ສຳນັກຂ່າວຕ່າງປະເທດ ລາຍງານໃນວັນທີ 22 ພຶດສະພານີ້ວ່າ ທີມເກັບກູ້ລະເບີດຈາກສູນປະຕິບັດການເກັບກູ້ລະເບີດແຫ່ງກຳປູເຈຍ (CMAC) ສາມາດກູ້ລະເບີດຂຶ້ນຈາກແມ່ນ້ຳຂອງໄດ້ ເປັນຄັ້ງທຳອິດມື້ວານນີ້ (21 ພຶດສະພາ) ໂດຍລະເບີດລູກດັ່ງກ່າວ ແມ່ນເປັນລະເບີດ MK82 ໜັກ 500 ກິໂລກຣາມ ເຊິ່ງຜະລິດຂຶ້ນຢູ່ໃນສະຫະລັດອາເມຣິກາ ແລະ ຄາດວ່າຖືກນຳມາຖິ້ມລົງໃສ່ກຳປູເຈຍ ໃນຊ່ວງທ້າຍຊຸມປີ 1960 ຫລື ໄລຍະຕົ້ນຊຸມປີ 1970 ເພື່ອດັບສູນການປະຕິວັດຂອງປະຊາຊົນກຳປູເຈຍ ເຊິ່ງລະເບີດລູກນີ້ ຖືກພົບໃນແມ່ນ້ຳຂອງໂດຍຊາວປະມົງ ຢູ່ຫ່າງຈາກຊາຍຝັ່ງໄປ 200 ແມັດ ເລິກ 7 ແມັດ, ເຈົ້າໜ້າທີ່ເກັບກູ້ລະເບີດ ໄດ້ໃຊ້ຄວາມພະຍາຍາມເປັນພິເສດ ໃນການເຂົ້າເກັບກູ້ລະເບີດລູກດັ່ງກ່າວ ເນື່ອງຈາກເປັນເທື່ອທຳອິດໃນການເກັບກູ້ລະເບີດຢູ່ໃນນ້ຳ ເພາະການເກັບກູ້ລະເບີດໃນນ້ຳ ເປັນບັນຫາພິເສດທີ່ທີມເກັບກູ້ຫລາຍຄົນ ຍັງບໍ່ທັນມີປະສົບການໃນການມຸດນ້ຳເທື່ອ. ແນວໃດກໍຕາມ, ດ້ວຍຄວາມພະຍາຍາມຂອງເຈົ້າໜ້າທີ່ ລະເບີດລູກດັ່ງກ່າວສາມາດເກັບກູ້ຂຶ້ນມາເທິງບົກໄດ້ ແລະ ປົດກະນວນລະເບີດເປັນທີ່ຮຽບຮ້ອຍແລ້ວ.
ທັງນີ້ ຕາມສະຖິຕິຂອງລັດຖະບານກຳປູເຈຍໄດ້ລະບຸວ່າ ມີປະຊາຊົນເສຍຊີວິດ ຫລື ໄດ້ຮັບບາດເຈັບຈາກລະເບີດຕົກຄ້າງທັງໝົດ 154 ຄົນ ໃນປີ 2014 ທີ່ຜ່ານມາ ແລະ ໃນປີ 2013 ກໍມີຜູ້ເສຍຊີວິດທັງໝົດ 111 ຄົນ.
