ບໍ​ລິ​ສັດ​ ໂຕ​ໂຍ​ຕ້າ ມໍ​ເຕີ້ ຄອງ​ແຊັ້ມ​ຍອດ​ຈຳ​ໜ່າຍ​ລົດ​ຍົນ​ສູງ​ທີ່​ສຸດ​ໃນ​ທົ່ວ​ໂລກ ໂດຍ​ໄຕ​ມາດ​ທຳ​ອິດ ແມ່ນ​ບັນ​ລຸ 2.52 ລ້ານ​ຄັນ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 24 ເມ​ສາ​ນີ້​ວ່າ ບໍ​ລິ​ສັດ ໂຕ​ໂຍ​ຕ້າ ມໍ​ເຕີ້ ໄດ້​ເປີດ​ເຜີຍຍອດ​ຈຳ​ໜ່າຍ​ລົດ​ຍົນ​ໃນ​ໄຕ​ມາດ​ທຳ​ອິດ​ຂອງ​ປີ​ນີ້ ​ບັນ​ລຸ 2.52 ລ້ານ​ຄັນ ເຊິ່ງຫລຸດ​ລົງ 2.5% ທຽບ​ໃສ່​ປີ​ທີ່​ຜ່ານ​ມາ, ສ່ວນ ໂຟກ​ສະ​ວາ​ເກັ້ນ ຂອງ​ເຢຍ​ລະ​ມັນ ກໍ​ໄດ້​ເປີດ​ເຜີຍ​ວ່າ ມີ​ຍອດ​ຈຳ​ໜ່າຍ​ໄຕ​ມາດ​ທຳ​ອິດ 2.49 ລ້ານ​ຄັນ, ຈີ​ເອັມ ຂອງ​ສະ​ຫະ​ລັດ​ອາ​ເມ​ຣິ​ກາ ຈຳ​ໜ່າຍ​ລົດ​ຍົນ​ໄດ້ 2.4 ລ້ານ​ຄັນ ເຊິ່ງ​ທັງ​ສອງ​ບໍ​ລິ​ສັດ​ໄດ້​ກ່າວ​ວ່າ ຍອດ​ຈຳ​ໜ່າຍ​ລົດ​ຍົນ​ຂອງ​ຕົນ​ເອງ ເພີ່ມ​ຂຶ້ນ​ເມື່ອ​ທຽບ​ກັບ​ໄຕ​ມາດ​ທຳ​ອິດ​ຂອງ​ປີ​ກາຍ.

ສຳ​ລັບ​ໂຕ​ໂຍ​ຕ້າ​ແລ້ວ ຄາດ​ໝາຍ​ວ່າ​ຈະ​ຈຳ​ໜ່າຍ​ລົດ​ໄດ້​ທັງ​ໝົດ 10.15 ລ້ານ​ຄັນ​ໃນ​ປີ​ນີ້ ຈາກ​ເມື່ອ​ປີ​ທີ່​ຜ່ານ​ມາ ສາ​ມາດ​ຂາຍ​ໄດ້​ສູງ​ເປັນ​ປະ​ຫວັດ​ການ​ເຖິງ 10.23 ລ້ານ​ຄັນ.