ນາຍົກລັດຖະມົນຕີບັງກະລາເທດ ອອກມາຊີ້ແຈງວ່າ ຜູ້ອົບພະຍົບທີ່ລອຍຄ້າງຢູ່ກາງທະເລ ເປັນພວກປ່ວຍທາງຈິດ ແລະ ທຳລາຍກຽດສື່ສຽງຂອງປະເທດ.
ສຳນັກຂ່າວຕ່າງປະເທດ ລາຍງານໃນວັນທີ 25 ພຶດສະພານີ້ວ່າ ທ່ານນາງ ຊີກ ຮາສິນ່າ ນາຍົກລັດຖະມົນຕີຍິງຄົນທຳອິດຂອງບັງກະລາເທດ ໄດ້ອອກມາກ່າວເຖິງວິກິດການຜູ້ອົບພະຍົບ ໃນອາຊີຕາເວັນອອກສຽງໃຕ້ວ່າ ຢູ່ບັງກະລາເທດ ມີຕຳແໜ່ງງານພຽງພໍທີ່ຈະຮອງຮັບກຸ່ມຄົນເຫລົ່ານີ້ ແຕ່ຄົນພວກນີ້ຍັງໜີອອກຈາກປະເທດ ດ້ວຍວິທີຫາຍະນະ ພ້ອມກັບກ່າວອີກວ່າ ກຸ່ມຜູ້ອົບພະຍົບທີ່ລອຍຄໍຢູ່ກາງທະເລເປັນພວກປ່ວຍທາງຈິດ ທີ່ໜີອອກນອກປະເທດໄປຫາວຽກເຮັດງານທຳ ທັງທີ່ສາມາດມີຊີວິດທີ່ດີກ່ວາໃນບັງກະລາເທດໄດ້.
ນອກຈາກນີ້ ນາຍົກລັດຖະມົນຕີບັງກະລາເທດຍັງກ່າວຕໍ່ອີກວ່າ ກຸ່ມຜູ້ອົບພະຍົບໄດ້ສ້າງຄວາມເສື່ອມເສຍຕໍ່ກຽດຊື່ສຽງຂອງປະເທດ ໃນສາຍຕາຂອງສາກົນ ພ້ອມກັບສັ່ງການໃຫ້ເຈົ້າໜ້າທີ່ ສະກັດກຸ່ມຜູ້ອົບພະຍົບ ແລະ ປາບປາມການຄ້າມະນຸດຢ່າງເດັດຂາດ.