ເພື່ອເປັນການກະຕຸ້ນໃຫ້ສັງຄົມຮູ້ວ່າ: ສວນເຈົ້າອະນຸວົງ ນະຄອນຫຼວງວຽງຈັນ ເປັນສວນປອດຄວັນຢາສູບຕາມກົດໝາຍ ມາແຕ່ປີ 2011 ແລະ ເປັນການປ່ຽນພຶດຕິກຳຂອງຜູ້ທີ່ມາທ່ຽວຊົມ ແລະ ຄ້າຂາຍບໍ່ໃຫ້ສູບຢາໃນບໍລິເວນສວນດັ່ງກ່າວ ພ້ອມທັງເປັນການສະເຫຼີມສະຫຼອງວັນງົດຢາສູບໂລກ ກໍ່ຄືວັນງົດຢາສູບແຫ່ງຊາດ ໃນວັນທີ 31 ພຶດສະພາ 2015 ທີ່ຈະມາເຖິງນີ້ ທັງນີ້ກໍ່ເພື່ອເປັນການປຸກລະດົມໃຫ້ສັງຄົມຮັບຮູ້ ແລະ ເຂົ້າໃຈເຖິງໄພອັນຕະລາຍຂອງຢາສູບ ໂດຍສະເພາະແມ່ນກຸ່ມໄວໜຸ່ມ ທັງເປັນການປູກຈິດສຳນຶກໃຫ້ຜູ້ເຂົ້າຮ່ວມຮູ້ວ່າ ການສູບຢາບໍ່ແມ່ນສິ່ງປົກກະຕິ ມັນເປັນສິ່ງເສບຕິດທີ່ພາໃຫ້ເກີດພະຍາດທີ່ຮ້າຍແຮງ ແລະ ເສຍຊີວິດກ່ອນໄວອັນຄວນໄດ້.
ພາຍໃນງານຍັງມີກິດຈະກຳທີ່ໃຫ້ຄວາມຮູ້ກ່ຽວກັບຜົນຮ້າຍຂອງຢາສູບ ກິດຈະກຳຖາມ-ຕອບ ແລະ ແຈກສື່ປຸກລະດົມຫ້າມສູບຢາ ການເດີນຂະບວນຖືປ້າຍພະຍາດຕ່າງໆທີ່ເກີດຈາກການສູບຢາ ການເດີນຂະບວນຂອງມາສຄອດ ແລະ ຫຸ່ນກະດູກທີ່ເປັນມະເຮັງປອດ ນອກຈາກນີ້ຍັງມີການສະແດງຂອງໄວໜຸ່ມ ເພື່ອສື່ໃຫ້ເຫັນເຖິງຄົນຕາຍຍ້ອນຢາສູບ 13 ຄົນຕໍ່ມື້ ເຊິ່ງຕ້ອງມີມາດຕະການຄວບຄຸມຢາສູບໃຫ້ເຂັ້ມງວດ ເພື່ອເຮັດໃຫ້ຈຳນວນຜູ້ຕາຍໃນແຕ່ລະມື້ຫຼຸດລົງ.
ກິດຈະກຳໄວໜຸ່ມເພື່ອປຸກລະດົມສວນເຈົ້າອະນຸວົງປອດຄວັນຢາສູບ ຈັດຂຶ້ນວັນທີ 15 ພຶດສະພາ 2015 ຈັດໂດຍພະແນກສາທາລະນະສຸກ ນະຄອນຫຼວງວຽງຈັນ ຮ່ວມກັບກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ສະມາພັນຄວບຄຸມຢາສູບອາຊຽນ ແລະ ອົງການອະນາໄມໂລກ ເປັນກຽດເຂົ້າຮ່ວມຂອງທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ທ່ານ ດຣ.ນາງ ຈຸລຽດ ໄຟລໂຊ ຕາງໜ້າອົງການອະນາໄມໂລກ ປະຈຳ ສປປ ລາວ ທ່ານ ດຣ.ພັດເກິ່ງ ຊາເນດ ຫົວໜ້າກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ ທັງເປັນຫົວໜ້າກອງເລຂາຄະນະກຳມະ ການແຫ່ງຊາດ ເພື່ອການຄວບຄຸມຢາສູບ ມີບັນດາອຳນາດການປົກຄອງເມືອງ 4 ເມືອງໃນ ແລະ ບ້ານອ້ອມຂ້າງສວນເຈົ້າອະນຸວົງ ຊາວໜຸ່ມ ນັກຮຽນ ແລະ ມວນຊົນເຂົ້າຮ່ວມ.
ແຫລ່ງຂ່າວ: ວຽງຈັນໃໝ່