ບໍ​ລິ​ສັດ ຊິ​ເມັນ ເອ​ຈີ (Siemens AG) ເຊິ່ງ​ເປັນ​ບໍ​ລິ​ສັດ​ຍັກ​ໃຫຍ່​ດ້ານ​ວິ​ສະ​ວະ​ກຳ​ຂອງ​ເຢຍ​ລະ​ມັນ ອອກ​ຖະ​ແຫລງ​ປົດ​ພະ​ນັກ​ງານ​ທົ່ວ​ໂລກ ເພີ່ມ 4,500 ຕຳ​ແໜ່ງ ຕາມ​ແຜນ​ປັບ​ປຸງ​ໂຄງ​ສ້າງ​ບໍ​ລິ​ສັດ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 7 ພຶດ​ສະ​ພາ​ຜ່ານ​ມາ​ນີ້​ວ່າ ບໍ​ລິ​ສັດ ຊີ​ເມັນ ເອ​ຈີ ໄດ້​ຖະ​ແຫລງ​ຈະ​ຢຸດ​ເຊົາ​ຈ້າງ​ພະ​ນັກ​ງານ ຈຳ​ນວນ 4,500 ຕຳ​ແໜ່ງໃນ​ທົ່ວ​ໂລກ ໂດຍ​ໃນ​ນັ້ນ ປະ​ມານ 2,200 ຄົນ​ແມ່ນ​ຢູ່​ໃນ​ປະ​ເທດ​ເຢຍ​ລະ​ມັນ​ເອງ ທີ່​ຈະ​ໄດ້​ຮັບ​ຜົນ​ກະ​ທົບ ເຊິ່ງ​ປັດ​ຈຸ​ບັນ​ບໍ​ລິ​ສັດ​ດັ່ງ​ກ່າວ ແມ່ນ​ມີ​ພະ​ນັກ​ງານ​ປະ​ຈຳ​ການ​ທັງ​ໝົດ 300,000 ຄົນ ໃນ​ທົ່ວ​ໂລກ ເພື່ອ​ໃຫ້​ເປັນ​ໄປ​ຕາ​ມ​ແຜນ​ການ​ປັບ​ປຸງ​ໂຄງ​ສ້າງ​ຂອງ​ບໍ​ລິ​ສັດ ເຊິ່ງ​ຈະ​ມີ​ການ​ຫລຸດ​ຈຳ​ນວນ​ພະ​ແນກ​ການ​ພາຍ​ໃນ​ອົງ​ກອນ​ລົງ ລວມ​ໄປ​ເຖິງ​ຕຳ​ແໜ່ງ​ງານ​ຕ່າງໆ​ພາຍ​ໃນ​ບໍ​ລິ​ສັດ​ທີ່​ຊັບ​ຊ້ອນ​ໃຫ້​ສຳ​ເລັດກ່ອນ​ປີ 2016.

ແຜນ​ການ​ປັບ​ປຸງ​ໂຄງ​ສ້າງ​ດັ່ງ​ກ່າວ​ນີ້ ບໍ​ລິ​ສັດ​ຄາດ​ວ່າ​ຈະ​ສາ​ມາດ​ປະ​ຢັດ​ເງິນ​ໄດ້​ເຖິງ 1 ຕື້​ເອີ​ໂຣ ແລະ ບໍ​ລິ​ສັດ ຈະ​ເລັ່ງ​ເພີ່ມ​ຜົນ​ກຳ​ໄລ ໃນ​ຂະ​ແໜງ​ການ​ຜະ​ລິດ​ທີ່​ໃຫ້​ຜົນ​ຕອບ​ແທນ​ສູງ​ກ່​ວາເຊັ່ນ: ດ້ານ​ພະ​ລັງານ, ເຄື່ອງ​ມື​ທາງ​ການ​ແພດ ແລະ ການ​ພັດ​ທະ​ນາ​ລະ​ບົບ​ຕິ​ຈິ​ຕອນ ໃນ​ລະ​ບົບ​ອຸດ​ສາ​ຫະ​ກຳ ແລະ ການ​ຄົມ​ມະ​ນາ​ຄົມ.