ນາຍົກລັດຖະມົນຕີ ຫງວຽນ ເຕິນ ຢຸູງ ແຫ່ງ ສສ. ຫວຽດນາມ ອະນຸມັດແຜນພັດທະນາຜະລິດຕະພັນເຂົ້າຂອງປະເທດໃນປີ 2020 ແລະ ວິໄສທັດຮອດປີ 2030 ໂດຍມຸ່ງເປົ້າສ້າງກາໝາຍສິນຄ້າລະດັບສາກົນ ໃຫ້ແກ່ຜະລິດຕະພັນເຂົ້າຫວຽດນາມ.

ສຳນັກຂ່າວຕ່າງປະເທດ ລາຍງານໃນວັນທີ 24 ພຶດສະພາຜ່ານມານີ້ວ່າ ແຜນການດັ່ງກ່າວຂອງລັດຖະບານຫວຽດນາມ ໄດ້ກຳນົດໄວ້ວ່າພາຍໃນປີ 2020 ເຂົ້າຂອງຫວຽດນາມ 20% ທີ່ຈະສົ່ງອອກຂາຍ ຕ້ອງຢູ່ພາຍໃຕ້ກາໝາຍສິນຄ້າ (Brand) ຂອງຫວຽດນາມ ແລະ ພາຍໃນປີ 2030​ເຂົ້າຂອງຫວຽດນາມ ຈະກາຍເປັນສິນຊ້າຊັ້ນນຳລະດັບໂລກ ໃນແງ່ຂອງຄຸນນະພາບ ແລະ ຄວາມປອດໄພທາງອາຫານ ໂດຍອັດຕາສ່ວນ 50% ຂອງເຂົ້າທີ່ສົ່ງອອກທັງໝົດ ຈະຕ້ອງມີກາໝາຍສິນຄ້າຂອງຫວຽດນາມ.

ພາຍໃນປີ 2014 ທີ່ຜ່ານມາ ຫວຽດນາມໄດ້ສົ່ງອອກເຂົ້າທັງໝົດ 7.5 ລ້ານໂຕນ ແລະ ພາຍໃນປີ 2015 ນີ້ ທາງການຫວຽດນາມ ຈະຕັ້ງເປົ້າປະລິການການສົ່ງອອກໃຫ້ໄດ້ 7 – 7.5 ລ້ານໂຕນ.