ຈຳ​ນວນ​ນັກ​ທ່ອງ​ທ່ຽວ​ຕ່າງ​ປະ​ເທດ ໄຫລ​ເຂົ້າ​ຍີ່​ປຸ່ນ​ໃນ​ເດືອນ​ມີ​ນາ​ຜ່ານ​ມາ ເພີ່ມ​ຂຶ້ນ 1 ລ້ານ 5 ແສນ​ຄົນ ທຳ​ລາຍ​ສະ​ຖິ​ຕິ​ທີ່​ເຄີຍ​ບັນ​ທຶກ​ໄວ້​ກ່ອນ​ໜ້າ​ນີ້.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 24 ເມ​ສາ​ນີ້​ວ່າ ສະ​ຖິ​ຕິ​ນັກ​ທ່ອງ​ທ່ຽວ​ຊາວ​ຕ່າງ​ປະ​ເທດ ທີ່​ເດີນ​ທາງ​ເຂົ້າ​ໄປ​ທ່ຽວ​ໃນ​ປະ​ເທດ​ຍີ່​ປຸ່ນ ເພີ່ມ​ຂຶ້ນ​ຢ່າງ​ຕໍ່​ເນື່ອງ​ເປັນ​ເດືອນ​ທີ 26 ຕິດ​ຕໍ່​ກັນ​ແລ້ວ ໂດຍ​ໃນ​ເດືອນ​ມີ​ນາ​ທີ່​ຜ່ານ​ມາ ມີ​ຈຳ​ນວນ​ສູງ​ເຖິງ 1,526,000 ຄົນ ເຊິ່ງ​ທຽບ​ກັບ​ໄລ​ຍະ​ດຽວ​ກັນ​ກັບ​ປີ​ກາຍ ແມ່ນ​ເພີ່ມ​ຂຶ້ນ​ເຖິງ 45.3% ແລະ ຍັງ​ເປັນ​ສະ​ຖິ​ຕິ​ທີ່​ສູງ​ສຸດ ຈາກ​ການ​ເກັບ​ກຳ​ຂໍ້​ມູນ​ຂອງ​ອົງ​ການ​ທ່ອງ​ທ່ຽວ​ແຫ່ງ​ຊາດ​ຍີ່​ປຸ່ນ​ອີກ​ດ້ວຍ.

ທັງ​ນີ້ ນັກ​ທ່ອງ​ທ່ຽວ​ຊາວ​ຈີນ ຖື​ເປັນ​ນັກ​ທ່ອງ​ທ່ຽວ​ທີ່​ເດີນ​ທາງ​ໄປ​ຍີ່​ປຸ່ນ​ຫລາຍ​ທີ່​ສຸດ ຈຳ​ນວນ​ກ່​ວາ 338,200 ຄົນ ໂດຍ​ເພີ່ມ​ຂຶ້ນ​ຈາກ​ໄລ​ຍະ​ດຽວ​ກັນ​ຂອງ​ປີ​ກາຍ​ເຖິງ 83.7% ຮອງ​ລົງ​ມາ​ແມ່ນ​ນັກ​ທ່ອງ​ທ່ຽວ​ຈາກ​ໄຕ້​ຫວັນ ແລະ ເກົາ​ຫລີ​ໃຕ້.