ອີງຕາມການລາຍງານຂອງ ສຳນັກຂ່າວສານປະເທດລາວກ່າວວ່າ: ຄະນະກວດກາພັກ-ລັດແຂວງວຽງຈັນໄດ້ເປີດເຜີຍຕໍ່ນັກຂ່າວສໍານັກຂ່າວສານປະເທດລາວໃນວັນທີ 9 ມິຖຸນາ 2015 ນີ້ວ່າ: 80% ແມ່ນພະນັກງານລັດໃນຈໍານວນຜູ້ກະທໍາຜິດ 57 ຄົນໃນຂໍ້ຫາລັກຊື້-ຂາຍຊັບຂອງລັດແບບບໍ່ຖືກຕ້ອງຢູ່ເມືອງໂພນໂຮງ ແລະ ເມືອງຫີນເຫີບ ເຊິ່ງໃນນັ້ນມີ ຮອງເຈົ້າເມືອງ, ມີພະນັກງານຈາກສູນກາງ ແລະ ທ້ອງຖິ່ນຮູ້ເຫັນເປັນໃຈ ແລະ ເຮັດວຽກຮ່ວມກັນເປັນລະບົບຄົບຊຸດ ມາເຖິງປັດຈຸບັນນີ້ ຈໍານວນໜຶ່ງຂອງຜູ້ກະທໍາຜິດໄດ້ປົດອອກຈາກຕໍາແໜງແລ້ວ ພ້ອມທັງຢືດຊັບສິນຄືນໄດ້ 700 ລ້ານກີບ ແລະ ເງິນຕາຕ່າງປະເທດ 1 ແສນໂດລາສະຫະລັດເຂົ້າງົບປະມານລັດ.
ທ່ານ ເຄນ ເຮືອງຄໍາແສງ ຫົວໜ້າບໍລິຫານຂອງຄະນະກວດກາພັກ-ລັດແຂວງວຽງຈັນໄດ້ເປີດເຜີຍວ່າ: ນີ້ແມ່ນມາດຕະການໜຶ່ງທີ່ເດັດຂາດເພື່ອຫລຸດຜ່ອນປະກົດການຫຍໍ້ທໍ້ທີ່ປະກົດຂຶ້ນພາຍໃນແຂວງ ທັງເປັນການສ້າງຄວາມເຂັ້ມແຂງໃຫ້ພັກ-ລັດຖະບານພວກເຮົາສາມາດເກັບລາຍຮັບເຂົ້າງົບປະມານເພີ່ມຂຶ້ນຢ່າງຕໍ່ເນື່ອງ ອັນເປັນປະກອບສ່ວນປົກປັກຮັກສາ ແລະ ສ້າງພັດທະນາໃຫ້ມີຄວາມຈະເລີນຮຸ່ງເຮືອງ ປະຊາຊົນບັນດາເຜົ່າມີຄວາມຜາສຸກຂຶ້ນເທື່ອລະກ້າວ. ສະນັ້ນ ຜູ້ກະທໍາຜິດທັງໝົດ 57 ຄົນກໍຕ້ອງປະຕິບັດຄໍາຕິສິນຂອງສານຢ່າງເດັດໂດຍບໍ່ມີຂໍ້ຍົກເວັ້ນ ສ່ວນຊັບສິນຂອງລັດທີ່ເສຍຫາຍກໍຕ້ອງເກັບຄືນໃຫ້ຈົນໝົດ.

ຂ່າວສານປະເທດລາວ