ເຈົ້າໜ້າທີ່ໄທກວດພົບຄ້າຍກັກກັນຊາວໂຣຮິນຍາແຫ່ງໃໝ່ ເທິງຍອດພູແກ້ວຊາຍແດນໄທ – ມາເລເຊຍ ຄາດອາດບັນຈຸຊາວໂຣຮິນຍາໄດ້ ປະມານ 1,000 ກ່ວາຄົນ.
ສຳນັກຂ່າວຕ່າງປະເທດ ລາຍງານໃນວັນທີ 12 ພຶດສະພາຜ່ານມານີ້ວ່າ ເຈົ້າໜ້າທີ່ໄທໄດ້ກວດພົບຄ້າຍກັກກັນຊາວໂຣຮິນຍາແຫ່ງໃໝ່ ເທິງພູແກ້ວ ເຂດຊາຍແດນໄທ – ມາເລເຊຍ ເຊິ່ງຕັ້ງຢູ່ບໍລິເວນຕາແສງປາດັງເບຊາ ເມືອງສະເດົາ ແຂວງສົງຂາ ແລະ ຍັງພົບສຸສານຝັງສົບ ຢູ່ບໍ່ໄກຈາກຈຸດທີ່ພົບຄ້າຍອີກ ປະມານ 3 ກິໂລແມັດ ໂດຍຜ່ານການກວດສອບພົບວ່າ ຄ້າຍດັ່ງກ່າວເປັນຄ້າຍທີ່ໃຫຍ່ທີ່ສຸດເທິງພູແກ້ວ ເຊິ່ງຄາດວ່າສາມາດບັນຈຸຊາວໂຣຮິນຍາໄດ້ ປະມານ 1,000 ຄົນ ໂດຍຄ້າຍດັ່ງກ່າວນີ້ ປຸກສ້າງຂຶ້ນມີລັກສະນະຖາວອນ ແລະ ສະພາບຍັງໃໝ່ອ່ຽມ.
ນອກຈາກນີ້ ເຈົ້າໜ້າທີ່ຍັງພົບເຄື່ອງໃຊ້ ແລະ ເສື້ອຜ້າຢູ່ພາຍໃນຄ້າຍດັ່ງກ່າວ ໂດຍຄາດວ່າຂະບວນການຄ້າມະນຸດ ອາດຫາກໍຍ້າຍຊາວໂຣຮິນຍາອອກຈາກຄ້າຍນີ້ ໄປຍັງຝັ່ງມາເລເຊຍບໍ່ດົນ ເຊິ່ງເບື້ອງຕົ້ນເຈົ້າໜ້າທີ່ໄດ້ເກັບຫລັກຖານທີ່ພົບ ເພື່ອນຳໄປພິສູດ ໃນການເຊື່ອມໂຍງດຳເນີນຄະດີກັບກຸ່ມຄ້າມະນຸດດັ່ງກ່າວ.
ຢ່າງໃດກໍຕາມ ມີລາຍງານອີກວ່າ ເຈົ້າໜ້າທີ່ໄດ້ກວດພົບຄ້າຍຂະໜາດນ້ອຍອີກ 3 ແຫ່ງ ເທິງພູແກ້ວ ແລະ ໃນເບື້ອງຝັ່ງຂອງລັດເປີລິດ ປະເທດມາເລເຊຍ ກໍຍັງມີຄ້າຍກັກກັນລັກສະນະດຽວກັນອີກ 3 ແຫ່ງ ເຊິ່ງຄາດວ່າສ້າງຂຶ້ນ ເພື່ອໄວ້ຖ້າຮອງຮັບຈຳນວນທີ່ຖືກເຄື່ອນຍ້າຍອອກຈາກຝັ່ງໄທ.
