 15 ມິຖຸນາ 2015 ນີ້ ທາງລັດວິສາຫະກິດຈະຮ່ວມກັບລັດວິສາຫະກິດໄຟຟ້າປຶກສາຫາລື ແລະ ແກ້ໄຂສະພາບທີ່ຂຶ້ນໃຫ້ຖ່ວງທັນ.

ໂດຍ: ຮັກຊາດ ຂ່າວສານປະເທດລາວ

ບົດຄວາມຫຼ້າສຸດ

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ ໄດ້ຕ້ອນຮັບ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ)...

ສປປ ລາວ ເຂົ້າຮ່ວມເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ (OAC)

ໃນວັນທີ 5 ພະຈິກ 2026 ທີ່ຜ່ານມາ, ສປປ ລາວ ໄດ້ເຂົ້າຮ່ວມການເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ ຫຼື One Asia Communications (OAC) ໃນເວທີປຶກສາຫາລືດ້ານການສື່ສານ...

ແກ້ໄຂຫຼາຍບັນຫາ ນະຄອນຫຼວງວຽງຈັນ ແກ້ໄຂບັນຫາຄວາມທຸກຍາກ ການຂາດແຄນຄູສອນ ການບໍລິຫານຈັດການຂີ້ເຫຍື້ອ

ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດໍາເນີນມາຮອດວັນທີ 13 ພະຈິກ 2026 ໄດ້ປິດລົງດ້ວຍຜົນສໍາເລັດອັນຈົບງາມ ພາຍໃຕ້ການເປັນປະທານຂອງ ທານ...

ກົດລະບຽບພາຍໃນ, ບໍ່ຈອດຊ້ອນຄັນ ຫຼື ກີດຂວາງທາງເຂົ້າ-ອອກ, ບໍ່ຈອງບ່ອນຈອດລົດສາທາລະນະດ້ວຍວັດຖຸ ແລະ ບໍ່ຫຼົບຫຼີກການຊຳລະຄ່າບໍລິການ.

ການຊອກຫາບ່ອນຈອດລົດໃນຕົວເມືອງຍັງກາຍເປັນບັນຫາທີ່ສ້າງຄວາມຫຍຸ້ງຍາກໃຫ້ແກ່ຜູ້ຂັບຂີ່ ໂດຍສະເພາະ ການຈອດລົດບໍ່ເປັນລະບຽບ, ທັງກີດຂວາງການສັນຈອນ ແລະ ສ່ຽງຕໍ່ການເກີດອຸບັດຕິເຫດ ເພື່ອແກ້ໄຂບັນຫາດັ່ງກ່າວ. ດັ່ງນັ້ນນະຄອນຫຼວງວຽງຈັນ (ນວ) ຈຶ່ງໄດ້ຮ່າງຂໍ້ຕົກລົງວ່າດ້ວຍ ການຄຸ້ມຄອງ ແລະ ພັດທະນາສະຖານທີ່ຈອດລົດ ເພື່ອວາງລະບຽບການຈອດລົດໃຫ້ເປັນລະບົບ...