ນັບແຕ່ວັນທີ 12-18 ເມສານີ້ ເຊິ່ງເປັນໄລຍະຂອງການສະເຫຼີມສະຫຼອງບຸນປີໃໝ່ລາວ ພສ 2558 ທົ່ວປະເທດ ມີອຸບັດຕິເຫດເກີດຂຶ້ນ 325 ກໍລະນີ ສົ່ງຜົນໃຫ້ມີຄົນເສຍຊີວິດ 45 ຄົນ ຖ້າທຽບໃສ່ໃນໄລຍະດຽວກັນຂອງປີຜ່ານມາ ເຫັນວ່າມີຈຳນວນເພີ່ມຂຶ້ນ 10 ກໍລະນີ ແລະ ມີຜູ້ເສຍຊີວິດເພີ່ມຂຶ້ນ 6 ຄົນ ແຕ່ຈຳນວນພາຫະນະເປ່ເພ ແລະ ຜູ້ໄດ້ຮັບບາດເຈັບແມ່ນມີອັດຕາຫຼຸດລົງ ໃນນີ້ ສະເພາະນະຄອນຫຼວງວຽງຈັນ ໄດ້ເກີດອຸບັດຕິເຫດຫຼາຍກວ່າແຂວງອື່ນໆ ແມ່ນມີ 52 ກໍລະນີ ມີຜູ້ເສຍຊີວິດ 6 ຄົນ ຮອງລົງມາແມ່ນແຂວງຈຳປາສັກ 51 ກໍລະນີ ເສຍຊີວິດ 5 ຄົນ ແລະ ແຂວງທີ່ມີອຸບັດຕິເຫດເກີດຂຶ້ນໜ້ອຍ ແຕ່ມີຜູ້ເສຍຊີວິດຫຼາຍແມ່ນແຂວງໄຊຍະບູລີ 7 ກໍລະນີ ເສຍຊີວິດ 5 ຄົນ ແຂວງບໍລິຄຳໄຊ 21 ກໍລະນີ ເສຍຊີວິດ 5 ຄົນ ນອກຈາກນີ້ ແຂວງທີ່ບໍ່ມີຄົນເສຍຊີວິດຈາກອຸບັດຕິເຫດ ມີ 5 ແຂວງຄື: ຜົ້ງສາລີ ຫົວພັນ ຊຽງຂວາງ ເຊກອງ ແລະ ແຂວງອັດຕະປື ແລະ ສ້າງຄວາມເສຍຫາຍຫຼາຍສົມຄວນ.
ເຈົ້າໜ້າທີ່ກົມຈະລາຈອນ ກະຊວງປ້ອງກັນຄວາມສະຫງົບ ໃຫ້ຮູ້ວ່າ: ໄລຍະ 7 ວັນຂອງບຸນປີໃໝ່ລາວປີນີ້ ເຈົ້າໜ້າທີ່ທຸກຄົນ ໄດ້ສຸມໃສ່ການຕັ້ງຈຸດກວດກາ ເປັນຕົ້ນ ຄວບຄຸມທາດເຫຼົ້າ ການຂັບຂີ່ລົດດ້ວຍຄວາມໄວ ກວດເອກະສານຕ່າງໆ ທັງນີ້ກໍ່ເພື່ອປ້ອງກັນຄວາມສະຫງົບ ແລະ ປາກົດການຫຍໍ້ທໍ້ທີ່ຈະຕາມມາ ພ້ອມນີ້ ຍັງເຫັນວ່ານັກຂັບຂີ່ທຸກຄົນ ແມ່ນມີສະຕິລະວັງຕົວຫຼາຍຂຶ້ນ ປະຕິບັດກົດລະບຽບຈະລາຈອນຢ່າງເຂັ່ງຄັດ ແຕ່ຍັງມີບາງຈຳນວນທີ່ຍັງເມີນເສີຍ ແລະ ປະໝາດ ຈຶ່ງເຮັດໃຫ້ມີອຸບັດຕິເຫດຮ້າຍແຮງເກີດຂຶ້ນຕາມລຳດັບ ດັ່ງນັ້ນ ຖ້າພວກເຮົາທຸກຄົນເອົາໃຈໃສ່ ໃນການປະຕິບັດກົດລະບຽບໃຫ້ເຂັ້ມງວດ ອຸບັດຕິເຫດກໍ່ສາມາດຫຼຸດລົງໄດ້ເຊັ່ນກັນ.
ໃນຂະນະດຽວກັນ ຢູ່ນະຄອນຫຼວງວຽງຈັນ ຍັງໄດ້ເກີດມີອັກຄີໄພ ໄຟໄໝ້ເຮືອນປະຊາຊົນ 3 ຄັ້ງຄື: ໃນວັນທີ 13 ເມສາ ຢູ່ບ້ານວັດໄຕ ເມືອງສີໂຄດຕະບອງ ລວມມູນຄ່າເສຍຫາຍຫຼາຍກວ່າ 250 ລ້ານກີບ ໃນມື້ຕໍ່ມາເກີດຂຶ້ນຢູ່ບ້ານວຽງຄຳ ເມືອງສີໂຄດຕະບອງ ມູນຄ່າເສຍຫາຍ 28 ລ້ານກີບ ແລະ ໃນວັນທີ 15 ເມສາ ໄດ້ເກີດຢູ່ບ້ານດອນແດງ ເມືອງຈັນທະບູລີ ເສຍຫາຍຫຼາຍກວ່າ 250 ລ້ານກີບ ໂຊກດີເຫດການທັງໝົດບໍ່ມີຜູ້ໄດ້ຮັບບາດເຈັບ ແລະ ເສຍຊີວິດ ດັ່ງນັ້ນ ເຈົ້າໜ້າທີ່ມອດໄຟນະຄອນຫຼວງວຽງຈັນ ຈຶ່ງເຕືອນມາຍັງປະຊາຊົນທຸກຄົນ ຈົ່ງມີສະຕິໃນການຊົມໃຊ້ຟືນໄຟທຸກຄັ້ງ ແມ່ນໃຫ້ດັບມອດກ່ອນຈຶ່ງອອກຈາກບ້ານ ແລະ ການຈູດທູບບູຊາກໍ່ເຊັ່ນດຽວກັນ ຫຼັງຈາກສຳເລັດການກາບໄຫວ້ ກໍ່ໃຫ້ດັບມອດທັນທີ ເພື່ອປ້ອງກັນການເກີດອັກຄີໄພ.
ແຫລ່ງຂ່າວ: ວຽງຈັນໃໝ່