ໄອຍະການເກົາຫລີໃຕ້ ຕັ້ງຂໍ້ຫາຊາຍກໍ່ເຫດຟັນໜ້າທູດສະຫະລັດ ຖານພະຍາຍາມຂ້າ ມີໂທດໜັກເຖິງຂັ້ນປະຫານຊີວິດ.
ສຳນັກຂ່າວຕ່າງປະເທດ ລາຍງານໃນວັນທີ 1 ເມສາຜ່ານມານີ້ວ່າ ໄອຍະການຂອງເກົາຫລີໃຕ້ ໄດ້ຕັ້ງຂໍ້ຫາ ພະຍາຍາມຂ້າ ຢ່າງເປັນທາງການແກ່ ທ້າວ ຄິມ ຄີ ຈອງ ອາຍຸ 55 ປີ ທີ່ກໍ່ເຫດບຸກທຳຮ້າຍຮ່າງກາຍ ທ່ານ ມາກ ລິບເປີດ ເອກອັກຄະລັດຖະທູດສະຫະລັດອາເມຮິກາ ປະຈຳສາທາລະນະລັດເກົາຫລີ ຫລື ເກົາຫລີໃຕ້ ດ້ວຍການໃຊ້ມີດປອດໝາກໄມ້ ຟັນເຂົ້າໃບໜ້າຂອງທ່ານທູດ ເຮັດໃຫ້ໄດ້ຮັບບາດເຈັບໜັກບໍລິເວນແກ້ມດ້ານຂວາ ໂດຍໄດ້ຫຍິບເຖິງ 80 ເຂັມ ແລະ ນອນພັກຟື້ນໃນໂຮງໝໍເປັນເວລາ 5 ມື້.
ທັງນີ້ ຂໍ້ກ່າວຫາດັ່ງກ່າວແມ່ນມີໂທດອາດຈຳຄຸກຕະຫລອດຊີວິດ ຫລື ບໍ່ກໍເຖິງຂັ້ນປະຫານຊີວິດ ໂດຍການພິຈາລະນາຄະດີ ຈະມີຂຶ້ນພາຍໃນ 14 ມື້ຕໍ່ຈາກນີ້ ຫລື ໄວສຸດກໍແມ່ນພາຍໃນອາທິດໜ້າ ໂດຍໄອຍະການຍັງຕັ້ງບັນຫາສືບສວນ ທ້າວ ຄິມ ຄີ ຈອງ ອີກວ່າ ເຂົາອາດລະເມີດກົດໝາຍຄວາມໝັ້ນຄົງແຫ່ງຊາດ ເຊິ່ງຫ້າມບໍ່ໃຫ້ປະຊາຊົນຊາວເກົາຫລີໃຕ້ ຝັກໄຝ່ ຫລື ໃຫ້ການສະໜັບສະໜູນຊ່ວຍເຫລືອເກົາຫລີເໜືອ ເຊິ່ງກົດໝາຍສະບັບນີ້ ຍັງຄົງເປັນທີ່ຖົກຖຽງກັນຢ່າງກວ້າງຂວາງ ໃນສັງຄົມເກົາຫລີໃຕ້.
ທ້າວ ຄິມ ຄີ ຈອງ ເປັນຄົນທີ່ມີຊາດນິຍົມສູງ ແລະ ເຂົາເຫັນວ່າສະຫະລັດເອງ ເປັນອຸປະສັກຂັດຂວາງການຄືນສູ່ຄວາມປອງດອງ ລະຫວ່າງເກົາຫລີເໜືອ ແລະ ເກົາຫລີໃຕ້ ເຊິ່ງເຂົາໄດ້ເຄີຍເດີນທາງໄປເກົາຫລີເໜືອຫລາຍຄັ້ງ ໃນລະຫວ່າງປີ 2006 ເຖິງປີ 2007, ກ່ອນການບຸກໂຈມຕີຟັນໜ້າທ່ານທູດສະຫະລັດ ເຂົາເອງກໍຍັງໄດ້ຮ້ອງດ້ວຍສຽງແຮງ ຮຽກຮ້ອງໃຫ້ເກົາຫລີເໜືອ ແລະ ໃຕ້ລວມປະເທດກັນ ລວມທັງຕໍ່ຕ້ານການຊ້ອມຮົບປະຈຳປີ ລະຫວ່າງກອງທັບເກົາຫລີໃຕ້ ແລະ ກອງທັບສະຫະລັດອາເມຣິກາອີກດ້ວຍ.