ເຮືອບິນຮົບຂອງກຸ່ມພັນທະມິດອາຫລັບ ນຳໂດຍຊາອຸດິອາຣະເບຍ ບຸກໂຈມຕີທາງອາກາດທຳລາຍສາງອາວຸດ ໃກ້ກັບເມືອງຫລວງຂອງເຢເມນ ເຮັດໃຫ້ເກີດລະເບີດຢ່າງຮຸນແຮງ ຈົນມີຜູ້ເສຍຊີວິດ ແລະ ບາດເຈັບຈຳນວນຫລາຍ.
ສຳນັກຂ່າວຕ່າງປະເທດລາຍງານ ໃນວັນທີ 13 ພຶດສະພານີ້ວ່າ ເຮືອບິນຮົບຂອງກຸ່ມພັດທະມິດຊາດອາຫລັບ ແລະ ຕາເວັນອອກກາງ ເຊິ່ງນຳໂດຍກອງທັບຊາອຸດິອາຣະເບຍ ໄດ້ດຳເນີນການໂຈມຕີທາງອາກາດ ທຳລາຍສາງເກັບອາວຸດ ເຊິ່ງຕັ້ງຢູ່ໃນຄ້າຍທະຫານໃກ້ກັບນະຄອນຫລວງຊານາ ເມືອງຫລວງຂອງປະເທດເຢເມນ ເຮັດໃຫ້ເກີດການລະເບີດຢ່າງຮຸນແຮງ ຈົນມີຜູ້ເສຍຊີວິດເຖິງ 69 ຄົນ ແລະ ບາດເຈັບອີກຢ່າງໜ້ອຍ 250 ຄົນ.
ການໂຈມຕີດັ່ງກ່າວ ເກີດຂຶ້ນໃນຊ່ວງຕອນກາງຄືນຂອງມື້ວັນຈັນ (11 ພຶດສະພາ) ຜ່ານມາ ແຕ່ການລະເບີດຂອງອາວຸດໃນສາງ ເຊິ່ງຕັ້ງຢູ່ໃນຄ້າຍທະຫານເທິງພູໂນກຸມ ຍັງຄົງເກີດລະເບີດຂຶ້ນຢ່າງຕໍ່ເນື່ອງຈົນເຖິງຕອນບ່າຍຂອງມື້ວັນອັງຄານ (12 ພຶດສະພາ) ໂດຍແຮງລະເບີດ ໄດ້ສົ່ງຄື່ນກະແທກ ແລະ ມີເສດຫັກພັງຂອງສາງ ປິວໄປເຂດຊຸມຊົນບໍລິເວນອ້ອມຮອບ ເຮັດໃຫ້ບ້ານເຮືອນໄດ້ຮັບຄວາມເສຍຫາຍ ແລະ ມີຄົນບາດເຈັບລົ້ມຕາຍ.