ທ່ານ ທັກ​ສິນ ຊິນ​ນະ​ວັດ ອະ​ດີດ​ນາ​ຍົກ​ລັດ​ຖະ​ມົນ​ຕີ​ໄທ ກ່າວ​ໃນ​ຂະ​ນະ​ຢູ່​ໃນ​ເກົາ​ຫລີ​ໃຕ້ ວິ​ຈານ​ການ​ເຮັດ​ວຽກ​ຂອງ​ລັດ​ຖະ​ບານ ພົນ​ເອກ ປະ​ຍຸດ ຈັນ​ໂອ​ຊາ ຍັງ​ບໍ່​ທັນ​ເຂົ້າ​ຕາ​ກຳ​ມະ​ການ.

ສຳ​ນັກ​ຂ່າວ​ເດ​ລິ​ນິວ​ຂອງ​ໄທ ລາຍ​ງານ​ໃນ​ວັນ​ທີ 19 ພຶດ​ສະ​ພາ​ນີ້​ວ່າ ທ່ານ ທັກ​ສິນ ຊິນ​ນະ​ວັດ ອະ​ດີດ​ນາ​ຍົກ​ລັດ​ຖະ​ມົນ​ຕີ​ໄທ ໄດ້​ກ່າວ​ວິ​ຈານ​ການ​ເຮັດ​ວຽກ​ຂອງ​ລັດ​ຖະ​ບານ​ຊຸດ​ປັດ​ຈຸ​ບັນ ໃນ​ຂະ​ນະ​ທີ່​ເດີນ​ທາງ​ໄປ​ຮ່ວມກອງ​ປະ​ຊຸມ​ຜູ້​ນຳ​ແຫ່ງ​ທະ​ວີບ​ອາ​ຊີ ຄັ້ງ​ທີ 6 (The 6th Asian Leadership Conference) ຢູ່ ສ.ເກົາ​ຫລີ ​ໂດຍ​ທ່ານ​ໄດ້​ລະ​ບຸ​ວ່າ ” ການ​ບໍ​ລິ​ຫານ​ງານ​ຂອງ​ລັດ​ຖະ​ບານ ພົນ​ເອກ ປະ​ຍຸດ ຈັນ​ໂອ​ຊາ ນາ​ຍົກ​ລັດ​ຖະ​ມົນ​ຕີ ແລະ ຫົວ​ໜ້າ​ຄະ​ນະ​ຮັກ​ສາ​ຄວາມສະ​ຫງົບ​ແຫ່ງ​ຊາດ ຍັງ​ບໍ່​ທັນ​ເປັນ​ຕາ​ປະ​ທັບ​ໃຈ​ພໍ​ເທົ່າ​ໃດ ແລະ ຂໍ​ໃຫ້​ພະ​ຍາ​ຍາມ​ເຮັດ​ວຽກ​ໜັກ​ກ່​ວາ​ນີ້ ” ແນວ​ໃດ​ກໍ​ຕາມ ທ່ານ ທັກ​ສິນ ຊິນ​ນະ​ວັດ ກໍ​ຍັງ​ເຊື່ອ​ວ່າ ລັດ​ຖະ​ບານ​ຂອງ​ພົນ​ເອກ​ປະ​ຍຸດ ຈະ​ສາ​ມາດ​ປະ​ສົບ​ຜົນ​ສຳ​ເລັດ​ໃນ​ການ​ບໍ​ລິ​ຫານ​ປະ​ເທດ​ໄດ້.

ນອກ​ຈາກ​ນັ້ນ, ທ່ານ ທັກ​ສິນ ຊິນ​ນະ​ວັດ ເຊິ່ງ​ປັດ​ຈຸ​ບັນ​ກຳ​ລັງ​ລີ້​ໄພ​ທາງ​ການ​ເມືອງ​ຢູ່​ຕ່າງ​ປະ​ເທດ ຍັງ​ໄດ້​ປະ​ຕິ​ເສດ​ກ່ຽວ​ກັບ​ການ​ສະ​ໜັບ​ສະ​ໜູນ​ກຸ່ມ​ເສື້ອ​ແດງ ແລະ ທັງ​ຍັງ​ເວົ້າ​ອີກວ່າ ຕົນ​ເອງ​ບໍ່​ໄດ້​ມີ​ແຜນ​ການ​ໃຫ້​ ທ້າວ ພານ​ທອງ​ແທ້ ຊິນ​ນະ​ວັດ ເຊິ່ງ​ເປັນ​ລູກ​ຊາ​ຍ​ຄີງ ຂຶ້ນ​ເປັນ​ຫົວ​ໜ້າ​ພັກ​ເພື່ອ​ໄທ​ ຕາມ​ຫາງ​ສຽງ​ຂ່າວ​ລື​ໃນ​ເວ​ທີ​ການ​ເມືອງ​ໄທ​ປັດ​ຈຸ​ບັນ​ແຕ່​ຢ່າງ​ໃດ.