ສຳນັກຂ່າວຕ່າງປະເທດ ລາຍງານໃນວັນທີ 9 ເມສານີ້ວ່າ ກໍລະນີເຈົ້າໜ້າທີ່ຕຳຫລວດ ກໍ່ເຫດຍິງຊາຍຜິວດຳເສຍຊີວິດ ຢູ່ລັດເຊົ້າ ແຄໂຣໄລນ່າ ໄດ້ກາຍເປັນປະເດັນທີ່ຖືກວິພາກວິຈານຢູ່ໃນສັງຄົມອາເມຣິກາ ໂດຍມີການຍົກພຶດຕິກຳຂອງເຈົ້າໜ້າທີ່ ໃນການແບ່ງແຍກສີຜິວ ໂດຍລ່າສຸດເຈົ້າໜ້າທີ່ຕຳຫລວດລາຍດັ່ງກ່າວນີ້ ໄດ້ຖືກຈັບກຸມ ແລະ ດຳເນີນຄະດີແລ້ວ.
ທັງນີ້ໄດ້ມີພົນລະເມືອງດີອັດຄລິບວີດີໂອ ໃນຂະນະທີ່ເຫດການດັ່ງກ່າວເກີດຂຶ້ນ ເຊິ່ງເປັນຫລັກຖານອັນສຳຄັນ ໂດຍໃນຄລິບໄດ້ສະແດງໃຫ້ເຫັນ ເຈົ້າໜ້າທີ່ຕຳຫລວດຊື່ ໄມເຄິນ ສະເລເກີ ອາຍຸ 33 ປີ ຍິງປືນໃສ່ ທ້າວ ວໍເຕີ ເລັມເມີ ສະກ໊ອດ ອາຍຸ 50 ປີ 8 ນັດຊ້ອນກັນ ເປັນເຫດເຮັດໃຫ້ເຂົາເສຍຊີວິດທັນທີ ເຊິ່ງລ່າສຸດຕຳຫລວດລາຍດັ່ງກ່າວ ໄດ້ຖືກຈັບກຸມຂໍ້ຫາຂ້າຄົນອື່ນຕາຍແລ້ວ.
ຢ່າງໃດກໍຕາມ ສຳລັບກໍລະນີຕຳຫລວດຍິງຜູ້ຕ້ອງຫາໃນສະຫະລັດ ປັດຈຸບັນຍັງປະກົດໃຫ້ເຫັນເລື້ອຍໆ ແຕ່ກໍມັກຈະມີການຕັ້ງຂໍ້ຫາ ຫລື ດຳເນີນຄະດີໜ້ອຍຫລາຍ ເຊິ່ງກາຍເປັນປະເດັນທີ່ສ້າງຄວາມບໍ່ພໍໃຈຂອງປະຊາຊົນ ໂດຍສະເພາະຄົນອາເມຣິກັນຜິວດຳ ທີ່ມັກຕົກເປັນເປົ້າຂອງການຈັບກຸມຂອງເຈົ້າໜ້າທີ່.
