ທະນາຄານກາງຫວຽດນາມ ປະກາດປັບຫລຸດຄ່າເງິນດົງຄັ້ງທີ 2 ໃນປີນີ້ ເພື່ອກະຕຸ້ນການສົ່ງອອກ ແລະ ຊຸກຍູ້ເສດຖະກິດໃຫ້ຂະຫຍາຍຕົວເພີ່ມຂຶ້ນ.
ສຳນັກຂ່າວຕ່າງປະເທດ ລາຍງານໃນວັນທີ 7 ພຶດສະພາຜ່ານມານີ້ວ່າ ທະນາຄານແຫ່ງລັດຫວຽດນາມ (SBV) ຈະປັບຫລຸດອັດຕາແລກປ່ຽນອ້າງອີງລົງ 1% ຢູ່ທີ່ 21,673 ດົງ ຕໍ່ 1 ໂດລາສະຫະລັດ ເພື່ອຮັບມືກັບຜົນກະທົບຂອງຕະຫລາດຕ່າງປະເທດ, ກອ່ນໜ້ານີ້ ສະກຸນເງິນດົງ ໄດ້ປັບຫລຸດລົງ 1% ແລ້ວເມື່ອເດືອນມັງກອນຜ່ານມາ ໂດຍການປັບເທື່ອໃໝ່ນີ້ ຖືເປັນຄັ້ງທີ 2 ໃນປີ 2015.
ການຫລຸດຄ່າເງິນດົງລົງ ຈະຊ່ວຍໃຫ້ພາກການສົ່ງອອກຂອງຫວຽດນາມ ສາມາດແຂ່ງຂັນກັບຂູ່ແຂ່ງໃນພາກພື້ນໄດ້ ເຊິ່ງລາຍງານຂອງລັດຖະບານຫວຽດນາມໄດ້ລະບຸວ່າ ໃນປີ 2014 ເສດຖະກິດຂອງປະເທດ ຂະຫຍາຍຕົວ 5.98% ອັນເປັນອັດຕາການຂະຫຍາຍຕົວສູງສຸດໃນຮອບ 3 ປີ ໃນຂະນະທີ່ອັດຕາເງິນເຟີ້ ໄດ້ຫລຸດລົງ 4.09% ແລະ ໃນປີນີ້ ລັດຖະບານຫວຽດນາມ ໄດ້ຕັ້ງເປົ້າການເຕີບໂຕທາງເສດຖະກິດຢູ່ທີ່ 6.2%.