ທາງການໄທມີມະຕິແຈ້ງຂໍ້ກ່າວຫາ ພະສຸເທບ ເທືອກສຸບັນ ຖານໃຊ້ອຳນາດບໍ່ຖືກຕ້ອງ ກໍລະນີລົງນາມສ້າງສະຖານີຕຳຫລວດ 396 ແຫ່ງ ໂດຍບໍ່ຜ່ານມະຕິຄະນະລັດຖະບານ.
ສຳນັກຂ່າວຕ່າງປະເທດ ລາຍງານໃນວັນທີ 14 ພຶດສະພາຜ່ານມານີ້ວ່າ ຄະນະກຳມະການປ້ອງກັນ ແລະ ປາບປາມການທຸຈະຣິດແຫ່ງຊາດໄທ ໄດ້ຖະແຫລງຄວາມຄືບໜ້າການສອບສວນ ກໍລະນີຄວາມບໍ່ໂປ່ງໃສໃນໂຄງການກໍ່ສ້າງອາຄານ ສະຖານີຕຳຫລວດ ຈຳນວນ 396 ແຫ່ງ ໃນຂອບເຂດທົ່ວປະເທດ ໃນສະໄໝລັດຖະບານຂອງນາຍົກລັດຖະມົນຕີ ອະພິສິດ ເວດຊາຊີວະ ໂດຍຫລັກຖານເບື້ອງຕົ້ນແມ່ນເຫັນວ່າ ພະສຸເທບ ຫລື ທ່ານ ສຸເທບ ເທືອກສຸບັນ ໃນເວລາດຳລົງຕຳແໜ່ງຮອງນາຍົກລັດຖະມົນຕີ (ປັດຈຸບັນບວດເປັນພະ) ແມ່ນມີໜ້າທີ່ຊີ້ນຳສຳນັກງານຕຳຫລວດແຫ່ງຊາດ ແລ້ວໃຊ້ອຳນາດເຊັນອະນຸມັດໂຄງການດັ່ງກ່າວ ໂດຍບໍ່ຜ່ານການລົງມະຕິຢູ່ກອງປະຊຸມຄະນະລັດບານຂອງໄທເສຍກ່ອນ ອັນໄດ້ເຮັດໃຫ້ຄະນະກຳມະການສອບສວນ ມີມະຕິແຈ້ງຂໍ້ກ່າວຫາຢ່າງເປັນທາງການຕໍ່ພະສຸເທບ ຖານໃຊ້ອຳນາດ ແລະ ລະເວັ້ນປະຕິບັດໜ້າທີ່ໂດຍບໍ່ຖືກຕ້ອງ.
ທັງນີ້ ພະສຸເທບ ເຊິ່ງພາຍຫລັງນຳພາມວນຊົນອອກມາເດີນຂະບວນປະທ້ວງ ຕໍ່ຕ້ານລັດຖະບານຂອງ ນາງ ຍິ່ງລັກ ຊິນນະວັດ ຈົນເຮັດໃຫ້ເກີດມີການເຮັດລັດຖະປະຫານຍຶດອຳນາດ ແລ້ວຕົນເອງຈິ່ງຜັນຕົນອອກຈາກການເມືອງ ເຂົ້າບວດໃນພະພຸດທະສາສະໜາຈົນຮອດປັດຈຸບັນ, ພາຍຫລັງຮັບຊາບຂໍ້ກ່າວຫາ ພະສຸເທບ ກໍໄດ້ກຽມພ້ອມເຂົ້າແກ້ຂໍ້ກ່າວຫາຂອງຕົນ ຕໍ່ຄະນະກຳມະການດັ່ງກ່າວແລ້ວ.