ລັດຖະບານເກົາຫລີໃຕ້ເປີດເຜີຍ ກູ້ຊາກເຮືອເຊວອນ ອາດໃຊ້ງົບສູງເຖິງ 110 ລ້ານໂດລາ ຫລັງມີກະແສຮຽກຮ້ອງຈາກຍາດພີ່ນ້ອງ ໃຫ້ກູ້ຊາກເຮືອ ກ່ອນຄົບຮອບ 1 ປີ ເຫດເຮືອອັບປາງ.
ສຳນັກຂ່າວຕ່າງປະເທດ ລາຍງານໃນວັນທີ 8 ເມສາຜ່ານມານີ້ວ່າ ໃນວັນທີ 16 ເມສາຈະມາເຖິງນີ້ ແມ່ນຈະຄົບຮອບ 1 ປີ ເຫດເຮືອຂ້າມຟາກເຊວອນ ຂອງເກົາຫລີໃຕ້ອັບປາງກາງທະເລ ເຮັດໃຫ້ມີຜູ້ເສຍຊີວິດໄປກ່ວາ 300 ຄົນ ເຊິ່ງສ່ວນໃຫຍ່ແມ່ນນັກຮຽນມັດທະຍົມ ທີ່ກຳລັງຈະເດີນທາງໄປທັດສະນະສຶກສາເທິງເກາະເຊຈູ. ບັນດາພໍ່ແມ່ຜູ້ປົກຄອງທີ່ສູນເສຍລູກຂອງຕົນ ໄດ້ພ້ອມກັນເດີນຂະບວນ ເປັນໄລຍະທາງ 35 ກິໂລແມັດ ຈາກເມືອງອັນຊານ ໄປຍັງນະຄອນຫລວງເຊອູນ ໃນທ້າຍອາທິດທີ່ຜ່ານມາ ເພື່ອຮຽກຮ້ອງໃຫ້ລັດຖະບານກູ້ຊາກເຮືອລຳດັ່ງກ່າວ ແລະ ຕັ້ງຄະນະກຳມະການອິດສະຫລະຂຶ້ນມາ ເພື່ອທຳການສືບສວນອຸບັດເຫດດັ່ງກ່າວນີ້ ກ່ອນທີ່ຈະເຖິງມື້ວັນຄົບຮອບ 1 ປີ ຂອງເຫດໂສກນາຕະກຳ.
ທັງນີ້ ໜ່ວຍກູ້ໄພສາມາດນຳຮ່າງຂອງຜູ້ໂດຍສານຂຶ້ນມາໄດ້ 295 ສົບ ແລະ ປິດພາລະກິດການຄົ້ນຫາພາຍໃນຕົວເຮືອ ນັບຕັ້ງແຕ່ເດືອນພະຈິກປີ 2014 ຜ່ານມາ ເຊິ່ງຍັງມີອີກ 9 ສົບ ທີ່ຍັງບໍ່ສາມາດຄົ້ນຫາພົບເທື່ອ, ດ້ານກະຊວງມະຫາສະໝຸດ ແລະ ການປະມົງເກົາຫລີໃຕ້ ກໍໄດ້ອອກມາເປີດເຜີຍໃນວັນທີ 8 ເມສາຜ່ານມານີ້ວ່າ ການດຶງກູ້ຊາກເຮືອເຊວອນ ກັບຂຶ້ນມາເທິງຜິວນ້ຳນັ້ນ ແມ່ນຈະຕ້ອງໃຊ້ງົບປະມານ 120,000 ລ້ານວອນ (ສະກຸນເງິນເກົາຫລີ) ຫລື ປະມານ 110 ລ້ານໂດລາສະລັດ ເຊິ່ງທາງລັດຖະບານຍັງຄົງບໍ່ທັນອະນຸມັດໃຫ້ມີການກູ້ຊາກເຮືອເທື່ອ.
