ເຈົ້າໜ້າທີ່ກວດຄົນເຂົ້າເມືອງຂອງແອັດສະປາຍ ກວດພົບເດັກນ້ອຍ 8 ປີ ຂົດຢູ່ໃນກະເປົາເດີນທາງຜ່ານເຄື່ອງເອັກສະເຣ ເພື່ອລັກລອບເຂົ້າປະເທດແອັດສະປາຍ.
ສຳນັກຂ່າວຕ່າງປະເທດ ລາຍງານໃນວັນທີ 8 ພຶດສະພາຜ່ານມານີ້ວ່າ ເຈົ້າໜ້າທີ່ກວດຄົນເຂົ້າເມືອງ ໃນນະຄອນປົກຄອງຕົນເອງເຊວະຕາ ຂອງແອັດສະປາຍ ຕ້ອງຕົກຕະລຶງເມື່ອເຫັນຮູບຮ່າງມະນຸດຢູ່ໃນກະເປົາເດີນທາງ ຜ່ານໜ້າຈໍຂອງເຄື່ອງເອັກສະເຣ ໂດຍເຈົ້າຂອງກະເປົາ ແມ່ນແມ່ຍິງອາຍຸ 19 ປີ ເຮັດໃຫ້ເຈົ້າໜ້າທີ່ຕ້ອງຮີບເປີດກະເປົາ ເພື່ອເອົາເດັກນ້ອຍອອກມາ ໂດຍຜ່ານການສອບສວນພົບວ່າ ແມ່ຍິງຄົນດັ່ງກ່າວຖືກວ່າຈ້າງ ໃຫ້ລັກລອບນຳເອົາເດັກນ້ອຍເຂົ້າປະເທດແອັດສະປາຍ. ພາຍຫລັງເຈົ້າໜ້າທີ່ໄດ້ສົ່ງຕົວເດັກນ້ອຍຄົນດັ່ງກ່າວ ໄປກວດສຸຂະພາບ ກ່ອນຈະສົ່ງໃຫ້ສະຖານສັງຄົມສົງເຄາະເບິ່ງແຍງຊົ່ວຄາວ ໃນຂະນະທີ່ພໍ່ຂອງເດັກນ້ອຍຄົນດັ່ງກ່າວນີ້ ກໍໄດ້ຖືກເຈົ້າໜ້າທີ່ຈັບກຸມ ພາຍຫລັງເດີນທາງມາຈາກໄອວໍຣີໂຄດ ໂດຍຜ່ານດ່ານກວດດຽວກັນ.