ເວັບຂ່າວຊື່ດັ່ງຂອງໄທ sanook.com ໄດ້ລາຍງານໃນວັນທີ 24 ພຶດສະພາຜ່ານມານີ້ວ່າ ນາງແບບສາວຊາວສະຫະລັດອາເມຣິກາ ຊື່ນາງ ຄຣິສເຕັນ ລີແອນ ອ້າງວ່າຕົນເອງຖືກຊາວພຸດໃນປະເທດໄທຂູ່ຂ້າ ຫລັງຈາກທີ່ນາງໄດ້ໃສ່ຊຸດບິກິນີ່ ຖ່າຍຮູບເທິງຕັກພະພຸດທະຮູບທີ່ຮ້ານສະປາແຫ່ງໜຶ່ງ ຢູ່ນະຄອນລອດແອັງເຈີລິສ ສະຫະລັດອາເມຣິກາ ໂດຍນາງໄດ້ເປີດເຜີຍວ່າ ຮູບທີ່ຖືກໂຈມຕີ ເປັນພຽງແຕ່ຮູບທີ່ນາງໄປນັ່ງຢູ່ເທິງຮູບປັ້ນໃນຮ້ານສະປາ ແລ້ວໂພສຕ໌ລົງທາງເຟສບຸກສ່ວນຕົວຂອງນາງເທົ່ານັ້ນ ໂດຍບໍ່ໄດ້ຄິດວ່າຈະກາຍເປັນເລື່ອງໃຫຍ່ຂະໜາດນີ້ ເພາະວ່າຮູບປັ້ນດັ່ງກ່າວ ກໍບໍ່ໄດ້ກ່ຽວຂ້ອງ ຫລື ເຊື່ອມໂຍງກັບປະເທດໄທແຕ່ຢ່າງໃດ ໂດຍນາງໄດ້ຖືກໂຈມຕີຈາກຜູ້ໃຊ້ອິນເຕີເນັດໃນໄທຢ່າງໜັກວ່າ ບໍ່ເຄົາລົບຕໍ່ວັດຖຸອັນເປັນສິ່ງສັກສິດ.

ນອກຈາກນີ້ ນາງຍັງຮູ້ສຶກວ່າເລື່ອງດັ່ງກ່າວບໍ່ແມ່ນເລື່ອງນ້ອຍອີກແລ້ວ ເພາະວ່າໄດ້ມີຄົນສົ່ງພາບທີ່ຊາວເນັດໄທຕັດຕໍ່ມາໃຫ້ນາງ ເຊິ່ງເປັນພາບທີ່ນາງຖືກຕັດຫົວອອກຫລາຍຮູບ ເຮັດໃຫ້ນາງເກີດຄວາມຢ້ານ ແລະ ບໍ່ກ້າທີ່ຈະມາທ່ຽວປະເທດໄທອີກໃນໄລຍະມໍ່ໆນີ້.