ນາ​ຍົກ​ລັດ​ຖະ​ມົນ​ຕີ​ຮຸນ​ແຊນ ແຫ່ງ​ຣາ​ຊະ​ອາ​ນາ​ຈັກ​ກຳ​ປູ​ເຈຍ ປະ​ກາດ​ຈະ​ລົງ​ສະ​ໝັກ​ເລືອກ​ຕັ້ງ​ອີກ​ສະ​ໄໝ​ໜຶ່ງຢ່າງ​ເປັນ​ທາງ​ການ ໃນ​ມື້​ວານ​ນີ້ (29 ເມ​ສາ).

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 30 ເມ​ສາ​ນີ້​ວ່າ ສົມ​ເດັດ ຮຸນ​ແຊນ ນາ​ຍົກ​ລັດ​ຖະ​ມົນ​ຕີ​ກຳ​ປູ​ເຈຍ ອາ​ຍຸ 63 ປີ ເຊິ່ງ​ເປັນ​ຜູ້​ນຳ​ທີ່​ຄອງ​ອຳ​ນາດ​ຍາວ​ນານ​ທີ່​ສຸດ​ໃນ​ອາ​ຊີ ໄດ້​ປະ​ກາດ​ໃນ​ມື້​ວັນ​ທີ 29 ເມ​ສາ​ຜ່ານ​ມາ​ນີ້​ວ່າ ຕົນ​ເອງ​ຕັ້ງ​ໃຈ​ຈະ​ລົງ​ສະ​ໝັກ​ເລືອກ​ຕັ້ງ​ອີກ​ສະ​ໄໝໜຶ່ງ​ໃນ​ປີ 2018 ນີ້ ເຊິ່ງ​ສອດ​ຄ່ອງ​ກັບ​ທີ່​ທ່ານ​ເຄີຍ​ປະ​ກາດ​ໃນ​ໄລ​ຍະ​ຜ່ານ​ມາ​ວ່າ ຈະ​ຢູ່​ໃນ​ຕຳ​ແໜ່ງ​ຜູ້​ນຳ​ປະ​ເທດ ໄປ​ຈົນ​ຮອດອາ​ຍຸ 74 ປີ.

ທັງ​ນີ້ ການ​ເຕີບ​ໂຕ​ທາງ​ດ້ານ​ເສດ​ຖະ​ກິດ, ການ​ສ້າງ​ວຽກ​ເຮັດ​ງານ​ທຳ ແລະ ຄວາມ​ສະ​ຫງົບ​ສຸກ​ໃນ​ສັງ​ຄົມກຳ​ປູ​ເຈຍ ເຊິ່ງ​ເຄີຍ​ຕົກ​ຢູ່​ໃນ​ພາ​ວະ​ສົງ​ຄາມ​ກາງ​ເມືອງ​ມາ​ຫລາຍ​ທົດ​ສະ​ວັດ​ຜ່ານ​ມາ​ນັ້ນ ໄດ້​ກາຍ​ເປັນ​ສິ່ງ​ທີ່​ຮັບ​ປະ​ກັນ​ວ່າ ທ່ານ ຮຸນແຊນ ຈະ​ສືບ​ຕໍ່​ໄດ້​ຮັບ​ການ​ເລືອກ​ຕັ້ງ​ຈາກ​ປະ​ຊາ​ຊົນ ໃຫ້​ດຳ​ລົງ​ຕຳ​ແໜ່ງ​ທາງ​ການ​ເມືອງ​ອີກ​ສະ​ໄໝ ເຖິງ​ແມ່ນ​ຈະ​ມີ​ສິ່ງ​ທ້າ​ທາຍ​ຈາກ​ພັກ​ຝ່າຍ​ຄ້ານ ແລະ ກຸ່ມ​ຄົນ​ທີ່​ບໍ່​ສະ​ໜັບ​ສະ​ໜູນ​ທ່ານກໍ​ຕາມ.